Bilang

9 Kan inot na bulan+ kan ikaduwang taon pagkaluwas ninda sa Ehipto, kinaulay ni Jehova si Moises sa kaawagan nin Sinai, na sinasabi: 2 “Dapat na ihanda kan mga Israelita an pang-atang sa Paskuwa+ sa itinalaan na panahon para diyan.+ 3 Sa ika-14 aldaw kan bulan na ini pag pabanggi na,* dapat nindong ihanda iyan sa itinalaan na panahon para diyan. Sunudon nindo an gabos na reglamento saka pamamaagi sa paghanda kaiyan.”+

4 Kaya sinabihan ni Moises an mga Israelita na ihanda an pang-atang sa Paskuwa. 5 Dangan kan pabanggi na* kan ika-14 aldaw kan inot na bulan, ihinanda ninda an pang-atang sa Paskuwa sa kaawagan nin Sinai. Ginibo kan mga Israelita an gabos na ipinagbuot ni Jehova ki Moises.

6 Igwa kaidto nin mga lalaki na nagin maati dahil may nadutan sindang bangkay,*+ na huli kaiyan dai sinda nakapaghanda nin pang-atang sa Paskuwa kan aldaw na iyan. Kaya nagduman sinda ki Moises saka ki Aaron kan aldaw na idto+ 7 asin nagsabi ki Moises: “Maati kami dahil may nadutan kaming bangkay.* Pero dahil daw kaiyan dai na kami puwedeng magtao kan dulot para ki Jehova sa itinalaan na panahon kaiba kan iba pang mga Israelita?”+ 8 Kaya sinabihan sinda ni Moises: “Maghalat kamo diyan, aaramon ko nguna kun ano an sasabihon ni Jehova manungod sa saindo.”+

9 Dangan sinabi ni Jehova ki Moises: 10 “Sabihan mo an mga Israelita, ‘Maski pa magin maati an siisay man sa saindo o an siisay man sa masurunod pa nindong henerasyon dahil may nadutan siyang bangkay*+ o maski pa kun nagbabaklay siya sa harayong lugar, dapat pa man giraray siyang maghanda kan pang-atang sa Paskuwa para ki Jehova. 11 Dapat nindang ihanda iyan sa ika-14 aldaw kan ikaduwang bulan,+ pag pabanggi na.* Kakakanon ninda iyan kasabay nin tinapay na daing lebadura asin mapait na mga gulay.+ 12 Dai sinda magtada nin ano man kaiyan sagkod sa kinaagahan,+ asin dai ninda pagbarion an arin man sa tulang kaiyan.+ Ihahanda ninda iyan kauyon kan gabos na reglamento manungod sa Paskuwa. 13 Alagad kun an sarong tawo malinig o dai man nagbabaklay sa harayong lugar tapos dai siya naghanda kan pang-atang sa Paskuwa, an tawong iyan* dapat na gadanon,+ huli ta dai niya itinao an dulot para ki Jehova sa itinalaan na panahon para diyan. An tawong iyan maninimbag sa saiyang kasalan.

14 “‘Asin kun an sarong dayuhan na residente nakikihimanwa sa saindo, dapat man siyang maghanda kan pang-atang sa Paskuwa para ki Jehova.+ Dapat niyang gibuhon iyan kauyon kan reglamento sa Paskuwa asin kan pamamaagi para diyan.+ Saro sana an magigin reglamento para sa saindo, kamo man dayuhan na residente o namundag na Israelita.’”+

15 Kan aldaw na patindugon an tabernakulo,+ tuminangod an panganuron sa ibabaw kan tabernakulo, sa tolda kan Patotoo, asin pagkabanggi an panganuron nagin garo kalayo asin nagdanay sa ibabaw kan tabernakulo sagkod aga.+ 16 Ini an padagos na nangyayari: An panganuron nagdadanay sa ibabaw kaiyan pag aldaw, asin nagigin garo kalayo iyan pag banggi.+ 17 Pag an panganuron minaitaas hali sa tolda, tulos-tulos na minahali an mga Israelita,+ asin kun sain na lugar magpundo an panganuron, diyan minakampo an mga Israelita.+ 18 Sa pagbuot ni Jehova, minahali an mga Israelita, asin sa pagbuot ni Jehova, nagkakampo sinda.+ Sagkod na nagdadanay an panganuron sa ibabaw kan tabernakulo, nagdadanay sinda sa saindang kampo. 19 Pag an panganuron nagdadanay sa ibabaw kan tabernakulo sa laog nin dakul na aldaw, sinusunod kan mga Israelita si Jehova asin dai sinda naghahali.+ 20 Kun minsan, nagdadanay an panganuron nin nagkapirang aldaw sa ibabaw kan tabernakulo. Sa pagbuot ni Jehova, nagdadanay sinda sa saindang kampo, asin sa pagbuot ni Jehova, minahali sinda. 21 Kun minsan, magdamlag sanang nagdadanay an panganuron, asin pag uminitaas na iyan pagkaaga, minahali na sinda. Aldaw man o banggi, pag nag-itaas an panganuron, minahali sinda.+ 22 Duwang aldaw man iyan, sarong bulan, o mas halawig pa, sagkod na nagdadanay an panganuron sa ibabaw kan tabernakulo, nagdadanay an mga Israelita sa saindang kampo asin dai sinda naghahali. Pero pag nag-itaas na iyan, minahali na sinda. 23 Sa pagbuot ni Jehova nagkakampo sinda, asin sa pagbuot ni Jehova minahali sinda. Nagkuyog sinda ki Jehova; sinunod ninda an pagbuot ni Jehova paagi ki Moises.