Ezekiel

48 “Ini an mga pangaran kan mga tribo, puon sa pinakapuro sa norte: An kahirasan kan Dan+ nangangagi sa dalan kan Hetlon pasiring sa Lebo-hamat*+ dangan sa Hazar-enan, na nangangagi sa norteng linderos kan Damasco, kataid kan Hamat;+ asin minapuon iyan sa linderos sa sirangan sagkod sa linderos sa sulnupan. 2 An kahirasan kan Aser+ nasa kataid kan linderos kan Dan, puon sa linderos sa sirangan sagkod sa linderos sa sulnupan. 3 An kahirasan kan Neftali+ nasa kataid kan linderos kan Aser, puon sa linderos sa sirangan sagkod sa linderos sa sulnupan. 4 An kahirasan kan Manases+ nasa kataid kan linderos kan Neftali, puon sa linderos sa sirangan sagkod sa linderos sa sulnupan. 5 An kahirasan kan Efraim nasa kataid kan linderos kan Manases,+ puon sa linderos sa sirangan sagkod sa linderos sa sulnupan. 6 An kahirasan kan Ruben nasa kataid kan linderos kan Efraim,+ puon sa linderos sa sirangan sagkod sa linderos sa sulnupan. 7 An kahirasan kan Juda nasa kataid kan linderos kan Ruben,+ puon sa linderos sa sirangan sagkod sa linderos sa sulnupan. 8 Sa kataid kan linderos kan Juda, puon sa linderos sa sirangan sagkod sa linderos sa sulnupan, an kontribusyon na itatagama nindo dapat na 25,000 na maniko* an lakbang+ asin an laba kapareho kan laba kan kahirasan kan kataid na mga tribo puon sa linderos sa sirangan sagkod sa linderos sa sulnupan. Nasa tahaw kaiyan an santuwaryo.

9 “An kontribusyon na itatagama nindo para ki Jehova dapat na may laba na 25,000 na maniko asin may lakbang na 10,000 na maniko. 10 Iyan an magigin banal na kontribusyon para sa mga saserdote+ na an sukol 25,000 na maniko sa norte, 10,000 sa sulnupan, 10,000 sa sirangan, asin 25,000 sa timog. An santuwaryo ni Jehova nasa tahaw kaiyan. 11 Para iyan sa pinabanal na mga saserdote hali sa mga aki ni Zadok,+ an mga nag-asikaso sa paninimbagan ninda sa sako asin dai nagbaya sa sako kan panahon na binayaan ako kan mga Israelita saka mga Levita.+ 12 Magkakaigwa sinda nin kahirasan sa kontribusyon, sa daga na isinuway bilang kabanal-banali, sa kataid kan linderos kan mga Levita.

13 “Sa kataid kan teritoryo kan mga saserdote, magkakaigwa nin kahirasan an mga Levita na 25,000 na maniko an laba saka 10,000 an lakbang. (An kabilugan na laba 25,000 asin 10,000 an lakbang.) 14 Dai ninda dapat ipabakal, iribay, o ilipat sa iba an arin man sa pinakamagayon na parteng ini kan daga, huli ta banal iyan ki Jehova.

15 “An natatadang parte na 5,000 na maniko an lakbang na kataid kan linderos na may laba na 25,000 na maniko gagamiton kan siyudad+ para magin tugdukan nin mga harong asin mga pasabsaban. Nasa tahaw kaiyan an siyudad.+ 16 Ini an sukol kan siyudad: An linderos sa norte 4,500 na maniko, an linderos sa timog 4,500, an linderos sa sirangan 4,500, saka an linderos sa sulnupan 4,500. 17 An sukol kan pasabsaban kan siyudad dapat na 250 maniko sa norte, 250 sa timog, 250 sa sirangan, saka 250 sa sulnupan.

