Ikaduwang Cronica

12 Dai nahaloy, pagkatapos na marigon na maestablisar an pagkahadi ni Rehoboam+ asin magin siyang makapangyarihan, binayaan niya asin kan bilog na Israel na kaiba niya an Katugunan ni Jehova.+ 2 Kan ikalimang taon ni Hading Rehoboam, sinalakay ni Hading Sisak+ kan Ehipto an Jerusalem, huling dai sinda nagin maimbod ki Jehova. 3 Igwa siya nin 1,200 na karwahe, 60,000 na parakabayo, asin dai mabilang na mga suldados na mga taga Libya, mga Sukiim, asin mga Etiope na nag-iriba sa saiya hali sa Ehipto.+ 4 Nasakop niya an mga may matibay na depensang siyudad kan Juda, asin sa katapos-tapusi, nakaabot siya sa Jerusalem.

5 Dinumanan ni Semaias+ na propeta si Rehoboam asin an mga pamayo* kan Juda na nagkatiripon sa Jerusalem huli sa takot ninda ki Sisak, asin sinabi niya sa sainda: “Ini an sabi ni Jehova, ‘Binayaan nindo ako, kaya binayaan ko man kamo+ sa kamot ni Sisak.’” 6 Huli kaini, nagpakumbaba an mga pamayo* kan Israel saka an hadi+ asin nagsarabi: “Matanos si Jehova.” 7 Kan mahiling ni Jehova na nagpakumbaba sinda, uminabot ki Semaias an tataramon ni Jehova, na an sabi: “Nagpakumbaba sinda. Dai ko sinda lalaglagon,+ asin sa dikit na sanang panahon, ililigtas ko sinda. Dai ko iuula sa Jerusalem an kaanggutan ko paagi ki Sisak. 8 Pero magigin mga lingkod niya sinda, tanganing maaraman ninda an pagkakalain kan paglilingkod sa sako asin kan paglilingkod sa mga hadi* kan ibang mga nasyon.”

9 Kaya sinalakay ni Hading Sisak kan Ehipto an Jerusalem. Kinua niya an mga kayamanan sa harong ni Jehova+ asin an mga kayamanan sa harong* kan hadi. Entero niyang kinua, pati an mga kalasag na bulawan na ginibo ni Solomon.+ 10 Kaya tanganing maribayan an mga iyan, naggibo si Hading Rehoboam nin mga kalasag na tanso, asin ipinagkatiwala an mga iyan sa mga namamayo kan guwardiya,* na nagbabantay sa may entrada kan harong kan hadi. 11 Pag minaduman an hadi sa harong ni Jehova, minalaog an mga guwardiya asin dinadara an mga iyan, dangan ibinabalik ninda an mga iyan sa kuwarto kan mga guwardiya. 12 Huling nagpakumbaba an hadi, nawara an kaanggutan ni Jehova sa saiya,+ asin dai niya sinda lubos na linaglag.+ Asin may marahay man na mga bagay na nahiling sa Juda.+

13 Pinakusog ni Hading Rehoboam an posisyon niya sa Jerusalem asin padagos na naghadi. An edad ni Rehoboam kan magin hadi 41 anyos, asin naghadi siya sa laog nin 17 taon sa Jerusalem, an siyudad na pinili ni Jehova hali sa gabos na tribo nin Israel tanganing diyan ibugtak an saiyang pangaran. An ina kan hadi iyo si Naama na Ammonita.+ 14 Alagad ginibo niya kun ano an maraot, huling dai siya nagin determinado sa saiyang puso na hanapon si Jehova.+

15 Kun manungod sa mga nangyari sa buhay ni Rehoboam, puon sa kapinunan sagkod sa katapusan, bakong nakasurat iyan sa mga isinurat* ni Semaias+ na propeta asin sa mga isinurat ni Iddo+ na bisyonaryo na kaiba sa rekord nin mga ginikanan? Asin pirmi kaidtong may giyera sa pag-ultanan ni Rehoboam asin Jeroboam.+ 16 Dangan nagadan* si Rehoboam asin ilinubong sa Siyudad ni David+ sa kaibanan kan saiyang mga apuon; asin si Abias+ na saiyang aki an nagsalida sa saiya bilang hadi.