Isaias
19 Sarong mensahe laban sa Ehipto:+
Hilinga! Nakasakay si Jehova sa sarong marikas na panganuron asin padangadang sa Ehipto.
An daing serbing mga diyos kan Ehipto matarakig sa saiyang atubangan,+
Asin an puso* kan Ehipto matutunaw sa kalaog-laugi kaiyan.
2 “Susutsutan ko an mga Ehipsiyo laban sa mga Ehipsiyo,
Asin sinda-sinda an magraralaban,
An kada saro laban sa tugang niya asin sa kataid niya,
Siyudad laban sa siyudad, kahadian laban sa kahadian.
3 Asin an espiritu kan Ehipto mariribaraw sa kalaog-laugi kaiyan,
Asin riribungon ko an saiyang mga plano.+
Maglalaom sinda sa daing serbing mga diyos,
Sa mga paraorasyon asin sa mga espiritista saka sa mga parahula.+
4 Itatao ko an Ehipto sa kamot nin sarong maringis na kagurangnan,
Asin sarong daing hirak na hadi an mamamahala sa sainda,”+ an sabi kan tunay na Kagurangnan, si Jehova na pamayo nin mga hukbo.
5 An tubig kan dagat mamamara,
Asin an salog maaalang asin mawawaran nin tubig.+
6 Asin an mga salog magigin mabata;
An mga kanal kan Nilo sa Ehipto mahuhubasan nin tubig asin maaalang.
An mga tambo* asin haralangkaw na duot malalapa.+
7 An mga tanom sa may kalabaan kan Salog nin Nilo, sa may bunganga kan Nilo,
Asin an gabos na daga sa may gilid kan Nilo+ na sinabwagan nin banhi magkakamarara.+
Ilalayog iyan nin duros, asin iyan mawawara na.
8 Asin an mga parasira mananangis,
Idtong mga namamanwit sa Nilo mananambitan,
Asin idtong mga nag-iitsa nin hikot sa tubig magigin diit na lang.
9 Idtong mga naggigibo nin tela hali sa awat nin lino na hinagot+
Asin idtong naggigibo nin puting tela sa habulan mapapasupog.
10 An mga parahabol niya nin tela pangluluyahan nin biyo;
An gabos niyang tangdanan na trabahador magmumurundo.*
11 An mga pamayo* kan Zoan+ mga mangmang.
An pinakamadudunong sa mga parakonseho ni Faraon nagtatao nin bakong makatanusan na suhestiyon.+
Paano nindo nasasabi ki Faraon:
“Gikan ako sa pamilya nin mga madunong,
Gikan ako sa pamilya nin mga hadi kan suanoy na panahon”?
12 Kaya, hain na an saimong mga madunong na lalaki?+
Kun aram ninda, sabihon ninda saimo kun ano an nagin desisyon ni Jehova na pamayo nin mga hukbo may koneksiyon sa Ehipto.
13 Huminirong may kamangmangan an mga pamayo* kan Zoan;
Nadaya an mga pamayo* kan Nof;*+
An Ehipto ilinagalag kan mga pamayo kan saiyang mga tribo.
14 Ibinubo sa saiya ni Jehova an espiritu nin karibarawan;+
Asin ilinagalag ninda an Ehipto sa ano man na ginigibo niya,
15 Asin mayo nang ano man na magigibo an Ehipto;
An payo man o an ikog, an saringsing* man o an haralangkaw na duot.*
16 Sa aldaw na iyan, an Ehipto magigin siring sa mga babayi, na nagtatarakig asin grabe an takot huli sa kamot ni Jehova na pamayo nin mga hukbo na nakahuma asin nakataas laban diyan.+ 17 Asin an daga nin Juda magigin dahilan kan grabeng takot kan Ehipto. Masambitan sana iyan, matatakot na sindang marhay huli sa nagin desisyon ni Jehova na pamayo nin mga hukbo laban sa sainda.+
18 Sa aldaw na iyan magkakaigwa nin limang siyudad sa daga nin Ehipto na nagtataram kan lengguwahe kan Canaan+ asin nanunumpa na magigin maimbod sinda ki Jehova na pamayo nin mga hukbo. An sarong siyudad aapudon An Siyudad nin Pagtumpag.
19 Sa aldaw na iyan magkakaigwa nin sarong altar para ki Jehova sa tahaw kan daga nin Ehipto asin nin sarong harigi para ki Jehova sa may sagkudan kaiyan. 20 Sa daga nin Ehipto, magigin tanda iyan asin patotoo para ki Jehova na pamayo nin mga hukbo; huli ta maagrangay sinda ki Jehova dahil sa mga nang-aapi, asin masugo siya sa sainda nin sarong paraligtas, saro na pinakanangungurog, na magliligtas sa sainda. 21 Asin ipapamidbid ni Jehova an sadiri niya sa mga Ehipsiyo, asin mamimidbid kan mga Ehipsiyo si Jehova sa aldaw na iyan, asin madulot sinda nin mga atang asin matao nin mga regalo saka magibo nin promesa ki Jehova asin uutubon ninda iyan. 22 Papadusahan ni Jehova an Ehipto,+ papadusahan dangan papaumayan iyan; asin mabalik sinda ki Jehova, asin mahimati siya sa saindang mga pakimahirak tapos papaumayan sinda.
23 Sa aldaw na iyan magkakaigwa nin tinampo+ hali sa Ehipto pasiring sa Asiria. Dangan an Asiria mapasiring sa Ehipto, asin an Ehipto mapasiring sa Asiria, asin maglilingkod sa Diyos an Ehipto kaiba an Asiria. 24 Sa aldaw na iyan, an Israel magigin an ikatulo kaiba kan Ehipto asin Asiria,+ sarong bendisyon sa tahaw kan daga, 25 huling bebendisyunan sinda ni Jehova na pamayo nin mga hukbo, na sinasabi: “Bendisyunan an Ehipto na sakuyang banwaan, asin an Asiria na gibo kan sakong mga kamot, asin an Israel na sakuyang mana.”+