Ikaduwang Cronica

35 Kan ika-14 aldaw kan inot na bulan,+ nagselebrar si Josias nin Paskuwa+ para ki Jehova sa Jerusalem, asin binuno ninda an pang-atang sa Paskuwa.+ 2 Iinasignar niya an mga saserdote sa saindang mga katungdan asin pinakusog an buot ninda na gibuhon an saindang paglilingkod sa harong ni Jehova.+ 3 Dangan sinabi niya sa mga Levita, na mga paratukdo sa bilog na Israel+ asin mga banal ki Jehova: “An banal na Kaban ibugtak nindo sa harong na itinugdok ni Solomon na aki ni David na hadi kan Israel;+ dai na nindo ini papasanon.+ Maglingkod kamo ngunyan ki Jehova na saindong Diyos asin sa saiyang banwaan na Israel. 4 Asin mag-andam kamong maglingkod sigun sa saindong mga angkan asin sigun sa saindong mga dibisyon, bilang pagsunod sa isinurat ni Hading David+ kan Israel asin kan saiyang aking si Solomon.+ 5 Magtirindog kamo sa banal na lugar na nakagrupo sigun sa mga angkan kan banwaan,* na saindong mga tugang; sa kada angkan dapat may sarong grupo nin pamilya nin mga Levita na maglilingkod sa sainda. 6 Bunuon nindo an pang-atang sa Paskuwa+ asin pabanalon an saindong sadiri saka mag-andam kamo para sa saindong mga tugang tanganing magibo nindo an sinabi ni Jehova paagi ki Moises.”

7 Nagkontribwir nin mga aripumpon si Josias para sa banwaan bilang pang-atang sa Paskuwa kan gabos na yaon duman; 30,000 gabos iyan na lalaking kordero asin lalaking ugbon na kanding. Nagkontribwir man siya nin 3,000 na baka. Hali iyan gabos sa mismong pagsadiri kan hadi.+ 8 Nagkontribwir man an saiyang mga pamayo* nin mga iaatang bilang gikan-sa-buot na dulot para sa banwaan, sa mga saserdote, saka sa mga Levita. Si Hilkias,+ Zacarias, asin Jehiel, na mga lider sa harong kan tunay na Diyos, nagtao sa mga saserdote nin 2,600 na pang-atang sa Paskuwa asin 300 na baka. 9 Si Conanias asin an tugang niyang si Semaias asin Netanel, kaiba si Hasabias, Jeiel, asin Jozabad, na mga pamayo kan mga Levita, nagkontribwir sa mga Levita nin 5,000 na pang-atang sa Paskuwa asin 500 na baka.

10 Natapos an mga preparasyon, asin nagtirindog an mga saserdote sa kanya-kanya nindang puwesto asin an mga Levita sigun sa kanya-kanya nindang dibisyon,+ arog kan ipinagbuot kan hadi. 11 Binuno ninda an mga pang-atang sa Paskuwa,+ asin iwinirik kan mga saserdote an dugo na itinatao ninda sa sainda,+ mantang inaanitan kan mga Levita an mga hayop.+ 12 Dangan, ihinanda ninda an mga dulot na pigtututong para maidistribwir an mga ini sa banwaan, na nakagrupo sigun sa angkan, tanganing maiatang an mga ini ki Jehova arog kan nakasurat sa libro ni Moises; arog man kaiyan an ginibo ninda sa mga baka. 13 Linuto* ninda sa ibabaw kan kalayo an pandulot sa Paskuwa uyon sa kinaugalian;+ asin linuto ninda sa mga kaldero, mga kawa, asin mga kawali an banal na mga dulot. Pagkatapos, dali-dali nindang dinara ini sa banwaan. 14 Dangan naghanda man sinda nin pang-atang sa Paskuwa para sa sadiri ninda asin para sa mga saserdote, huling an mga saserdote na mga gikan ni Aaron iyo an nagdudulot kan mga atang na pigtututong asin kan mga taba sagkod banggi, kaya an mga Levita an naghanda para sa sadiri ninda asin para sa mga saserdote na mga gikan ni Aaron.