18 “An natatadang parte kasinglaba kan banal na kontribusyon,+ 10,000 na maniko sa sirangan asin 10,000 na maniko sa sulnupan. Magigin kasinglaba iyan kan banal na kontribusyon, asin an mga ani diyan magigin pagkakan kan mga naglilingkod sa siyudad. 19 Tatanuman iyan kan mga naglilingkod sa siyudad na hali sa gabos na tribo kan Israel.+

20 “An bilog na kontribusyon may sukol na 25,000 na maniko kuwadrado. Dapat nindong itagama iyan bilang banal na kontribusyon kaiba an pagsadiri kan siyudad.

21 “An matatada sa mag-ibong na gilid kan banal na kontribusyon saka kan pagsadiri kan siyudad magigin pagsadiri kan pamayo.+ Nasa kataid iyan kan 25,000 na manikong linderos sa sirangan saka sa sulnupan kan kontribusyon. An linderos kan daga para sa pamayo kapareho kan mga linderos kan daga kan mga kataid kaiyan na tribo. An banal na kontribusyon saka an santuwaryo kan templo nasa tahaw kaiyan.

22 “An pagsadiri kan mga Levita saka an pagsadiri kan siyudad magigin nasa tahaw kan pagsadiri kan pamayo. An teritoryo kan pamayo magigin nasa pag-ultanan kan linderos kan Juda+ saka kan linderos kan Benjamin.

23 “Kun manungod sa mga natatadang tribo, an kahirasan kan Benjamin mapuon sa linderos sa sirangan sagkod sa linderos sa sulnupan.+ 24 An kahirasan kan Simeon nasa kataid kan linderos kan Benjamin,+ puon sa linderos sa sirangan sagkod sa linderos sa sulnupan. 25 An kahirasan kan Isacar+ nasa kataid kan linderos kan Simeon, puon sa linderos sa sirangan sagkod sa linderos sa sulnupan. 26 An kahirasan kan Zebulon nasa kataid kan linderos kan Isacar,+ puon sa linderos sa sirangan sagkod sa linderos sa sulnupan.+ 27 An kahirasan kan Gad nasa kataid kan linderos kan Zebulon,+ puon sa linderos sa sirangan sagkod sa linderos sa sulnupan. 28 An linderos sa timog, na nangangagi sa linderos kan Gad, minapuon sa Tamar+ pasiring sa tubig kan Meribat-kades,+ pasiring sa Sulugan na Kababan*+ asin sa Dakulang Dagat.*

29 “Ini an daga na pagbabanga-bangaon nindo bilang mana kan mga tribo kan Israel,+ asin iyan an magigin mga kahirasan ninda,”+ an sabi kan Soberanong Kagurangnan na Jehova.

30 “Ini an mga luwasan kan siyudad: An parteng norte may sukol na 4,500 na maniko.+

31 “An magigin pangaran kan mga trangkahan kan siyudad iyo an mga pangaran kan mga tribo kan Israel. Sa tulong trangkahan sa norte, may sarong trangkahan para sa Ruben, sarong trangkahan para sa Juda, asin sarong trangkahan para sa Levi.

32 “An parteng sirangan may laba na 4,500 na maniko, asin igwa diyan nin tulong trangkahan: sarong trangkahan para sa Jose, sarong trangkahan para sa Benjamin, asin sarong trangkahan para sa Dan.

33 “An parteng timog may sukol na 4,500 na maniko, asin igwa diyan nin tulong trangkahan: sarong trangkahan para sa Simeon, sarong trangkahan para sa Isacar, asin sarong trangkahan para sa Zebulon.

34 “An parteng sulnupan may laba na 4,500 na maniko, asin igwa diyan nin tulong trangkahan: sarong trangkahan para sa Gad, sarong trangkahan para sa Aser, asin sarong trangkahan para sa Neftali.

35 “An palibot kaiyan may sukol na 18,000 na maniko. Asin an magigin pangaran kan siyudad puon sa aldaw na iyan iyo ini, Si Jehova Yaon Diyan.”+