Jeremias

44 Ini an tataramon na uminabot ki Jeremias para sa gabos na Judio na nag-iistar sa daga nin Ehipto,+ idtong mga nag-iistar sa Migdol,+ Tapanhes,+ Nof,*+ asin sa daga nin Patros:+ 2 “Ini an sabi ni Jehova na pamayo nin mga hukbo, an Diyos kan Israel, ‘Nahiling nindo an gabos na kapahamakan na ipinaabot ko sa Jerusalem+ saka sa gabos na siyudad kan Juda, asin ngunyan garaba na an mga iyan asin mayong nag-iistar.+ 3 Huli ini sa maraot na mga bagay na ginibo ninda tanganing paangguton ako. Naghahali sinda tapos nag-aatang+ saka naglilingkod sa ibang mga diyos na dai ninda midbid, na dai nindo midbid ni kan mga apuon nindo.+ 4 Padagos kong isinusugo sa saindo an gabos kong lingkod na propeta; pauruutro ko sindang isinusugo* tanganing sabihon sa saindo: “Dai tabi nindo paggibuhon an makababalding bagay na ini na ikinakaungis ko.”+ 5 Pero dai sinda nagdangog o nagtaong atensiyon;* dai ninda tinalikdan an saindang karatan—dai ninda ipinundo an mga pag-atang ninda sa ibang mga diyos.+ 6 Kaya an sakong pagkaungis asin kaanggutan iinula asin nag-arab-adab sa mga siyudad kan Juda saka sa mga tinampo kan Jerusalem, asin ta nagin kagabaan an mga iyan asin tiwangwang na lugar, arog kan kamugtakan kan mga iyan sa ngunyan.’+

7 “Asin ngunyan ini an sabi ni Jehova, an Diyos na pamayo nin mga hukbo, an Diyos kan Israel, ‘Taano baya ta nagdadara kamo nin dakulang kapahamakan sa sadiri* nindo, na huli kaini mapapara sa Juda an lambang lalaki asin babayi, aki asin umboy, sagkod na mayo nang matada saindo? 8 Taano ta pinapaanggot nindo ako paagi sa mga gibo kan saindong mga kamot, paagi sa pag-atang sa ibang mga diyos sa daga nin Ehipto kun sain kamo nagduruman tanganing mag-istar? Mapapara kamo asin magigin kamong sarong bagay na sasambiton kan gabos na nasyon sa daga sa saindang pagmaldisyon asin magigin kamong sarong katuyawan sa tahaw ninda.+ 9 Nalingawan na daw nindo su mga maraot na ginibo kan mga apuon nindo asin su mga maraot na ginibo kan mga hadi kan Juda+ asin su mga maraot na ginibo kan mga agom ninda,+ pati na an saindo mismong mga maraot na ginibo saka an mga maraot na ginibo kan mga agom nindo+ sa daga nin Juda asin sa mga tinampo kan Jerusalem? 10 Sagkod sa aldaw na ini, dai sinda nagpapakumbaba,* dai sinda nagpapahiling nin pagkatakot,+ ni sinusunod man ninda an sakong katugunan asin an sakong mga reglamento na itinao ko sa saindo saka sa mga apuon nindo.’+

11 “Kaya ini an sabi ni Jehova na pamayo nin mga hukbo, an Diyos kan Israel, ‘Nagdesisyon na akong magpaabot sa saindo nin kapahamakan, tanganing laglagon an bilog na Juda. 12 Asin kukuanon ko an mga natada sa Juda na desidido sa desisyon nindang magpasiring sa daga nin Ehipto tanganing diyan mag-istar, asin gabos sinda mapapara sa daga nin Ehipto.+ Mabaragsak sinda paagi sa espada asin mapapara paagi sa tiggutom; puon sa pinakahamak sagkod sa pinakaprominente, magagadan sinda sa espada asin sa tiggutom. Asin magigin sindang sarong sumpa, sarong bagay na magigin dahilan na an mga tawo tarakigan, sarong maldisyon, asin sarong katuyawan.+ 13 Papadusahan ko an mga nag-iistar sa daga nin Ehipto kun paanong pinadusahan ko an Jerusalem paagi sa espada, tiggutom, asin epidemya.*+ 14 Asin an mga natada sa Juda na nagpasiring sa daga nin Ehipto tanganing diyan mag-istar dai makakadulag o makakaligtas para magbalik sa daga nin Juda. Mamawuton nindang* magbalik asin mag-istar duman, pero dai sinda makakabalik, apuwera sa pira sanang makakadulag.’”

