Inot na Samuel

31 Nakipaglaban sa Israel an mga Filisteo.+ Nagdurulag sa mga Filisteo an mga suldados kan Israel, asin dakul sa mga ini an nagkagaradan sa Bukid nin Gilboa.+ 2 Linapag kan mga Filisteo si Saul asin an saiyang mga aking lalaki, asin nagadan kan mga Filisteo an mga aki ni Saul+ na si Jonathan,+ Abinadab, asin Malki-sua. 3 Nagin matindi an pakikipaglaban ninda ki Saul, tapos nahiling siya kan mga parapana. Pinana ninda siya asin grabe an nagin tama niya.+ 4 Dangan sinabi ni Saul sa paradara kan saiyang pangalasag: “Hugkuta an espada mo tapos saksakon mo ako tanganing dai ako abutan kan mga bakong turing lalaking iyan+ asin saksakon ako saka pasakitan ako.”* Pero habo ining gibuhon kan paradara kan saiyang pangalasag ta natakot siyang marhay. Kaya kinua ni Saul an saiyang espada asin dinaplaan an panas kaiyan.+ 5 Kan mahiling kan paradara kan pangalasag na gadan na si Saul,+ dinaplaan man kaini an panas kan sadiri kaining espada asin nagadan kaiba niya. 6 Kaya magkairibanan na nagadan kan aldaw na iyan si Saul, an saiyang tulong aki, an paradara kan saiyang pangalasag, asin an gabos niyang tawuhan.+ 7 Kan mahiling kan mga Israelita na nakaistar sa rehiyon kan kababan* asin sa rehiyon kan Jordan na nagdurulag na an mga suldados kan Israel asin nagadan na si Saul saka an saiyang mga aki, binarayaan ninda an mga siyudad asin nagdurulag;+ dangan nag-arabot an mga Filisteo asin sinda an nag-iristar diyan.

8 Kan suminunod na aldaw, kan dinumanan kan mga Filisteo an mga nagadan ninda tanganing samsaman, nahiling ninda sa Bukid nin Gilboa si Saul asin an saiyang tulong aki na gadan na.+ 9 Kaya pinugutan ninda siya asin kinurua ninda an sulot niyang mga pangalasag asin nagpadara sinda nin mensahe sa bilog na daga kan mga Filisteo tanganing ibareta ini+ sa mga harong* kan saindang mga idolo+ asin sa mga tawo. 10 Dangan ilinaog ninda sa harong kan mga imahen ni Astoret an saiyang mga pangalasag, asin ipinako ninda an saiyang bangkay sa pader kan Bet-san.+ 11 Kan mabaretaan kan mga nakaistar sa Jabes-gilead+ an ginibo kan mga Filisteo ki Saul, 12 nagharali an gabos nindang parapakilaban asin bilog na bangging nagbaklay dangan tinanggal sa pader kan Bet-san an bangkay ni Saul asin kan saiyang mga aki. Nagbalik sinda sa Jabes asin duman sinulo an mga bangkay. 13 Dangan kinua ninda an mga tulang+ asin ilinubong sa mismong tungod kan puon nin tamarisko sa Jabes,+ tapos nag-ayuno sinda sa laog nin pitong aldaw.