Hukom

20 Bilang resulta, nagtiripon an gabos na Israelita hali sa Dan+ sagkod sa Beer-sheba asin hali sa daga nin Gilead.+ An bilog na katiripunan may pagkasararong nagtiripon* sa atubangan ni Jehova sa Mizpa.+ 2 Nag-iba an mga pamayo kan banwaan saka kan gabos na tribo sa Israel sa pagtiripon kan katiripunan* kan banwaan nin Diyos. An mga suldados na armado nin espada may bilang na 400,000.+

3 Naaraman kan mga Benjaminita na nagduman sa Mizpa an mga lalaki kan Israel.

Dangan sinabi kan mga lalaki kan Israel: “Sabiha samo, paano nangyari an marauton na bagay na ini?”+ 4 Nagsimbag an lalaking Levita,+ an agom kan ginadan na babayi: “Nagduman ako sa Gibeah+ sa Benjamin kaiba an sakong sekondaryong agom para duman magpalihis nin banggi. 5 Tapos nagduruman sa harong na pigdagusan ko an mga nakaistar* sa Gibeah, asin gusto ninda akong gibuhan nin maraot; pinalibutan ninda an harong kan bangging iyan. Ako an gusto nindang gadanon, pero an sakong sekondaryong agom na lang an linupigan ninda, asin nagadan siya.+ 6 Kaya kinua ko an bangkay kan sakong sekondaryong agom asin pigputol-putol iyan, tapos ipinadara ko an mga pidaso kaiyan sa bilog na daga* kan Israel,+ huling guminibo sinda nin marauton saka makasusupog na bagay sa Israel. 7 Ngunyan, kamo gabos na kabilang sa banwaan kan Israel, ano an masasabi nindo+ sa bagay na ini?”

8 Dangan, nagkasararo* an bilog na banwaan asin nagsabi: “Mayo ni saro sa sato an mapuli sa saiyang tolda o sa saiyang harong. 9 Ini an gigibuhon ta sa mga taga Gibeah: Pumili kita paagi sa burunutan nin mga lalaking masalakay sa sainda.+ 10 Hali sa gabos na tribo kan Israel, makua kita nin 10 hali sa 100 asin nin 100 hali sa 1,000 asin nin 1,000 hali sa 10,000 para magkolekta nin mga kakanon para sa hukbo, tanganing masalakay kan hukbo an Gibeah sa Benjamin, dahil sa makasusupog na bagay na ginibo ninda sa Israel.” 11 Kaya an gabos na lalaki kan Israel nagtiripon na nagkakasararo* bilang magkakaalyado para salakayon an siyudad.

12 Dangan nagsugo nin mga lalaki an mga tribo nin Israel sa gabos na lalaki sa tribo ni Benjamin, na sinasabi: “Ano ining marauton na bagay na nangyari diyan sa saindo? 13 Itao nindo an mga daing kuwentang lalaki na taga Gibeah,+ tanganing magadan mi sinda asin mahali mi an karatan sa Israel.”+ Pero dai dinangog kan mga Benjaminita an saindang mga tugang na Israelita.

14 Dangan nagruluwas sa mga siyudad an mga Benjaminita asin nagtiripon sa Gibeah para makipaglaban sa mga lalaki kan Israel. 15 Kan aldaw na iyan, nakatipon an mga Benjaminita nin 26,000 na lalaking armado nin espada hali sa saindang mga siyudad, asin dai pa diyan kaiba an 700 sa pinakamatitibay na lalaki sa Gibeah. 16 Kabilang sa hukbong iyan an 700 na pinakamatitibay na lalaki na mga walahon. An kada saro sa mga lalaking ini kayang maglagpitaw nin gapo na dai lamang nagsasalto dawa gabuhok.

17 An mga lalaki kan Israel, apuwera sa Benjamin, nakatipon nin 400,000 na lalaking armado nin espada,+ asin an kada saro sa sainda eksperyensiyadong parapakilaban. 18 Nagtukad sinda pasiring sa Bethel para maghapot sa Diyos.+ Dangan nagsabi an banwaan nin Israel: “Siisay sa samo an manginginot sa pakikipaglaban sa mga Benjaminita?” Nagsimbag si Jehova: “An Juda an manginginot.”

19 Pagkatapos kaiyan, naghali na an mga Israelita pagkaaga asin nagkampo para makipaglaban sa Gibeah.

20 Luminuwas ngunyan an mga lalaki kan Israel para makipaglaban sa mga Benjaminita, asin puminuwesto sinda harani sa Gibeah. 21 Kaya luminuwas an mga Benjaminita hali sa Gibeah, asin 22,000 na lalaki kan Israel an nagadan ninda kan aldaw na iyan. 22 Alagad, makusog an buot kan hukbo kan mga lalaki kan Israel. Puminuwesto giraray sinda sa dating lugar na pinuwestuhan ninda kan inot na aldaw para makipaglaban. 23 Dangan nagtukad an mga Israelita asin nagtangis sa atubangan ni Jehova sagkod sa banggi asin naghapot ki Jehova: “Dapat daw kaming makipaglaban giraray sa mga tugang mi, an mga Benjaminita?”+ Nagsimbag si Jehova: “Makipaglaban kamo sa sainda.”

