Inot na Samuel

22 Kaya hali duman, nagdulag si David+ pasiring sa kuweba sa Adulam.+ Kan mabaretaan iyan kan saiyang mga tugang na lalaki asin kan bilog na pamilya* kan saiyang ama, dinumanan ninda siya. 2 Asin an gabos na nasasakitan, may pagkakautang, saka may reklamo* nagduruman sa saiya, asin siya an nagin pamayo ninda. Mga 400 na lalaki an nag-iba sa saiya.

3 Dangan hali duman, nagpasiring si David sa Mizpe sa Moab asin sinabi niya sa hadi kan Moab:+ “Tuguti tabing magpirmi nguna digdi sa saindo an sakuyang ama saka ina sagkod na maaraman ko kun ano an gigibuhon nin Diyos para sa sako.” 4 Kaya iwinalat niya sinda sa poder kan hadi kan Moab, asin duman nguna sinda nagpirmi sa bilog na panahon na yaon si David sa pinagtataguan niya.+

5 Pag-abot nin panahon, sinabi ki David kan propetang si Gad:+ “Dai ka magpirmi sa pinagtataguan mo. Magduman ka sa daga nin Juda.”+ Kaya naghali si David asin nagpasiring sa kadlagan nin Heret.

6 Nabaretaan ni Saul na igwang nakahiling kun hain si David asin an mga tawuhan kaini. Nagtutukaw kaidto si Saul sa sirong nin puon nin tamarisko sa sarong bulod sa Gibeah+ mantang kapot niya an saiyang garod asin nakatirindog sa palibot niya an gabos niyang lingkod. 7 Dangan sinabi ni Saul sa saiyang mga lingkod na nakapalibot sa saiya: “Magdangog tabi kamo mga Benjaminita. Ano, sa hiling nindo tatawan kamo gabos kan aki ni Jesse+ nin mga uma saka mga ubasan? Nonombrahan niya daw kamo gabos na magin mga namamayo nin manangribo asin mga namamayo nin mananggatos na suldados?+ 8 Nagkurumplutan kamo gabos laban sa sako! Mayo man lang sa saindo an nagsumbong sako kan an aki ko makipagtipan sa aki ni Jesse!+ Mayo sa saindo an nahirak sako asin nagsumbong na sinusutsutan palan kan sakuyang aki an lingkod ko tanganing kalabanon* ako, arog kan ginigibo niya sako ngunyan.”

9 Dangan nagsimbag si Doeg+ na Edomita, na yaon duman bilang an namamahala sa mga lingkod ni Saul:+ “Nahiling kong nag-abot sa Nob an aki ni Jesse asin dinumanan si Ahimelec na aki ni Ahitub.+ 10 Asin naghapot si Ahimelec ki Jehova para sa saiya asin tinawan niya siya nin kakanon. Itinao pa ngani niya sa saiya an espada ni Goliat na Filisteo.”+ 11 Ipinaapod tulos kan hadi an saserdoteng si Ahimelec na aki ni Ahitub asin an gabos na saserdote sa pamilya* kan saiyang ama na yaon sa Nob. Kaya gabos sinda nagduruman sa hadi.

12 Sinabi ni Saul: “Magdangog ka tabi, aki ni Ahitub!” Nagsimbag siya: “Iyo tabi, kagurangnan.” 13 Sinabi ni Saul sa saiya: “Taano ta nagkurumplutan kamo laban sako, ika saka an aki ni Jesse? Taano ta tinawan mo siya nin tinapay, nin espada, saka naghapot ka pa sa Diyos para sa saiya? Kinokontra niya ako saka kinakalaban,* arog kan ginigibo niya ngunyan.” 14 Nagsimbag si Ahimelec sa hadi: “Bakong sa gabos mong mga lingkod, si David na an pinakamapagtitiwalaan mo?*+ Manugang baga siya kan hadi+ tapos siya pa an namamayo kan mga guwardiya mo saka iginagalang siya sa saimong harong.+ 15 Asin bako ini an inot na pagkakataon na naghapot ako sa Diyos para sa saiya.+ Kaya dai ko nanggad magigibo an sinasabi nindong iyan! Dai man lugod pagdudahan kan hadi an saiyang lingkod asin an bilog na pamilya kan sakong ama, huling mayo man lamang nin aram an saimong lingkod maski sarong bagay manungod digdi.”+

16 Alagad sinabi kan hadi: “Dapat kang magadan+ Ahimelec, ika asin an bilog na pamilya kan saimong ama.”+ 17 Kaya sinabi kan hadi sa mga guwardiyang* nakapalibot sa saiya: “Dali, garadanon nindo an mga saserdote ni Jehova, huling kuminampi sinda ki David! Aram man nindang nagdudulag siya, pero mayo sindang pigsabi sako!” Pero habo kan mga lingkod kan hadi na garadanon an mga saserdote ni Jehova. 18 Kaya sinabi kan hadi ki Doeg:+ “Ika, dali. Gadanon mo an mga saserdote!” Dali-daling dinaguso asin ginadan ni Doeg na Edomita+ an mga saserdote. Asin 85 lalaking nakasulot nin efod na telang lino an ginadan niya kan aldaw na idto.+ 19 Ginaradan man niya paagi sa espada an mga nakaistar sa Nob+ na siyudad nin mga saserdote, an mga lalaki saka mga babayi, an mga aki saka mga umboy, pati mga torong baka, mga asno, saka mga karnero.

20 Alagad nakadulag si Abiatar,+ saro sa mga aki ni Ahimelec na aki ni Ahitub, asin nagduman siya ki David. 21 Ibinareta ni Abiatar ki David: “Ginadan ni Saul an mga saserdote ni Jehova.” 22 Kaya sinabi ni David ki Abiatar: “Kan aldaw na idto,+ kan mahiling kong yaon duman si Doeg na Edomita, aram ko nang masumbong siya ki Saul. Ako an dapat na basulon sa pagkagadan kan bilog na pamilya kan saimong ama. 23 Digdi ka na sana sako, ta an gustong gumadan sa saimo* iyo man an gustong gumadan sa sako.* Dai ka matakot, akong bahala saimo.”+