Ikaduwang Cronica

10 Nagpasiring si Rehoboam sa Sekem+ huling nagduruman sa Sekem an bilog na Israel tanganing gibuhon siyang hadi.+ 2 Kan mabaretaan ini ni Jeroboam+ na aki ni Nebat (yaon pa siya kaidto sa Ehipto huling nagdulag siya pasiring duman dahil ki Hading Solomon),+ tulos na nagbalik si Jeroboam hali sa Ehipto. 3 Dangan ipinasundo ninda siya, asin nagpasiring si Jeroboam asin an bilog na Israel ki Rehoboam asin nagsabi sa saiya: 4 “Pinagabat kan saimong ama an samong sakal.+ Pero kun pagianon mo an masakit na mga patrabaho sa samo kan saimong ama saka an magabat na sakal* na ibinugtak niya sa samo, maglilingkod kami sa saimo.”

5 Sinabi niya sa sainda: “Magbalik kamo sako pakalihis nin tulong aldaw.” Kaya nagpuruli na sinda.+ 6 Dangan kinonsulta ni Hading Rehoboam an mga gurang na lalaki* na naglilingkod sa saiyang ama na si Solomon kan ini nabubuhay pa. Hinapot niya sinda: “Ano an maisusuhestiyon nindong isisimbag ko sa mga tawong ini?” 7 Nagsimbag sinda: “Kun magigin marahay ka sa mga tawong ini asin mapauyunan mo sinda saka kun pabor sa sainda an isisimbag mo, danay sindang maglilingkod sa saimo.”

8 Alagad dai niya sinunod an isinuhestiyon sa saiya kan mga gurang na lalaki,* asin kinonsulta niya an mga hoben na lalaking kagurubay niya, na ngunyan mga lingkod na niya.+ 9 Hinapot niya sinda: “Ano an maisusuhestiyon nindong isisimbag ta sa mga tawong ini na nagsabi sa sako, ‘Pagianon mo an sakal na ibinugtak sa samo kan saimong ama’?” 10 Sinabi sa saiya kan mga hoben na lalaking kagurubay niya: “Para sa mga tawong nagsabi sa saimo, ‘Pinagabat kan saimong ama an samong sakal, pero dapat mong pagianon ini para sa samo,’ ini an sabihon mo sa sainda, ‘Mayo lamang sa gigis ko an ginibo sa saindo kan sakong ama.* 11 Kun binugtakan kamo kan sakong ama nin magabat na sakal, dudugangan ko pa iyan. Kun pinadusahan kamo kan sakong ama gamit an latigo, gigibuhon ko iyan gamit an latigong may mga tusok-tusok.’”

12 Pakalihis nin tulong aldaw, nagbalik ki Rehoboam si Jeroboam asin an gabos na iba pa, arog kan sinabi kan hadi sa sainda: “Magbalik kamo sako pakalihis nin tulong aldaw.”+ 13 Pero malanit an nagin simbag kan hadi sa sainda. Sa siring, dai sinunod ni Hading Rehoboam an isinuhestiyon sa saiya kan mga gurang na lalaki.* 14 Arog kan isinuhestiyon sa saiya kan mga hoben na lalaki, sinabi niya sa sainda: “Papagabaton ko an saindong sakal, asin dudugangan ko pa iyan. Kun pinadusahan kamo kan sakong ama gamit an latigo, gigibuhon ko iyan gamit an latigong may mga tusok-tusok.” 15 Kaya dai dinangog kan hadi an mga tawo huling an tunay na Diyos an nagpangyari kaini+ tanganing mautob an mensahe ni Jehova ki Jeroboam na aki ni Nebat na sinabi Niya paagi ki Ahias+ na taga Shilo.

16 Huling habong magdangog sa bilog na Israel* an hadi, nagsimbag sinda sa hadi: “Mayo kaming kahirasan ki David! Mayo kaming mana sa aki ni Jesse. Magbaralik an kada saro sa saiyang mga diyos, O Israel! Bahala ka na sa mga gikan* mo, David.”+ Kaya nagpuruli na an bilog na Israel sa saindang mga harong.*+

17 Pero padagos pang naghadi si Rehoboam sa mga Israelitang nakaistar sa mga siyudad kan Juda.+

18 Dangan isinugo ni Hading Rehoboam si Hadoram+ na namamayo sa mga inobligar na magtrabaho para sa hadi, alagad ginarapo siya kan mga Israelita sagkod na siya magadan. Nagibo ni Hading Rehoboam na makasakay sa saiyang karwahe kaya nakadulag siya pasiring sa Jerusalem.+ 19 Asin padagos na nagrebelde an mga Israelita sa dinastiya* ni David sagkod sa aldaw na ini.