Bilang

34 Asin sinabi pa ni Jehova ki Moises: 2 “Sabihon mo an mga instruksiyon na ini sa mga Israelita: ‘Pag naglaog na kamo sa daga nin Canaan,+ iyo ini an mga linderos kan Canaan, an daga na mapapasaindo bilang saindong mana.+

3 “‘An linderos nindo sa timog mapuon sa kaawagan nin Zin na kataid kan Edom, asin an linderos nindo sa timog sa parteng sirangan mapuon sa puro kan Dagat na Asin.*+ 4 Dangan masiko iyan pasiring sa timog kan bakilid nin Akrabim+ asin mapadagos sa Zin, asin an magigin puro kaiyan nasa timog kan Kades-barnea.+ Tapos, mapasiring iyan sa Hazar-adar+ asin mapadagos sa Azmon. 5 Asin masiko an linderos sa Azmon pasiring sa Sulugan na Kababan* nin Ehipto, asin an magigin puro kaiyan iyo an Dagat.*+

6 “‘An linderos nindo sa sulnupan iyo an baybayon kan Dakulang Dagat.* Iyo iyan an magigin linderos nindo sa sulnupan.+

7 “‘Asin ini an magigin linderos nindo sa norte: Puon sa Dakulang Dagat markahan nindo an saindong linderos pasiring sa Bukid nin Hor. 8 Hali sa Bukid nin Hor markahan nindo an saindong linderos pasiring sa Lebo-hamat,*+ asin an magigin puro kan linderos iyo an Zedad.+ 9 Asin masagkod an linderos sa Zifron, asin an magigin puro kaiyan iyo an Hazar-enan.+ Iyan an magigin linderos nindo sa norte.

10 “‘Dangan hali sa Hazar-enan markahan nindo an saindong linderos pasiring sa Sefam, iyo iyan an linderos nindo sa sirangan. 11 Hali sa Sefam masagkod an linderos sa Ribla na nasa sirangan kan Ain, tapos mapaibaba an linderos asin mangangagi sa kabubuldan sa parteng sirangan kan Dagat nin Kineret.*+ 12 Dangan mapasiring an linderos sa Jordan, tapos an magigin puro kaiyan iyo an Dagat na Asin.+ Iyan an magigin daga nindo+ saka an mga linderos sa palibot kaiyan.’”

13 Kaya ininstruksiyunan ni Moises an mga Israelita, na sinasabi: “Ini an daga na pagbabaranga-bangaan nindo bilang saindong mana paagi sa burunutan,+ arog kan ipinagbuot ni Jehova na itao sa siyam may kabangang tribo. 14 Huli ta an tribo ni Ruben, an tribo ni Gad, asin an kabanga kan tribo ni Manases nag-ako na kan saindang mana.+ 15 An duwa may kabangang tribo nag-ako na kan saindang mana sa rehiyon sa sirangan kan Jordan, sa kahampang kan Jerico.”+

16 Sinabi pa ni Jehova ki Moises: 17 “Ini an mga pangaran kan mga lalaki na mabanga-banga kan daga na magigin sadiri nindo: si Eleazar+ na saserdote asin si Josue+ na aki ni Nun. 18 Asin magkua kamo nin sarong pamayo sa kada tribo na matabang sa pagbanga-banga kan mamanahon nindong daga.+ 19 Ini an mga pangaran kan mga lalaki: sa tribo ni Juda,+ si Caleb+ na aki ni Jefunne; 20 sa tribo kan mga aki ni Simeon,+ si Semuel na aki ni Amihud; 21 sa tribo ni Benjamin,+ si Elidad na aki ni Kislon; 22 sa tribo kan mga aki ni Dan,+ an pamayo na si Buki na aki ni Jogli; 23 sa mga aki ni Jose+ hali sa tribo kan mga aki ni Manases,+ an pamayo na si Haniel na aki ni Efod; 24 hali sa tribo kan mga aki ni Efraim,+ an pamayo na si Kemuel na aki ni Siftan; 25 sa tribo kan mga aki ni Zebulon,+ an pamayo na si Elizafan na aki ni Parnac; 26 sa tribo kan mga aki ni Isacar,+ an pamayo na si Paltiel na aki ni Azan; 27 sa tribo kan mga aki ni Aser,+ an pamayo na si Ahihud na aki ni Selomi; 28 sa tribo kan mga aki ni Neftali,+ an pamayo na si Pedahel na aki ni Amihud.” 29 Sinda an mga pinagbutan ni Jehova na magbanga-banga kan daga nin Canaan para sa mga Israelita.+