Hukom

3 Ini an mga nasyon na pinabayaan ni Jehova na magdanay tanganing paagi sa mga ini mapurbaran an gabos sa Israel na dai pa lamang nakaeksperyensiya nin giyera sa Canaan+ 2 (tanganing makaeksperyensiya nin giyera an masurunod na mga henerasyon kan mga Israelita, an mga dai pa lamang nakaeksperyensiya kaiyan): 3 an limang tagapamahala kan mga Filisteo,+ asin an gabos na Canaanita, an mga Sidonio,+ asin an mga Hivita+ na nakaistar sa Bukid nin Lebanon+ puon sa Bukid nin Baal-hermon sagkod sa Lebo-hamat.*+ 4 Paagi sa mga nasyon na ini, mapupurbaran an Israel kun baga susunudon kan Israel an mga tugon ni Jehova na itinao niya sa saindang mga ama paagi ki Moises.+ 5 Kaya nag-istar an mga Israelita kaiba kan mga Canaanita,+ mga Hiteo, mga Amorita, mga Perizita, mga Hivita, saka mga Jebusita. 6 Inagom ninda an mga aking babayi kan mga nasyon na iyan asin ipinaagom an mga aki nindang babayi sa mga aking lalaki kan mga iyan, asin nagpuon sindang maglingkod sa mga diyos kan mga iyan.+

7 Kaya ginibo kan mga Israelita kun ano an maraot sa paghiling ni Jehova, asin liningawan ninda si Jehova na saindang Diyos asin naglingkod sinda sa mga Baal+ saka sa mga sagradong poste.*+ 8 Huli kaini, naanggot na marhay si Jehova sa Israel, asin itinao* niya sinda sa kamot ni Cusan-risataim na hadi kan Mesopotamia.* Nagserbi an mga Israelita ki Cusan-risataim nin walong taon. 9 Kan mag-apod an mga Israelita ki Jehova tanganing maghagad nin tabang,+ nagnombra si Jehova nin sarong paraligtas para iligtas an mga Israelita,+ si Otniel+ na aki ni Kenaz, na nguhod na tugang ni Caleb. 10 Uminabot sa saiya an espiritu ni Jehova,+ asin siya an nagin hukom kan Israel. Kan makipaglaban siya, itinao ni Jehova sa kamot niya si Cusan-risataim na hadi kan Mesopotamia* kaya nadaog niya si Cusan-risataim. 11 Pagkatapos kaiyan, nagkaigwa nin kapahingaluan* sa kadagaan sa laog nin 40 taon. Dangan nagadan si Otniel na aki ni Kenaz.

12 Tapos ginibo na naman kan mga Israelita an maraot sa paghiling ni Jehova.+ Kaya pinabayaan ni Jehova na madaog an Israel ni Eglon na hadi kan Moab,+ huling ginibo ninda kun ano an maraot sa paghiling ni Jehova. 13 Apuwera kaiyan, nakipag-alyansa si Eglon sa mga Ammonita+ saka sa mga Amalekita.+ Sinalakay ninda an Israel asin sinakop an siyudad nin mga puon nin palma.+ 14 Nagserbi an mga Israelita ki Eglon na hadi kan Moab sa laog nin 18 taon.+ 15 Dangan nag-apod an mga Israelita ki Jehova tanganing maghagad nin tabang,+ kaya nagnombra si Jehova para sa sainda nin sarong paraligtas,+ si Ehud+ na aki ni Gera, sarong Benjaminita+ na walahon.+ Pag-abot nin panahon, ipinadara sa saiya kan mga Israelita an tributo* para ki Eglon na hadi kan Moab. 16 Naggibo si Ehud nin sarong espada na mag-inibong an tarom asin sarong maniko* an laba, tapos isinukbit niya iyan sa tuo niyang paa sa irarom kan saiyang bado. 17 Dangan itinao niya an tributo sa hadi kan Moab na si Eglon, na sarong matabaon na lalaki.

18 Kan maitao na ni Ehud an tributo, naghali na siya kaiba an mga nagdara kan tributo. 19 Pero kan makaabot sinda sa mga inukit na imahen* harani sa Gilgal,+ buminalik siya sa hadi asin nagsabi: “Igwa akong sekretong mensahe para saimo mahal na hadi.” Kaya nagsabi an hadi: “Silensiyo!” Huli kaiyan, nagharali an saiyang mga suruguon. 20 Kaya nagrani sa saiya si Ehud mantang solo siyang nakatukaw sa laog kan saiyang mapreskong kuwarto sa bubungan. Tapos nagsabi si Ehud: “May mensahe ako para saimo hali sa Diyos.” Kaya buminuhat siya sa saiyang trono.* 21 Dangan hinugkot ni Ehud an espada sa tuo niyang paa gamit an wala niyang kamot asin isinaksak iyan sa tulak kan hadi. 22 Nakalaog sa tulak an bilog na espada pati an polo kaiyan, asin natahuban kan taba an tarom kan espada, ta dai niya hinugkot an espada sa tulak kaini, asin nagruluwas an mga udo kaini. 23 Luminuwas si Ehud sa portiko;* isinara niya an mga pinto kan kuwarto sa bubungan saka binaratan an mga iyan. 24 Pagkahali niya, nagbaralik an mga lingkod kan hadi asin nahiling ninda na nakabarat an mga pinto kan kuwarto sa bubungan. Kaya nagsabi sinda: “’Baad nagkakasilyas siya* sa pinakalaog na kuwarto.” 25 Nagparahalat sinda sagkod na dai na sinda mapamugtak, asin kan mahiling ninda na dai niya pa man giraray pigbubukasan an mga pinto kan kuwarto, kinua ninda an liyabe asin binukasan iyan tapos nahiling ninda an saindang kagurangnan na nakabulagta sa salog* asin gadan na!

26 Nagdulag si Ehud mantang naghahalat-halat sinda, asin nangagi siya sa may mga inukit na imahen*+ asin ligtas siyang nakaabot sa Seira. 27 Pag-abot niya, nagpatanog siya nin hamudyong+ sa kabukidan nin Efraim;+ tapos nagbaraba an mga Israelita kaiba niya hali sa kabukidan, asin siya an nanginot sa sainda. 28 Dangan sinabi niya sa sainda: “Magsunod kamo sako, huling itinao na ni Jehova sa saindong kamot an saindong mga kalaban, an mga Moabita.” Kaya nagsunod sinda sa saiya, asin nagibo nindang magpuwesto sa mga pigbabalyuhan na hababaw na parte kan Jordan para dai makadulag an mga Moabita; dai ninda pinabayaan an siisay man sa sainda na makabalyo. 29 Mga 10,000 na Moabita an ginaradan ninda kaidto,+ gabos makukusog asin mga pusuan na lalaki; mayo ni saro an nakadulag.+ 30 Kaya nadaog kan Israel an Moab kan aldaw na idto; asin nagkaigwa nin kapahingaluan* sa kadagaan sa laog nin 80 taon.+

31 An suminunod sa saiya iyo si Samgar+ na aki ni Anat, na guminadan nin 600 na lalaking Filisteo+ gamit an sarong mapanas na sugkod na pampasunod sa baka;+ ilinigtas man niya an Israel.