SURAT SA MGA TAGA COLOSAS

1 Ako, si Pablo, sarong apostol ni Cristo Jesus paagi sa kabutan nin Diyos, asin kaiba ko si Timoteo+ na satuyang tugang. 2 Sa mga banal asin maimbod na mga tugang sa Colosas na kasaro ni Cristo:

Mapasaindo an daing kapantay na kabuutan asin katuninungan na hali sa Diyos na satuyang Ama.

3 Pirmi kaming nagpapasalamat sa Diyos, an Ama kan satuyang Kagurangnan na Jesu-Cristo, pag ipinapamibi niyamo kamo, 4 huling nabaretaan mi an mapadapit sa pagtubod nindo ki Cristo Jesus asin an saindong pagkamuot sa gabos na mga banal 5 dahil sa paglaom na nakatagama para sa saindo sa langit.+ Nadangog nindo kaidto an manungod sa paglaom na ini paagi sa mensahe nin katotoohan kan maugmang bareta 6 na nakaabot sa saindo. Kun paanong an maugmang bareta padagos na nagkakaigwa nin bunga asin naglalakop sa bilog na kinaban,+ arog man kaiyan an nangyayari sa tahaw nindo puon kan aldaw na nadangog nindo asin naaraman nin lubos* kun ano man nanggad an daing kapantay na kabuutan nin Diyos. 7 Iyan an nanudan nindo sa samong namumutan na kapwa uripon na si Epafras,+ na sarong maimbod na ministro kan Cristo na naglilingkod kasalihid niyamo. 8 Ipinaisi man niya sa samuya an manungod sa saindong pagkamuot na napatalubo paagi sa espiritu.*

9 Iyan an dahilan kaya puon kan aldaw na maaraman mi iyan, dai kami nagpundo sa pagpamibi para sa saindo+ asin sa paghagad na lugod mapano kamo nin tamang kaaraman+ mapadapit sa saiyang kabutan, kasabay an lubos na kadunungan asin espirituwal na pakasabot,+ 10 para makalakaw kamo nin maninigo para ki Jehova* tanganing lubos siyang mapaugma mantang kamo padagos na namumunga sa lambang marahay na gibo asin padagos na nadadagdagan an saindong tamang kaaraman manungod sa Diyos;+ 11 asin lugod na tawan kamo kan gabos na kusog na kaipuhan nindo paagi sa saiyang mamuraway na kapangyarihan+ tanganing lubos kamong makatagal na may pagpapasensiya* asin kaugmahan, 12 mantang pinapasalamatan nindo an Ama, na nagpangyari sa saindo na magin kuwalipikadong mag-ako kan mana na para sa mga banal+ na yaon sa liwanag.

13 Ilinigtas niya kita sa awtoridad kan kadikluman+ asin ibinalyo kita sa kahadian kan saiyang namumutan na Aki, 14 na huli sa sarong iyan napatalingkas kita paagi sa pantubos, na nangangahulugan nin kapatawadan kan satuyang mga kasalan.+ 15 Siya an ladawan kan Diyos na dai nahihiling,+ an panganay sa gabos na linalang;+ 16 huli ta paagi sa saiya, an gabos na iba pang bagay linalang sa langit asin sa daga, an mga bagay na nahihiling saka an mga bagay na dai nahihiling,+ iyan man mga trono o mga pamamahala o mga gobyerno o mga awtoridad. An gabos na iba pang bagay linalang paagi sa saiya+ asin para sa saiya. 17 Saro pa, siya an nainot sa gabos na iba pang bagay,+ asin paagi sa saiya an gabos na iba pang bagay nag-eksister, 18 asin siya an payo kan hawak,* an kongregasyon.+ Siya an kapinunan, an panganay hali sa mga gadan,+ tanganing siya an magin inot* sa gabos na bagay; 19 huli ta pinagmarhay nin Diyos na siya magin lubos sa gabos na bagay,+ 20 asin na paagi sa saiya mangyari an pakipag-ulian sa Saiya kan gabos na iba pang bagay,+ iyan man iyo an mga bagay sa daga o an mga bagay sa langit. An pakipagkatuninungan na iyan sa Diyos nagin posible paagi sa dugo+ na pinabulos niya sa hariging pasakitan.*

