Inot na Cronica

23 Kan si David gurang na asin nasa puro na kan saiyang buhay,* ginibo niyang hadi sa Israel an saiyang aking si Solomon.+ 2 Dangan tinipon niya an gabos na pamayo* kan Israel, an mga saserdote,+ asin an mga Levita.+ 3 Binilang an gabos na Levita na 30 anyos pataas;+ 38,000 sinda gabos. 4 An 24,000 sa sainda nagserbi bilang mga superbisor sa mga trabaho sa harong ni Jehova, 6,000 an nagserbing opisyal saka hukom,+ 5 asin 4,000 an bantay sa trangkahan,+ saka 4,000 an nag-uumaw+ ki Jehova paagi sa mga instrumento na manungod diyan sinabi ni David, “Ginibo ko an mga iyan para sa pagtao nin pag-umaw.”

6 Dangan inorganisar* sinda ni David sa mga dibisyon+ sigun sa kun kiisay na aki ni Levi sinda gikan: ki Gerson, Kohat, asin Merari.+ 7 Hali sa mga Gersonita, si Ladan asin Simei. 8 An tulong aki ni Ladan iyo si Jehiel na pamayo, si Zetam, asin Joel.+ 9 An tulong aki ni Simei iyo si Selomot, Haziel, asin Haran. Sinda an mga pamayo kan mga angkan na gikan ki Ladan. 10 Asin an mga aki ni Simei iyo si Jahat, Zina, Jeus, asin Berias. Sindang apat an mga aki ni Simei. 11 Si Jahat an pamayo asin si Zizah an ikaduwa. Pero huling diit sana an mga aking lalaki ni Jeus asin Berias, ibinilang sinda na saro sanang angkan na may saro sanang katungdan.

12 An apat na aki ni Kohat iyo si Amram, Izar,+ Hebron, asin Uziel.+ 13 An mga aki ni Amram iyo si Aaron+ asin Moises.+ Pero permanenteng isinuway si Aaron+ saka an saiyang mga aki tanganing pabanalon an Kabanal-banali, magdulot nin mga atang sa atubangan ni Jehova, maglingkod sa saiya, asin pirming bendisyunan sa ngaran niya an banwaan.+ 14 Kun manungod sa mga aki ni Moises, na lalaking lingkod kan tunay na Diyos, ibinilang sindang kaiba sa tribo nin mga Levita. 15 An mga aki ni Moises iyo si Gersom+ asin Eliezer.+ 16 Sa mga aki ni Gersom, si Sebuel+ an pamayo. 17 Sa mga gikan* ni Eliezer, si Rehabias+ an pamayo; mayo nin iba pang aking lalaki si Eliezer, pero dakulon an aking lalaki ni Rehabias. 18 Sa mga aki ni Izar,+ si Selomit+ an pamayo. 19 Sa mga aki ni Hebron, si Jerias an pamayo, an ikaduwa si Amarias, an ikatulo si Jahaziel, asin an ikaapat si Jekameam.+ 20 An mga aki ni Uziel+ iyo si Mikas, an pamayo, asin an ikaduwa si Issias.

21 An mga aki ni Merari iyo si Mahli asin Musi.+ An mga aki ni Mahli iyo si Eleazar asin Kis. 22 Nagadan si Eleazar, pero mayo siyang aking lalaki, mga aking babayi sana. Kaya inagom sinda kan mga aking lalaki ni Kis, na mga paryente* ninda. 23 An tulong aki ni Musi iyo si Mahli, Eder, asin Jeremot.

24 Sinda an mga aki ni Levi na irinehistro sigun sa saindang mga angkan, sa mga pamayo kan saindang mga angkan. Binilang an mga Levita na 20 anyos pataas asin ilinista an mga pangaran para maglingkod sa harong ni Jehova. 25 Huling nagsabi si David: “Tinawan ni Jehova na Diyos kan Israel nin kapahingaluan an saiyang banwaan,+ asin mag-iirok siya sa Jerusalem sagkod lamang.+ 26 Asin dai na man kaipuhan kan mga Levita na darahon an tabernakulo o an arin man sa mga kagamitan na ginagamit sa paglilingkod diyan.”+ 27 Kaya, sigun sa huring mga itinugon ni David, binilang an mga Levita na 20 anyos pataas. 28 An katungdan ninda iyo na magtabang sa mga aki ni Aaron+ sa paglilingkod sa harong ni Jehova, sa pag-asikaso sa mga patyo+ saka sa mga kuwartong kakanan, sa pagdalisay kan lambang banal na bagay, asin sa ano man na gibuhon na kaipuhan sa paglilingkod sa harong kan tunay na Diyos. 29 Nagtatabang man sinda sa pagpreparar kan patong-patong na tinapay,*+ kan pinong harina para sa dulot na tipasi, kan mahimpis na mga tinapay na daing lebadura,+ kan mga tinapay na pigluluto sa lapnad na lutuan, asin kan masa nin harina na sinalakan nin lana.+ Nagtatabang man sinda sa gabos na ginigibong pagtimbang asin pagsukol. 30 Nagtitindog sinda duman kada aga+ tanganing magpasalamat asin mag-umaw ki Jehova, asin siring man sa banggi.+ 31 Nagtatabang sinda pag nagdudulot ki Jehova nin mga atang na pigtututong kun Sabbath,+ kun bagong bulan,+ asin kun panahon nin kapiyestahan,+ sigun sa bilang na hinahagad sa mga regulasyon may koneksiyon sa mga ini. Asin regular nindang ginigibo iyan sa atubangan ni Jehova. 32 Ginigibo man ninda an mga obligasyon ninda sa tolda nin pakipagtagbuan saka sa banal na lugar asin an obligasyon nindang magtabang sa saindang mga tugang, na mga aki ni Aaron, sa paglilingkod sa harong ni Jehova.