Jeremias

52 An edad ni Zedekias+ kan siya magin hadi 21 anyos, asin namahala siya sa Jerusalem sa laog nin 11 taon. An saiyang ina iyo si Hamutal+ na aki ni Jeremias kan Libna. 2 Padagos niyang ginibo kun ano an maraot sa paghiling ni Jehova, arog kan gabos na ginibo ni Jehoiakim.+ 3 Nangyari an mga ini sa Jerusalem asin sa Juda huli sa kaanggutan ni Jehova, sagkod sa palayason niya sinda sa atubangan niya.+ Asin nagrebelde si Zedekias sa hadi kan Babilonya.+ 4 Kan ikasiyam na taon kan paghadi ni Zedekias, kan ikasampulong aldaw kan ikasampulong bulan, uminabot laban sa Jerusalem si Hading Nabucodonosor* kan Babilonya kaiba an bilog niyang hukbo. Nagkampo sinda laban sa siyudad asin pinalibutan ninda ini nin kudal na pansalikop.+ 5 Asin nagdanay na nasasalikupan an siyudad sagkod sa ika-11 taon ni Hading Zedekias.

6 Kan ikaapat na bulan, kan ikasiyam na aldaw kan bulan,+ grabe na an tiggutom sa siyudad, asin mayo na nin kakanon para sa mga namamanwaan.+ 7 Kan huri, nalabot asin nalaog an pader kan siyudad. Kaya pagkabanggi, mantang napapalibutan kan mga Caldeo an siyudad, nagdurulag hali sa siyudad an gabos na suldados asin nag-agi sinda sa trangkahan na nasa pag-ultanan kan duwang pader na harani sa hardin kan hadi; asin nagdulag sinda pasiring sa Araba.+ 8 Pero linapag kan hukbo kan mga Caldeo an hadi, asin inabutan ninda si Zedekias+ sa disyertong kapatagan kan Jerico, asin an gabos niyang suldados nagkasuruway-suway parayo sa saiya. 9 Dangan dinakop ninda an hadi asin dinara sa hadi kan Babilonya na nasa Ribla sa daga nin Hamat, asin sinentensiyahan niya siya. 10 Asin ginaradan kan hadi kan Babilonya sa atubangan ni Zedekias an saiyang mga aking lalaki, asin ginaradan man niya duman sa Ribla an gabos na pamayo* kan Juda. 11 Dangan binuta kan hadi kan Babilonya an mga mata ni Zedekias,+ kinadenahan nin kadenang tanso, asin dinara siya sa Babilonya, tapos iprineso sagkod sa aldaw na magadan siya.

12 Kan ikasampulong aldaw kan ikalimang bulan, kan ika-19 taon ni Hading Nabucodonosor* na hadi kan Babilonya, naglaog sa Jerusalem an lingkod kaidto kan hadi kan Babilonya na si Nebuzaradan na pamayo kan mga guwardiya.+ 13 Sinulo niya an harong ni Jehova,+ an harong* kan hadi, asin an gabos na harong sa Jerusalem; sinulo man niya an gabos na darakulang harong. 14 Asin rinumpag kan bilog na hukbo kan mga Caldeo, na kaiba kan pamayo kan mga guwardiya, an pader sa palibot kan Jerusalem.+

15 Puwersahan na dinara ni Nebuzaradan na pamayo kan mga guwardiya an pira sa mga hamak na tawo asin an iba pa sa mga namamanwaan na natada sa siyudad. Dinara man niya an mga nagharali diyan para kumampi sa hadi kan Babilonya pati an natadang mga ekspertong panday.+ 16 Pero iwinalat ni Nebuzaradan na pamayo kan mga guwardiya an nagkapira sa pinakapobre sa mga namamanwaan* tanganing mag-ataman kan mga ubasan saka magin mga parauma na puwersahan na pinapagtrabaho.+