21 Iyo, kamo na mga dating napasuway asin mga kaiwal huling an mga isip nindo kaidto yaon sa mga gibong maraot, 22 pinangyari ngunyan nin Diyos na kamo makipag-ulian sa Saiya paagi sa pisikal na hawak kan sarong iyan paagi sa saiyang kagadanan, tanganing ikapresentar kamo na banal asin daing digta saka dai nin ikakaakusar sa atubangan Niya+— 23 siyempre, basta magdanay kamo sa pagtubod,+ na masarig na nakatindog sa pundasyon+ asin marigon,+ na dai nadadara parayo sa paglaom na dara kan maugmang baretang ini na nadangog nindo asin na ihinulit sa gabos na linalang sa sirong kan langit.+ Ako, si Pablo, nagin ministro kan maugmang baretang ini.+

24 Nag-uugma ako ngunyan sa pagsakit ko alang-alang sa saindo,+ asin nag-aagi ako nin mga kasakitan na kapareho kan ki Cristo, pero an mga inaagihan kong kasakitan na ini sa sakuyang hawak kulang pa alang-alang sa saiyang hawak,+ na iyo an kongregasyon.+ 25 Nagin ministro ako kan kongregasyon na ini kauyon kan responsabilidad+ na itinao sa sako nin Diyos para sa kapakanan nindo tanganing maihulit nin lubos an tataramon nin Diyos, 26 an sagradong hilom*+ na itinago sa nag-aging mga sistema nin mga bagay*+ asin sa nag-aging mga henerasyon. Pero ngunyan ihinayag iyan sa saiyang mga banal;+ 27 pinagmarhay nin Diyos na ipahayag sa sainda an dakulaon na kayamanan na yaon sa sagradong hilom+ na ini na ipinapahayag sa mga nasyon, na iyo an saindong pagigin kasaro ni Cristo, an paglaom na mag-ako kan saiyang kamurawayan.+ 28 Siya iyo an satuyang ibinabalangibog, na sinasadol an lambang saro asin tinutukduan an lambang saro nin may lubos na kadunungan, tanganing ikapresentar niyato an lambang tawo bilang nakaabot sa kalubusan kan saiyang pagigin kasaro ni Cristo.+ 29 Sa katuyuhan na ini kaya ako nagpapagal nanggad, na maigot na naghihinguwa sa tabang kan saiyang kusog na mapuwersang naghihiro sa sakuya.+

2 Huli ta gusto kong marealisar nindo kun gurano kadakulang pagmamaigot an ginigibo ko para sa saindo asin para sa mga taga Laodicea+ saka para duman sa gabos na dai pa ako nahihiling nin personal.* 2 Gusto ko kaya na maranga+ an saindang puso asin na sinda may pagkauruyon na mabugkos sa pagkamuot+ asin magkaigwa kan gabos na kayamanan na resulta kan lubos na kasiyertuhan kan saindang pakasabot, asin makamtan ninda an tamang kaaraman manungod sa sagradong hilom nin Diyos, na iyo an Cristo.+ 3 Maingat na nakatago sa saiya an gabos na mahalagang marhay na kadunungan asin kaaraman.+ 4 Sinasabi ko ini tanganing mayo nin siisay man na makadaya sa saindo gamit an nakakaengganyar na mga argumento. 5 Maski ngani mayo ako diyan, nasa isip ko kamo,* asin nauugma akong maaraman an saindong pagigin areglado+ asin an karigunan kan saindong pagtubod ki Cristo.+

6 Kaya, kun paanong inako nindo si Cristo Jesus na Kagurangnan, padagos kamong maglakaw na kasaro niya, 7 na pinapasarig an pagkakagamot sa saiya saka pinapakusog an sadiri paagi sa saiya+ asin na pinaparigon an sadiri sa pagtubod,+ arog kan itinukdo sa saindo, asin na nagpapahayag nin labi-labing pasasalamat.+

