Hukom

16 Sarong beses, nagduman si Samson sa Gaza. Nakahiling siya duman nin sarong hostes, asin nagdagos siya sa harong kaini. 2 May nagsabi sa mga taga Gaza: “Yaon digdi si Samson.” Kaya pinalibutan ninda an lugar asin magdamlag siyang inabangan sa trangkahan kan siyudad. Tuninong sindang nag-abang kan bilog na banggi, asin naisip ninda: “Gagadanon ta siya pag nagliwanag na.”

3 Alagad, sagkod sanang matangang banggi naghigda si Samson duman. Dangan buminuhat siya asin ginabot an mga pinto kan trangkahan kan siyudad saka an duwang poste sa gilid kaiba an balagbag na pambarat. Pinasan niya iyan asin dinara sa alituktok kan bukid na nakahampang sa Hebron.

4 Pagkatapos kaiyan, namuot siya sa sarong babayi sa Kababan* nin Sorek na an pangaran Delaila.+ 5 Kaya nagdulok ki Delaila an mga tagapamahala kan mga Filisteo asin nagsabi: “Lansihon* mo siya.+ Aramon mo kun sain hali an pambihira niyang kusog asin kun paano mi siya magagapos saka madadaog. Pag ginibo mo ini, tatawan ka kan kada saro samo nin 1,100 na pidasong pirak.”

6 Paghaloy-haloy, sinabi ni Delaila ki Samson: “Sabihon mo tabi sako kun sain hali an pambihira mong kusog asin kun ano an puwedeng ipanggapos sa saimo saka kun paano ka madadaog.” 7 Sinabi ni Samson saiya: “Kun gagapuson ninda ako nin pitong bago pang lubid nin pana* na bako pang alang, mangruruluya ako asin magigin kapareho nin ordinaryong tawo.” 8 Kaya dinarahan siya kan mga tagapamahala kan mga Filisteo nin pitong bago pang lubid nin pana na bako pang alang, asin ginapos niya kaiyan si Samson. 9 Nag-abang an mga Filisteo sa laog kan tagong kuwarto, asin nagkurahaw siya: “Samson, may mga Filisteo!” Kaya pinaratod niya an mga lubid nin pana, na madalion sanang napatod na garo torsidong lino na nakaduta* sa kalayo.+ Asin dai naaraman kun sain hali an saiyang kusog.

10 Dangan sinabi ni Delaila ki Samson: “Pigloko mo ako asin nagputik ka sako. Sabihon mo tabi sako ngunyan kun ano an puwedeng ipanggapos saimo.” 11 Kaya sinabi niya sa saiya: “Kun gagapuson ninda ako nin bagong mga lubid na dai pa nagagamit, mangruruluya ako asin magigin kapareho nin ordinaryong tawo.” 12 Kaya nagkua si Delaila nin bagong mga lubid asin ginapos niya siya kaiyan tapos nagkurahaw: “Samson, may mga Filisteo!” (Kan panahon na iyan, igwa na nin mga nag-aabang sa laog kan tagong kuwarto.) Kaya pinaratod niya an mga iyan sa saiyang mga takyag na garo sana mga torsido.+

13 Pagkatapos kaiyan, sinabi ni Delaila ki Samson: “Sagkod ngunyan pigloloko mo ako asin nagpaparaputik ka sako.+ Sabiha na sako kun ano an puwedeng ipanggapos saimo.” Dangan sinabi niya saiya: “Kun an pitong sinalapid na buhok sa payo ko hahabulon mo sa torsidong gamit sa paghabol,* mawawara an sakong kusog.” 14 Kaya ginibo niya iyan asin hinigutan gamit an sarong istik* asin nagkurahaw siya sa saiya: “Samson, may mga Filisteo!” Kaya napagmata si Samson asin binulnot an istik saka an torsidong gamit sa paghabol.

15 Sinabi ngunyan saiya ni Delaila: “Pa’no mo nasabing, ‘Namumutan taka,’+ na an puso mo ngani mayo man sako? Tulong beses mo na akong pigloko, asin dai mo sako pigsasabi an pinaghahalian kan pambihira mong kusog.”+ 16 Dahil sa aroaldaw na pagpaparahapot* saka pagpaparapirit ni Delaila, dai na iyan natagalan ni Samson.*+ 17 Kaya sinabi niya man giraray sa saiya an gabos. Nagsabi si Samson: “Dai pa lamang napuputulan an buhok ko,* huli ta Nazareo ako nin Diyos puon sa pagkamundag.*+ Pag inahit an buhok ko, mawawara an sakong kusog saka mangruruluya ako asin magigin kapareho kan gabos na iba pang tawo.”