17 Asin piniridaso kan mga Caldeo an mga tansong harigi+ sa harong ni Jehova saka an mga kareta+ pati an tansong tangke nin tubig*+ na yaon sa harong ni Jehova, asin dinara ninda sa Babilonya an gabos na tanso.+ 18 Kinua man ninda an mga lalagan nin abo, an mga pala, an mga panggunting nin mitsa, an mga mangko,+ an mga kopa,+ asin an gabos na kagamitan na tanso na ginagamit sa paglilingkod sa templo. 19 Kinua kan pamayo kan mga guwardiya an mga planggana,+ an mga bugtakan nin baga, an mga mangko, an mga lalagan nin abo, an mga kandelero,+ an mga kopa, saka an mga mangko na mga gibo sa tunay na bulawan asin plata.+ 20 Dai kayang timbangon an gabos na tanso hali sa duwang harigi, sa tangke nin tubig,* sa 12 tansong torong baka+ na nasa irarom kan tangke nin tubig,* asin sa mga kareta na ginibo ni Hading Solomon para sa harong ni Jehova.

21 Kun manungod sa mga harigi, an kada harigi 18 maniko* an langkaw, an palibot na sukol kan harigi 12 maniko;*+ an hibog kaiyan apat na lakbang nin muro,* asin mayong laog an tahaw kaiyan. 22 Asin tanso an payo-payong nasa ibabaw kaiyan; asin limang maniko an langkaw kan sarong payo-payo;+ asin an sinaralapid na kurukadena saka mga bunga nin granada sa palibot kan payo-payo gabos gibo sa tanso. Arog man mismo kaini an ikaduwang harigi, asin an dekorasyon kaiyan na mga bunga nin granada. 23 Igwa nin 96 na bunga nin granada sa palibot kaiyan;* gabos-gabos, igwa nin 100 na bunga nin granada sa palibot kan sinaralapid na kurukadena.+

24 Kinua man kan pamayo kan mga guwardiya si Seraias+ na panginot na saserdote, si Sofonias+ na ikaduwang saserdote, asin an tulong bantay sa pintuan.+ 25 Asin kinua niya hali sa siyudad an sarong opisyal kan palasyo na namamahala sa mga suldados, an pitong personal na parakonseho* kan hadi na yaon sa siyudad, siring man an sekretaryo kan pamayo kan hukbo na iyo an nagtitipon sa mga suldados kan nasyon,* asin an 60 lalaki hali sa mga ordinaryong tawo kan nasyon* na yaon sa siyudad. 26 Kinurua sinda ni Nebuzaradan na pamayo kan mga guwardiya asin dinara sa hadi kan Babilonya na nasa Ribla. 27 Ginaradan sinda kan hadi kan Babilonya duman sa Ribla+ sa daga nin Hamat. Sa siring, puwersahan na kinurua an Juda hali sa daga ninda.+

28 Ini an mga puwersahan na dinara* ni Nabucodonosor:* kan ikapitong taon, 3,023 na Judio.+

29 Kan ika-18 taon ni Nabucodonosor,*+ 832 katawo* an kinua sa Jerusalem.

30 Kan ika-23 na taon ni Nabucodonosor,* puwersahan na dinara ni Nebuzaradan na pamayo kan mga guwardiya an mga Judio, 745 katawo.*+

Gabos-gabos, 4,600 katawo* an puwersahan na dinara.

31 Dangan, kan ika-37 taon kan pagkadistiyero ni* Hading Jehoiakin+ kan Juda, kan ika-25 aldaw kan ika-12 bulan, kan taon na magin hadi kan Babilonya si Hading Evil-merodac, pinatalingkas niya si* Hading Jehoiakin kan Juda asin pinaluwas siya sa presuhan.+ 32 Marahay an nagin pagtratar niya* sa saiya asin mas ilinangkaw niya an saiyang trono kisa sa mga trono kan iba pang mga hadi na kaiba niya sa Babilonya. 33 Kaya hinuba ni Jehoiakin an bado niyang pampreso, asin pirmi na siyang sa lamesa* kan hadi nagkakakan sa bilog na panahon na siya nabubuhay. 34 Regular siyang sinusuplayan kan hadi kan Babilonya nin kakanon, aroaldaw, sagkod sa aldaw na magadan siya, sa bilog na panahon na siya nabubuhay.