8 Mag-ingat kamo na dai kamo mabiktima* nin siisay man paagi sa pilosopiya asin sa daing saysay na nakakadayang mga ideya+ basado sa tradisyon nin mga tawo, basado sa pundamental na mga bagay kan kinaban asin bakong basado ki Cristo; 9 huli ta yaon nanggad sa saiya sa lubos na paagi an mga karakteristiko nin pagkadiyos.+ 10 Kaya igwa kamo kan gabos paagi sa saiya, an saro na iyo an pamayo kan gabos na gobyerno asin awtoridad.+ 11 Huli kan saindong relasyon sa saiya, tinuri man kamo bakong paagi sa mga kamot, kundi paagi sa paghali sa makalaman na hawak,+ sarong pagturi na iyo an dapat para sa mga parasunod kan Cristo.+ 12 Huli ta ilinubong kamo kaiba niya sa saiyang bawtismo,+ asin dahil sa saindong relasyon sa saiya, ibinangon man kamong kaiba niya+ paagi sa saindong pagtubod sa makapangyarihan na gibo nin Diyos, na nagbangon sa saiya hali sa mga gadan.+

13 Dugang pa, maski ngani kamo dating gadan huli kan saindong mga pagkakasala asin nasa kamugtakan na bakong turi sa laman, binuhay kamo nin Diyos kaiba niya.+ May kabuutan niyang pinatawad an gabos tang mga pagkakasala+ 14 saka pinara* an surat-kamot na dokumento+ na kompuwesto nin mga pagbuot+ asin nagpapatotoo laban sa sato.+ Hinali niya iyan paagi sa pagpako kaiyan sa hariging pasakitan.*+ 15 Paagi kaiyan,* hinubaan niya an mga gobyerno saka an mga awtoridad asin ipinahiling sinda sa publiko na siring sa mga bihag,+ na iminamartsa sinda sa sarong parada nin trayumpo.

16 Kaya dai nindo pagtugutan na husgaran kamo nin siisay man manungod sa kinakakan asin iniinom nindo+ o manungod sa pagselebrar nin kapiyestahan o nin bagong bulan+ o nin sabbath.+ 17 An mga bagay na idto anino kan mga bagay na maabot,+ pero an talagang tunay iyo an Cristo.+ 18 Dai nindo pagtugutan na mawara sa saindo an premyo+ dahil sa kagigibuhan nin sarong tawong nauugma sa sagin-sagin na kapakumbabaan asin sa pagsamba sa mga anghel,* sarong tawo na “naninindugan sa”* mga bagay na nahiling niya. An totoo, an pag-orgulyo niya mayo man talaga nin basehan huling an saiyang isip makalaman, 19 asin dai siya nangangapot nin higot sa payo,+ sa saro na paagi sa saiya an bilog na hawak natatawan kan kaipuhan kaini asin may pagkauruyon na pinagkokoronektar kan mga sugpunan saka mga litid kaiyan asin nagtatalubo sa tabang kan kapangyarihan nin Diyos.+

20 Kun kamo nagadan kaiba ni Cristo may koneksiyon sa pundamental na mga bagay kan kinaban,+ taano ta nabubuhay kamo na garo baga kabtang pa kamo kan kinaban paagi sa padagos na pagsunod sa mga pagbuot na ini:+ 21 “Dai kamo magkapot, ni magnamit, ni magdutdot,” 22 mga pagbuot na may koneksiyon sa mga bagay na nawawara pagkatapos na kakanon saka inumon? Mga pagbuot man sana iyan saka katukduan nin tawo.+ 23 Dawa ngani garo baga may kadunungan sa mga iyan, an mga iyan paagi nin pagsamba uyon sa sadiring kabutan asin pagpahiling nin sagin-sagin na kapakumbabaan, na pinapasakitan an sadiring hawak.+ Pero dai iyan nakakatabang sa mga tawo na malabanan an mga kamawutan kan laman.

