Ikaduwang Cronica
27 An edad ni Jotam+ kan siya magin hadi 25 anyos, asin namahala siya sa Jerusalem sa laog nin 16 na taon. An saiyang ina iyo si Jerusah na aki ni Zadok.+ 2 Padagos niyang ginibo kun ano an tama sa paghiling ni Jehova, arog kan ginibo kan saiyang ama na si Uzias,+ apuwera kan pangahas na paglaog sa templo ni Jehova.+ Alagad padagos pa man giraray na minagawi nin kapaha-pahamak an banwaan. 3 Itinugdok niya an itaas na trangkahan kan harong ni Jehova,+ asin dakul siyang itinugdok sa ibabaw kan pader kan Ofel.+ 4 Nagtugdok man siya nin mga siyudad+ sa kabukidan nin Juda,+ asin nagtugdok siya nin mga lugar na may matibay na depensa+ saka mga tore+ sa mga kadlagan. 5 Nakigiyera siya sa hadi kan mga Ammonita+ asin sa kahuri-hurihi nanggana siya sa sainda. Kaya kan taon na iyan, nagtao sa saiya an mga Ammonita nin 100 na talentong* pirak, 10,000 na cor* nin trigo, asin 10,000 na cor nin sebada. Arog man kaini an ibinayad sa saiya kan mga Ammonita kan ikaduwa asin ikatulong taon.+ 6 Kaya lalo pang nagkusog si Jotam, huling determinado* siyang maglakaw sa mga dalan ni Jehova na saiyang Diyos.
7 Kun manungod sa iba pang nangyari sa buhay ni Jotam, an gabos niyang pakikigiyera asin an saiyang mga gibo, nakasurat iyan sa Libro kan mga Hadi kan Israel asin kan Juda.+ 8 An edad niya kan siya magin hadi 25 anyos, asin namahala siya sa Jerusalem sa laog nin 16 na taon.+ 9 Dangan nagadan* si Jotam, asin ilinubong ninda siya sa Siyudad ni David.+ Asin si Ahaz na saiyang aki an nagsalida sa saiya bilang hadi.+