15 An gabos na lalaking nakakaaram na nag-aatang sa ibang mga diyos an mga agom ninda saka an gabos na agom na babayi na nagtitindog duman, na sarong dakulang grupo, asin an bilog na banwaan na nag-iistar sa daga nin Ehipto,+ sa Patros,+ nagsimbag ki Jeremias: 16 “Dai kami magdadangog sa tataramon na sinabi mo sa samo sa ngaran ni Jehova. 17 Imbes, talagang gigibuhon mi an lambang tataramon na sinabi mi, an mag-atang sa Reyna kan Langit* asin magbubo nin mga dulot na inumon para sa saiya,+ arog kan ginibo mi, kan mga apuon mi, kan mga hadi mi, asin kan mga pamayo* mi sa mga siyudad kan Juda asin sa mga tinampo kan Jerusalem kaidtong nababasog kami nin tinapay asin maginhawa an buhay, kaidtong mayo man lamang kaming nahihiling na kapahamakan. 18 Puon kan magpundo kaming mag-atang sa Reyna kan Langit* asin magbubo nin mga dulot na inumon para sa saiya, kinakapos na kami asin nauubos sa espada saka sa tiggutom.”

19 Sinabi man kan mga babayi: “Asin pag kami nag-aatang sa Reyna kan Langit* asin nagbububo nin mga dulot na inumon para sa saiya, bakong ginigibo mi iyan ta pigtugutan kami kan mga agom mi na maggibo nin mga atang na tinapay na hinurmang kaitsura niya asin na magbubo nin mga dulot na inumon para sa saiya?”

20 Dangan sinabi ni Jeremias sa bilog na banwaan, sa mga lalaki asin sa mga agom ninda saka sa gabos na tawong nakikipag-ulay sa saiya: 21 “An mga atang nindo, kan mga apuon nindo, kan mga hadi nindo, kan mga pamayo* nindo, asin kan mga namamanwaan,* na idinulot duman sa mga siyudad kan Juda saka sa mga tinampo kan Jerusalem+—nagirumduman an mga iyan ni Jehova asin nakaabot an mga iyan sa puso niya! 22 Kan huri, dai na matios ni Jehova an saindong maraot na mga gibo-gibo asin an makababalding mga bagay na ginibo nindo, kaya nalaglag an saindong daga, nagin sarong bagay na dahilan para an mga tawo tarakigan asin sarong bagay na sasambiton sa pagmaldisyon sa iba, asin mayong nag-iistar, arog kan nangyayari sa ngunyan.+ 23 Huli iyan sa pagdulot nindo kan mga atang na ini asin huling nagkasala kamo ki Jehova paagi sa dai pagkuyog sa boses ni Jehova asin dai pagsunod sa saiyang katugunan, mga reglamento, asin mga pagirumdom, kun kaya nag-abot sa saindo an kapahamakan na ini, arog kan nangyayari sa ngunyan.”+

24 Padagos pang sinabi ni Jeremias sa bilog na banwaan asin sa gabos na babayi: “Danguga nindo an tataramon ni Jehova, kamo gabos na taga Juda na nasa daga nin Ehipto. 25 Ini an sabi ni Jehova na pamayo nin mga hukbo, an Diyos kan Israel, ‘Kun ano an itinaram kan saindong nguso asin kan nguso kan mga agom nindong babayi, iyo man an ginibo kan mga kamot nindo, huling sinabi nindo: “Talagang uutubon mi an mga promesa ming mag-atang sa Reyna kan Langit* asin magbubo nin mga dulot na inumon para sa saiya.”+ Talagang uutubon nindong mga babayi an mga promesa nindo asin gigibuhon an mga iyan.’

26 “Kaya danguga nindo an tataramon ni Jehova, kamo gabos na taga Juda na nag-iistar sa daga nin Ehipto: ‘“Minasumpa ako base sa sadiri kong dakulang pangaran,” an sabi ni Jehova, “na an sakuyang pangaran dai na sasambiton sa panunumpa kan siisay man na taga Juda+ sa bilog na daga nin Ehipto na nagsasabi, ‘Isinusumpa ko sa ngaran kan buhay na Soberanong Kagurangnan na Jehova!’+ 27 Binabantayan ko sinda ngunyan tanganing paabutan nin kapahamakan asin bako nin sarong bagay na marahay;+ an gabos na taga Juda na nasa daga nin Ehipto magagadan sa espada asin tiggutom, sagkod na mapara sinda.+ 28 Diit sana an makakadulag sa espada asin makakabalik sa daga nin Juda hali sa daga nin Ehipto.+ Dangan maaaraman kan gabos na natada sa Juda na nagpasiring sa daga nin Ehipto tanganing diyan mag-istar kun kiisay na tataramon an nagkatotoo, su sakuya o su sainda!”’”

29 “‘Asin ini an tanda para sa saindo,’ an sabi ni Jehova, ‘na papadusahan ko kamo sa lugar na ini, tanganing maaraman nindo na talagang magkakatotoo an mga sinabi kong kapahamakan na maabot sa saindo. 30 Ini an sabi ni Jehova: “Si Faraon Hofra, na hadi kan Ehipto, itatao ko sa kamot kan mga kalaban niya asin sa kamot kan mga gustong gumadan sa saiya,* kun paanong itinao ko si Hading Zedekias kan Juda sa kamot ni Hading Nabucodonosor* kan Babilonya, na kalaban niya asin gustong gumadan kaidto sa saiya.”’”*+