3 Alagad, kun kamo ibinangon kaiba kan Cristo,+ padagos nindong hanapon an mga bagay na nasa itaas, kun sain nakatukaw an Cristo sa tuo* nin Diyos.+ 2 Padagos nindong isentro an saindong isip sa mga bagay na nasa itaas,+ bako sa mga bagay na nasa daga.+ 3 Huli ta nagadan kamo, asin an saindong buhay maingat na nakatago ki Cristo na kasaro nin Diyos. 4 Pag maihayag na an Cristo, na iyo an satuyang buhay,+ maihahayag man kamo kaiba niya sa kamurawayan.+

5 Kaya, gadanon nindo an mga kabtang kan saindong hawak+ na yaon digdi sa daga kun manungod sa seksuwal na imoralidad,* karigsukan,* daing kontrol na seksuwal na hurot,+ nakakadanyar na pagmawot, asin kahanaban,* na sarong klase nin idolatriya. 6 Dahil sa mga bagay na iyan kaya maabot an grabeng kaanggutan* nin Diyos. 7 Arog man kaiyan kaidto an nagin paggawi* nindo sa dati nindong pamumuhay.+ 8 Pero ngunyan, dapat nindong haralion iyan gabos sa saindo: pagkaungis, pagkaanggot, karatan,+ mapang-insultong pagtaram,+ asin bastos na pananaram+ na minaluwas sa saindong nguso. 9 Dai kamo magputik sa lambang saro.+ Hubaon nindo an lumang personalidad*+ kasabay an mga gibo kaiyan, 10 asin isulot nindo an bagong personalidad,+ na paagi sa tamang kaaraman ginigibong bago uyon sa ladawan kan Saro na naglalang kaiyan,+ 11 na kun sain bako nang mahalaga kun an saro Griego o Judio, tinuri o dai tinuri, dayuhan, Escita,* uripon, o talingkas; sa bagong personalidad na iyan, si Cristo iyo an gabos asin nasa gabos.+

12 Huli kaiyan, bilang mga pinili+ nin Diyos, banal asin namumutan, isulot nindo an mapagpadangat na pagmalasakit,+ kabuutan, kapakumbabaan,*+ kahuyuan,*+ asin pagkamapasensiya.*+ 13 Padagos na pagpasensiyahan an lambang saro asin lubos na patawadon an lambang saro+ dawa pa kun an siisay man igwa nin dahilan na ireklamo an saro.+ Kun paanong lubos kamong pinatawad ni Jehova,* iyo man an dapat nindong gibuhon.+ 14 Apuwera pa kan gabos na iyan, isulot nindo an pagkamuot,+ huli ta iyan bugkos nin lubos na pagkasararo.*+

15 Siring man, pabayaan an katuninungan kan Cristo na maghadi* sa saindong puso,+ huli ta inapod kamo tanganing magkaigwa kan katuninungan na iyan bilang sarong hawak. Asin ipahiling nindo na mapagpasalamat kamo. 16 Pabayaing an tataramon kan Cristo biyong makatadom* sa saindo asin magtao sa saindo nin lubos na kadunungan. Padagos na tukduan asin pakusugon* an lambang saro paagi sa mga salmo,+ mga pag-umaw sa Diyos, mga kantang pang-espirituwal na kinakanta na may pasasalamat,* asin sa saindong puso padagos kamong umawit ki Jehova.*+ 17 Ano man an saindong itinataram o ginigibo, gibuhon an gabos sa ngaran kan Kagurangnan na Jesus, na pinapasalamatan an Diyos na Ama paagi sa saiya.+

18 Kamong mga agom na babayi, magpasakop kamo sa saindong mga agom na lalaki,+ na iyo an maninigong gibuhon kan mga parasunod kan Kagurangnan. 19 Kamong mga agom na lalaki, padagos na mamutan an saindong mga agom na babayi+ asin dai maanggot sa sainda nin may kapaitan.*+ 20 Kamong mga aki, magin masinunod kamo sa saindong mga magurang sa gabos na bagay,+ huli ta nakakapaugma ini sa Kagurangnan. 21 Kamong mga ama, dai nindo pag-uyamon* an saindong mga aki,+ tanganing dai sinda pangluyahan nin buot.* 22 Kamong mga uripon, magin masinunod kamo sa saindong mga kagurangnan na tawo*+ sa gabos na bagay, bako sanang pag sinda nagbabantay, para lang mapaugma an mga tawo,* kundi ginigibo an mga bagay na may sinserong puso asin pagkatakot ki Jehova.* 23 Ano man an saindong ginigibo, gibuhon nindo iyan nin bilog na kalag* na garo ginigibo nindo iyan para ki Jehova,*+ asin bakong para sa mga tawo, 24 huling aram nindo na ki Jehova* kamo mag-aako kan mana bilang balos.+ Magpauripon kamo sa Kagurangnan, ki Cristo. 25 Siguradong an saro na naggigibo nin sala babaluson sa sala niyang ginibo,+ huling mayong pinapalain an Diyos.+

