Ezekiel
27 Nag-abot giraray sako an tataramon ni Jehova, na sinasabi: 2 “Aki nin tawo, kantahan mo nin sarong panambitan* an Tiro,+ 3 asin sabihon mo sa Tiro,
‘Ika na nakaistar sa mga trangkahan kan dagat,
An nakikipagnegosyo sa mga banwaan sa dakul na isla,
Ini an sinabi kan Soberanong Kagurangnan na Jehova:
“O Tiro, ika mismo an nagsabi, ‘Perpekto an kagayunan ko.’+
4 Nasa katahawan kan dagat an saimong mga teritoryo,
Asin an saimong kagayunan ginibong perpekto kan mga paratugdok mo.
5 An gabos mong tabla ginibo ninda hali sa mga kahoy na enebro kan Senir,+
Asin nagkua sinda nin sedro sa Lebanon para igibo ka nin palo.
6 An saimong mga sagwan ginibo ninda hali sa mga kahoy na ensina* kan Basan,
Asin an saimong prowa* gibo sa sipres na linagan nin marpil* na hali sa mga isla kan Kitim.+
7 Makulor na telang lino haling Ehipto an saimong layag,
Asin an saimong mga atop sa kubyerta gibo sa asul na torsido asin telang lana* na kulor purpura* na hali sa mga isla kan Elisa.+
8 An mga taga Sidon saka mga taga Arvad+ iyo an mga parasagwan mo.
An eksperto mong mga lalaki, O Tiro, iyo an mga tripulante mo.+
9 An eksperyensiyado* saka ekspertong mga lalaki kan Gebal+ iyo an nagsulat sa mga sugpunan kan mga tabla kan saimong barko.+
An gabos na barko sa dagat saka an saindang mga marinero nagpasiring sa saimo para makipagribayan nin mga produkto.
10 Kaiba sa saimong hukbo an mga lalaki kan Persia, Lud, asin Put,+ mga lalaking andam na makipaglaban.
Isinabit ninda sa saimo an saindang mga kalasag saka helmet, asin nagdara sinda saimo nin kamurawayan.
11 An mga lalaki kan Arvad na nasa hukbo mo nagpuwesto sa palibot kan saimong mga pader,
Asin mga pusuan na lalaki an nagbantay sa saimong mga tore.
Nagsabit sinda nin mga bilog na kalasag sa palibot kan saimong mga pader,
Asin ginibo nindang perpekto an kagayunan mo.
12 “‘“Nakipagnegosyo saimo an Tarsis+ dahil sa kadakulan kan saimong kayamanan.+ Irinibay ninda sa saimong mga produkto an saindang plata, lansang, lata, asin timga.+ 13 Nakipagnegosyo saimo an Javan, Tubal,+ asin Mesec;+ irinibay ninda sa saimong mga paninda an saindang mga uripon+ saka mga gamit na tanso. 14 Irinibay kan mga gikan* ni Togarma+ an saindang mga kabayo asin mula* sa saimong mga produkto. 15 Nakipagnegosyo saimo an mga taga Dedan;+ nagnegosyo para saimo an mga negosyante sa dakul na isla; nagtao sinda nin mga marpil+ asin kahoy na ebano* bilang tributo* saimo. 16 Nakipagnegosyo saimo an Edom dahil sa kadakulan kan saimong produkto. Nagtao sinda nin turkesa, telang lana na kulor purpura, telang may makukulor na burda, de-kalidad na tela, mga korales, asin mga rubi karibay kan mga produkto mo.
17 “‘“Nakipagnegosyo saimo an Juda saka an nasyon nin Israel; nagtao sinda nin trigo kan Minit,+ mga espesyal na kakanon, tangguli,+ lana, asin balsamo+ karibay kan mga produkto mo.+
18 “‘“Nakipagnegosyo saimo an Damasco+ dahil sa kadakulan kan produkto mo asin dahil sa gabos mong kayamanan; irinibay ninda an mga arak kan Helbon saka an telang lana kan Zahar.* 19 An Vedan saka an Javan na hali sa Uzal nagtao nin pinanday na lansang, kasia,* asin kania* karibay kan mga produkto mo. 20 Sinuplayan ka kan Dedan+ nin mga tela* na pangkamadero. 21 Nagnegosyo para saimo an mga Arabe saka an gabos na pamayo kan Kedar,+ na mga paratinda nin mga kordero, mga lalaking karnero, asin mga kanding.+ 22 An mga negosyante kan Sheba saka Raama+ nakipagnegosyo saimo; itinao ninda an gabos na pinakamarahay na klaseng pahamot, mamahalon na mga bato, asin bulawan karibay kan saimong mga produkto.+ 23 An Haran,+ Canne, Eden,+ saka an mga negosyante kan Sheba,+ Asur,+ asin Kilmad nakipagnegosyo saimo. 24 Sa saimong mga saudan, irinibay ninda an magagayon na bado, mga alikboy na gibo sa asul na materyales na may makukulor na burda, asin makukulor na karpet, na an gabos higot na nabubugkusan nin mga pisi.
25 An mga barko nin Tarsis+ an nagdadara kan saimong mga produkto,
Kaya napano ka nin kayamanan asin nagin kargado* sa katahawan kan dagat.
26 Dinara ka kan mga parasagwan mo pasiring sa dagat na may darakulaon na alon;
Rinapak ka kan duros na hali sa sirangan sa katahawan kan dagat.
27 An saimong kayamanan, mga produkto, mga paninda, mga marinero, asin mga tripulante,
An mga nagsusulat sa sugpunan kan mga tabla kan saimong barko, an mga negosyante mo,+ asin an gabos na parapakilaban+
—An enterong katiripunan* sa laog mo—
Malubog sinda gabos sa pusod* kan dagat sa aldaw kan saimong pagbagsak.+
28 Pag nagkururahaw an mga tripulante mo, an mga lugar sa gilid nin dagat makurubog-kubog.
29 An gabos na parasagwan, marinero, asin paradagat
Mabaraba sa saindang mga barko asin matindog sa daga.
30 Makururahaw sinda asin mahiribi nin makusog dahil saimo+
Mantang sinasabwagan ninda nin alpog an saindang payo asin nagliligid-ligid sa abo.
31 Kakalbuhon ninda an saindang payo asin masulot sinda nin telang sako;
Mahibi sinda nin grabe* dahil saimo asin matangis nin makusog.
32 Sa saindang pananangis, kakantahan ka ninda nin sarong panambitan asin tatangisan ka:
‘Siisay an arog kan Tiro, na ngunyan dai nang girong sa tahaw kan dagat?+
33 Pag nag-aabot an saimong mga produkto hali sa katahawan kan dagat, dakul kang napapaugmang banwaan.+
Nagin mayaman an mga hadi kan daga dahil sa saimong dakulon na kayamanan asin produkto.+
34 Ngunyan narapak ka sa katahawan kan dagat, sa hararom na katubigan,+
Asin an gabos mong produkto saka an banwaan mo luminubog kaiba mo.+
35 An gabos na nakaistar sa mga isla mapapaburarat sa saimo,+
Asin an saindang mga hadi matarakig sa takot+—mapupurisaw an saindang mga lalawgon.
36 An mga negosyante sa mga nasyon mapapataghoy dahil sa nangyari saimo.
An saimong katapusan magigin biglaan asin makatatakot,
Asin mawawara ka na sa gabos na panahon.’”’”+