18 Kan mahiling ni Delaila na sinabi na niya sa saiya an gabos, tulos-tulos niyang ipinaapod an mga tagapamahala kan mga Filisteo,+ na sinasabi: “Magdigdi kamo ngunyan, ta sinabi na niya sako an gabos.” Kaya nagduman sa saiya an mga tagapamahala kan mga Filisteo dara an kuwarta. 19 Pinaturog niya si Samson sa may tuhod niya; dangan inapod niya an lalaki asin ipinaputol niya digdi an pitong sinalapid na buhok sa payo ni Samson. Pagkatapos, nakontrol na niya si Samson, huling nawawara na an kusog kaini. 20 Dangan nagkurahaw si Delaila: “Samson, may mga Filisteo!” Napagmata siya asin nagsabi: “Maluwas ako arog kan dati+ asin madulag.” Pero dai niya aram na binayaan na siya ni Jehova. 21 Kaya dinakop siya kan mga Filisteo asin hinulwat an saiyang mga mata. Dangan dinara ninda siya sa Gaza tapos ginapos nin duwang tansong kadena, asin nagin paragiling siya nin trigo sa laog kan presuhan. 22 Alagad an buhok sa saiyang payo nagpuon nang maglaba giraray pagkatapos siyang putulan nin buhok.+

23 Nagtiripon an mga tagapamahala kan mga Filisteo tanganing magdulot nin dakul na atang sa saindang diyos na si Dagon+ asin tanganing mag-urugma, huli ta nagsasarabi sinda: “Itinao sato kan satuyang diyos an kalaban tang si Samson!” 24 Kan mahiling siya* kan mga tawo, inumaw ninda an saindang diyos asin nagsarabi: “Itinao sato kan satuyang diyos an kalaban ta, an saro na nagdestroso kan satong daga+ asin guminadan nin kadakul sa sato.”+

25 Dahil nag-uurugma sinda, nagsarabi sinda: “Darahon nindo digdi si Samson tanganing may mapagngirisihan kita.” Kaya ilinuwas ninda si Samson sa presuhan tanganing pagngirisihan ninda; pinatindog ninda siya sa tahaw nin duwang harigi. 26 Dangan sinabi ni Samson sa aking lalaki na nagkakabit sa saiya: “Pakaputon mo ako sa mga hariging nagtutukod sa templo,* tanganing makasandig ako diyan.” 27 (Kan panahon na idto, an templo pano-pano nin mga lalaki asin babayi. Yaon duman an gabos na tagapamahala kan mga Filisteo, asin igwa sa bubungan nin mga 3,000 na lalaki asin babayi na naghihiling mantang pigngingirisihan si Samson.)

28 Nag-apod ngunyan si Samson+ ki Jehova: “O Soberanong Kagurangnan na Jehova, girumdumon mo tabi ako, asin tawan mo tabi ako nin kusog,+ maski ngunyan na sana, O Diyos. Tugutan mo akong makabalos sa mga Filisteo dawa para sana sa saro kong mata.”*+

29 Dangan puminuwesto si Samson sa pag-ultanan kan duwang hariging nasa tahaw na nagtutukod sa templo, asin kinaputan niya an saro kan tuo niyang kamot asin an saro man kan wala niyang kamot. 30 Nagkurahaw si Samson: “Pabayai tabi akong magadan* kaiba kan mga Filisteo!” Dangan itinulod* niya nin bilog niyang kusog an duwang harigi, asin narumpagan kan templo an mga tagapamahala asin an gabos na yaon duman.+ Kaya mas dakul an nagadan niya sa saiyang pagkagadan kisa kan nagadan niya sa bilog niyang buhay.+

31 Kan huri, nagduman an mga tugang niya saka an bilog na pamilya kan saiyang ama para kuanon an saiyang bangkay. Kinua ninda iyan asin ilinubong sa pag-ultanan kan Zora+ saka Estaol sa lulubngan kan saiyang amang si Manoa.+ Nagin hukom siya sa Israel sa laog nin 20 taon.+