4 Kamong mga kagurangnan, tratuhon nindo nin tama asin makatanusan* an saindong mga uripon, mantang aram nindo na igwa man kamo nin Kagurangnan sa langit.+

2 Magin matiyaga sa pagpamibi,+ na nagdadanay na mata may koneksiyon diyan, asin magin mapagpasalamat.+ 3 Kadungan kaiyan, ipamibi man nindo kami,+ na lugod magbukas nin pintuan an Diyos para sa saiyang tataramon, tanganing ikapahayag mi an sagradong hilom manungod sa Cristo, na huli kaiyan ako nakapreso,+ 4 asin tanganing maibalangibog ko nanggad iyan nin malinaw arog kan dapat kong gibuhon.

5 Padagos na maglakaw na may kadunungan pag kaibanan nindo an mga taga luwas, na ginagamit sa pinakamarahay an saindong panahon.*+ 6 Pirmi lugod na magin mabuot an saindong pagtaram, na tinimplahan nin asin,+ tanganing maaraman nindo kun paano dapat magsimbag sa lambang tawo.+

7 Si Tiquico,+ na sakuyang namumutan na tugang saka sarong maimbod na ministro asin kapwa ko uripon na naglilingkod sa Kagurangnan, iyo an masaysay sa saindo kan gabos na bagay manungod sa sako. 8 Isinusugo ko siya sa saindo tanganing maaraman nindo an samuyang kamugtakan asin tanganing maranga niya an saindong puso. 9 Kaiba niya si Onesimo,+ an maimbod asin namumutan kong tugang, na taga diyan sa saindo; isasaysay ninda sa saindo an gabos na nangyayari digdi.

10 Si Aristarco,+ na kapwa ko preso, nagpapaabot sa saindo kan saiyang pangungumusta, asin iyo man si Marcos+ na pinsan ni Bernabe (mapadapit sa saiya may tugon sa saindo na maugma siyang akuon+ kun magdiyan siya sa saindo), 11 asin si Jesus na inaapod na Justo, na mga kabilang sa mga tinuri. Sinda sana an mga kapwa ko trabahador para sa Kahadian nin Diyos, asin nagi sindang dakulang karangahan* sa sakuya. 12 Si Epafras,+ na sarong uripon ni Cristo Jesus na taga diyan sa saindo, nagpapakumusta sa saindo. Pirmi siyang udok na namimibi para sa saindo, tanganing padagos kamong makapanindugan nin lubos asin magkaigwa nin makusog na pananarig sa bilog na kabutan nin Diyos. 13 Huli ta saksi ako na maigot siyang naghihinguwa para sa saindo asin para duman sa mga taga Laodicea saka mga taga Hierapolis.

14 Si Lucas,+ an namumutan na doktor, nagpapaabot kan saiyang pangungumusta sa saindo, asin iyo man si Demas.+ 15 Pakikumusta ako sa mga tugang sa Laodicea asin ki Nimfa saka sa kongregasyon na nagtitiripon sa harong niya.+ 16 Asin pag nabasa na an surat na ini sa saindo, iareglo nindo na mabasa+ man ini sa kongregasyon kan mga taga Laodicea asin na mabasa man nindo an surat ko sa Laodicea. 17 Saro pa, sabihon nindo ki Arquipo:+ “Tawan mo nin atensiyon an ministeryong inako mo hali sa Kagurangnan, tanganing maisagibo mo iyan.”

18 Ako, si Pablo, nagpapaabot kan sakuyang pangungumusta. Kamot ko mismo an nagsurat kaini.+ Pirmi nindong girumdumon an sakuyang pagkakapreso.+ Mapasaindo an daing kapantay na kabuutan.