24 Kaya ruminani an mga Israelita sa mga Benjaminita kan ikaduwang aldaw. 25 Dahil diyan, luminuwas an mga Benjaminita hali sa Gibeah para sabaton sinda kan ikaduwang aldaw. Asin 18,000 pang mga Israelita an nagadan ninda,+ na gabos armado nin espada. 26 Huli kaiyan, nagtukad sa Bethel an gabos na lalaki kan Israel. Nagtangis asin nagtukaw sinda duman sa atubangan ni Jehova,+ asin nag-ayuno sinda+ kan aldaw na iyan sagkod sa banggi asin nag-atang nin mga dulot na pigtututong+ saka mga dulot sa pakikikabtang+ sa atubangan ni Jehova. 27 Pagkatapos kaiyan, naghapot ki Jehova+ an mga lalaki kan Israel. Yaon kaya duman kan panahon na idto an kaban kan tipan kan tunay na Diyos. 28 Si Finehas+ na aki ni Eleazar, na aki ni Aaron, an naglilingkod* sa atubangan kaiyan kan panahon na idto. Naghapot sinda: “Dapat pa daw kaming makipaglaban giraray sa mga tugang mi, an mga lalaki kan Benjamin, o dapat na kaming magpundo?”+ Nagsimbag si Jehova: “Makipaglaban kamo, ta sa aga itatao ko sinda sa saindong kamot.” 29 Dangan nagbugtak an Israel nin mga lalaki sa palibot kan Gibeah na masalakay* diyan.+

30 Nakipaglaban an mga Israelita sa mga Benjaminita kan ikatulong aldaw. Arog kan dati, puminuwesto sinda harani sa Gibeah para makipaglaban sa mga Benjaminita.+ 31 Kan lumuwas an mga Benjaminita para sabaton an hukbo, naparayo sinda sa siyudad.+ Dangan, arog kan dati, pinunan nindang salakayon asin gadanon an nagkapira sa mga lalaki sa mga tinampo; an saro sa mga tinampong iyan pasiring sa Bethel saka an saro pa pasiring sa Gibeah. Mga 30 lalaki kan Israel an nagadan sa langtad.+ 32 Kaya sinabi kan mga Benjaminita: “Nadadaog ta sinda arog kan dati.”+ Pero nagsabi an mga Israelita: “Maatras kita. Paparayuon ta sinda sa siyudad asin dadarahon pasiring sa mga tinampo.” 33 Kaya an gabos na lalaki kan Israel nagpasiring sa Baal-tamar asin nagpuwesto duman mantang an mga Israelita na nagtatago sa may palibot kan Gibeah nagluwas man para sumalakay. 34 Kaya 10,000 na pinakamatitibay na lalaki sa bilog na Israel an nagpasiring sa atubangan kan Gibeah, asin matindi an ralaban. Pero dai aram kan mga Benjaminita na madali nang umabot sa sainda an kapahamakan.

35 Dinaog ni Jehova an Benjamin+ para sa Israel, asin kan aldaw na iyan 25,100 na lalaki sa Benjamin na gabos armado nin espada+ an nagadan kan mga Israelita.

36 Alagad, an paghuna kan mga Benjaminita madadaog an mga lalaki kan Israel kan mag-atras an mga ini sa Benjamin,+ pero an totoo nag-atras an mga Israelita dahil nagtiwala sinda sa mga nagtatago na masalakay sa Gibeah.+ 37 Biglang luminuwas an mga nagtago, asin sinalakay ninda an Gibeah. Dangan nagpasiring sinda sa gabos na parte kan siyudad asin ginaradan paagi sa espada an gabos na nakaistar diyan.

38 Patiinot nang sinabihan kan mga lalaki kan Israel an mga nagtago sa palibot kan siyudad na pag nakalaog na sinda sa siyudad, dapat sindang magpaaso bilang senyal.

39 Kan mag-atras an mga Israelita sa ralaban, sinalakay sinda kan mga lalaki kan Benjamin asin mga 30 lalaki kan Israel an nagadan ninda.+ Nagsabi sinda: “Nadadaog ta na naman sinda arog kan nainot na laban.”+ 40 Pero nagpuon nang mag-itaas hali sa siyudad an senyal na mahibog na aso. Kan magsalingoy an mga lalaki kan Benjamin, nahiling ninda an nag-iitaas na aso hali sa bilog na siyudad. 41 Dangan hinampang kan mga lalaki kan Israel an mga lalaki kan Benjamin, asin pinangruluyahan nin buot an mga ini, huling nahiling ninda na uminabot na sa sainda an kapahamakan. 42 Kaya uminatras sinda sa mga lalaki kan Israel pasiring sa kaawagan, pero linapag sinda kan mga ini; an mga lalaki na luminuwas hali sa mga siyudad uminiba man sa pagsalakay asin paggadan sa sainda. 43 Pinalibutan ninda an mga Benjaminita, asin dai sinda nagpundo sa paglapag sa mga ini. Dinaog ninda an mga ini sa mismong atubangan kan Gibeah, sa parteng sirangan kaiyan. 44 Asin 18,000 na lalaki kan Benjamin an nagadan, gabos matitibay na parapakilaban.+

45 Uminatras an mga lalaki kan Benjamin asin duminulag pasiring sa kaawagan tapos duminuman sa bukid nin Rimon;+ asin 5,000 sa sainda an nagadan* kan mga Israelita sa mga tinampo. Asin dagos-dagos pa sindang linapag kan mga Israelita sagkod sa Gidom, kaya 2,000 pang lalaki an nagadan ninda. 46 Kan aldaw na iyan, 25,000 gabos an nagadan sa mga Benjaminita. Gabos sinda matitibay na parapakilaban asin armado nin espada.+ 47 Pero 600 an nakadulag pasiring sa kaawagan asin nagduman sa bukid nin Rimon, asin nag-istar sinda sa bukid nin Rimon nin apat na bulan.

48 Asin binalikan kan mga lalaki kan Israel an mga Benjaminita asin ginaradan paagi sa espada an gabos na nagkatarada sa mga siyudad, puon sa mga tawo sagkod sa mga ataman na hayop. Sinulo man ninda an gabos na siyudad na naagihan ninda.