Ezekiel

14 Asin nag-abot an iba sa kamagurangan kan Israel asin nagtukaw sa atubangan ko.+ 2 Dangan nag-abot sa sako an tataramon ni Jehova, na sinasabi: 3 “Aki nin tawo, determinado an mga lalaking ini na sumunod sa saindang mga makababalding idolo,* asin nagbugtak sinda nin singkugan na nagigin dahilan na magkasala an banwaan. Dapat ko daw sindang tugutan na maghapot sa sako?+ 4 Ngunyan makipag-ulay ka sa sainda asin sabihon mo sa sainda, ‘Ini an sinabi kan Soberanong Kagurangnan na Jehova: “Kun an sarong Israelita determinadong sumunod sa saiyang mga makababalding idolo asin nagbugtak siya nin singkugan na nagigin dahilan na magkasala an banwaan tapos nag-abot siya para maghapot sa sarong propeta, ako, si Jehova, an matao saiya nin maninigong simbag uyon sa kadakulan kan saiyang mga makababalding idolo. 5 Huli ta papaabutan ko nin takot an puso kan banwaan nin Israel* dahil gabos sinda ruminayo sa sako asin nagsunod sa saindang mga makababalding idolo.”’+

6 “Kaya sabihan mo an banwaan nin Israel, ‘Ini an sinabi kan Soberanong Kagurangnan na Jehova: “Magbalik kamo sako asin talikdan nindo an saindong mga makababalding idolo, asin isikwal nindo an gabos nindong makababalding gibo-gibo.+ 7 Huli ta kun an siisay man na Israelita o dayuhan na residente na nakaistar sa Israel rumayo sako asin determinadong sumunod sa saiyang mga makababalding idolo asin nagbugtak siya nin singkugan na nagigin dahilan na magkasala an banwaan tapos nag-abot siya para maghapot sa sakuyang propeta,+ ako, si Jehova, ako mismo an masimbag sa saiya. 8 Isisikwal ko an* tawong iyan asin gigibuhon ko siyang sarong patanid saka sarong kasabihan, asin gagadanon ko siya;+ asin mamimidbid nanggad nindo na ako si Jehova.”’

9 “‘Pero kun nalansi an propeta asin nagsimbag, ako, si Jehova, an naglansi sa propetang iyan.+ Dangan uunaton ko an sakuyang kamot laban sa saiya asin pupuhuon ko siya sa sakuyang banwaan na Israel. 10 Maninimbag sinda sa saindang pagkakasala; an pagkakasala kan naghahapot magigin kapareho kan pagkakasala kan propeta, 11 tanganing mapundo na an pagrayo sa sako kan banwaan nin Israel asin an pagramog ninda sa saindang sadiri dahil sa gabos nindang paglapas. Asin sinda magigin sakuyang banwaan, asin ako magigin Diyos ninda,’+ an sabi kan Soberanong Kagurangnan na Jehova.”

12 Asin nag-abot giraray sa sako an tataramon ni Jehova, na sinasabi: 13 “Aki nin tawo, kun an sarong nasyon magkasala sa sako paagi sa pagigin bakong maimbod, uunaton ko an sakuyang kamot laban diyan asin rarauton an suplay kaiyan nin kakanon,*+ asin mapaabot ako diyan nin tiggutom+ asin gagaradanon an mga tawo saka mga hayop diyan.”+ 14 “‘Maski pa yaon diyan an tulong lalaking ini—si Noe,+ Daniel,+ asin Job+—sadiri* lang ninda an saindang maililigtas dahil sa pagigin matanos ninda,’+ an sabi kan Soberanong Kagurangnan na Jehova.”

15 “‘O kun magpadara ako diyan nin mababangis na hayop asin garadanon kan mga iyan an dakul na tawo* diyan saka gibuhon ko iyan na tiwangwang na dai inaagihan nin siisay man na tawo dahil sa mga layas na hayop,+ 16 isinusumpa ko sa sadiri ko,’* an sabi kan Soberanong Kagurangnan na Jehova, ‘maski pa yaon diyan an tulong lalaking ini, dai ninda maililigtas an saindang mga aking lalaki saka mga aking babayi; sadiri lang ninda an maililigtas ninda, asin magigin tiwangwang an nasyon na iyan.’”

17 “‘O kun magpadara ako nin espada laban sa nasyon na iyan+ asin magsabi: “Paagiha an sarong espada sa bilog na nasyon,” asin gadanon kaiyan an mga tawo saka mga hayop diyan,+ 18 maski pa yaon diyan an tulong lalaking ini, isinusumpa ko sa sadiri ko,’* an sabi kan Soberanong Kagurangnan na Jehova, ‘dai ninda maililigtas an saindang mga aking lalaki saka mga aking babayi; sadiri lang ninda an maililigtas ninda.’”

19 “‘O kun magpaabot ako nin damat sa nasyon na iyan+ asin iula ko diyan an sakuyang grabeng kaanggutan paagi sa paggadan diyan sa mga tawo saka mga hayop, 20 maski pa yaon diyan si Noe,+ Daniel,+ asin Job,+ isinusumpa ko sa sadiri ko,’* an sabi kan Soberanong Kagurangnan na Jehova, ‘dai ninda maililigtas an saindang mga aking lalaki saka mga aking babayi; sadiri* lang ninda an maililigtas ninda dahil sa pagigin matanos ninda.’”+

21 “Huli ta ini an sinabi kan Soberanong Kagurangnan na Jehova: ‘Arog kaiyan an mangyayari pag an sakuyang apat na pagpadusa*+—an espada, tiggutom, mabangis na hayop, asin damat+—ipaabot ko na sa Jerusalem para gadanon an mga tawo saka mga hayop diyan.+ 22 Alagad, an ibang matatada makakadulag asin dadarahon sa luwas,+ mga aking lalaki saka babayi. Madiyan sinda sa saindo, asin pag nahiling nindo an saindang mga dalan saka mga gibo-gibo, siguradong dai na kamo mapupurisaw sa kapahamakan na ipinaabot ko sa Jerusalem, sa gabos na ginibo ko diyan.’”

23 “‘Dai na kamo mapupurisaw pag nahiling nindo an saindang mga dalan saka mga gibo-gibo, asin maaaraman nindo na may dahilan kaya ginibo ko an dapat kong gibuhon diyan,’+ an sabi kan Soberanong Kagurangnan na Jehova.”