15 Asin nasa kanya-kanya nindang puwesto an mga parakanta na mga aki ni Asaf,+ sigun sa ipinagbuot ni David,+ Asaf,+ Heman, asin Jedutun+ na bisyonaryo kan hadi; asin nasa manlain-lain na trangkahan an mga bantay sa trangkahan.+ Dai na ninda kinaipuhan na bayaan an ginigibo nindang paglilingkod huling ipinaghanda na sinda kan mga tugang nindang mga Levita. 16 Kaya natapos ninda kan aldaw na idto an gabos na preparasyon na hinahagad ni Jehova sa pagselebrar nin Paskuwa+ asin sa pagdulot nin mga atang na pigtututong sa ibabaw kan altar ni Jehova, sigun sa ipinagbuot ni Hading Josias.+

17 Isinelebrar kan mga Israelitang yaon duman an Paskuwa kan panahon na idto, dangan an Kapiyestahan nin Tinapay na Daing Lebadura sa laog nin pitong aldaw.+ 18 Mayo pang Paskuwa na isinelebrar nin arog kaini sa Israel puon kan panahon ni Samuel na propeta; ni igwa man nin iba pang hadi sa Israel an nagselebrar nin Paskuwa na arog kan isinelebrar ni Josias,+ kan mga saserdote, kan mga Levita, kan bilog na Juda asin Israel na presente duman, asin kan mga nag-iistar sa Jerusalem. 19 Isinelebrar an Paskuwang ini kan ika-18 taon kan paghadi ni Josias.

20 Pagkatapos kan gabos na ini, kan maipreparar na ni Josias an templo,* naghali si Hading Neco+ kan Ehipto tanganing makipaglaban duman sa Carkemis harani sa Eufrates. Dangan nagluwas si Josias tanganing makipaglaban sa saiya.+ 21 Kaya nagsugo si Neco nin mga mensahero tanganing sabihon sa saiya: “Ano ta nagluwas ka para makipaglaban sako, O hadi kan Juda? Bako ika an sasalakayon ko ngunyan; sa ibang nasyon* ako makikipaglaban, asin sinabi nin Diyos na dapat akong maghidali. Kaya kun habo mong mapahamak, dai mo pagkontrahon an Diyos na nasa kaibanan ko, ta kun iyo, lalaglagon ka niya.” 22 Alagad dai ruminayo sa saiya si Josias, kundi nagbago ini nin itsura+ tanganing makipaglaban sa saiya. Dai siya nagdangog sa mga sinabi ni Neco, na hali mismo sa nguso nin Diyos. Kaya nagpasiring siya sa Kapatagan nin Megido asin nakipaglaban.+

23 Tinamaan kan mga parapana si Hading Josias, asin sinabi kan hadi sa mga lingkod niya: “Halion nindo ako digdi, ta grabe an tama ko.” 24 Kaya an mga lingkod niya ilinuwas siya sa karwahe asin isinakay siya sa ikaduwa niyang karwaheng panggiyera asin dinara siya sa Jerusalem. Dangan nagadan siya asin ilinubong sa lulubngan kan saiyang mga apuon,+ asin ipinagmundo kan bilog na Juda asin Jerusalem si Josias. 25 Asin nag-awit si Jeremias+ nin panambitan para ki Josias, asin an gabos na lalaki asin babaying parakanta+ padagos na nag-aarawit manungod ki Josias sa saindang mga panambitan* sagkod sa aldaw na ini; asin napagdesisyunan na dapat awiton an mga ini sa Israel, asin nakasurat an mga ini sa libro nin mga panambitan.

26 Kun manungod sa iba pang nangyari sa buhay ni Josias asin an mga ipinahiling niyang maimbod na pagkamuot, bilang pagsunod sa kun ano an nakasurat sa Katugunan ni Jehova, 27 asin an saiyang mga ginibo, puon sa kapinunan sagkod sa katapusan, nakasurat iyan sa Libro kan mga Hadi kan Israel asin kan Juda.+