INOT NA SURAT SA MGA TAGA TESALONICA

1 Ako, si Pablo, asin kaiba ko si Silvano*+ saka si Timoteo.+ Sa kongregasyon kan mga taga Tesalonica na kasaro nin Diyos na Ama asin kan Kagurangnan na Jesu-Cristo:

Mapasaindo an daing kapantay na kabuutan asin katuninungan.

2 Pirmi kaming nagpapasalamat sa Diyos pag sinasambit mi kamo gabos sa samuyang mga pamibi,+ 3 huli ta padagos ming ginigirumdom sa atubangan kan satuyang Diyos asin Ama an mga bagay na ginibo nindo dahil sa saindong pagtubod, an saindong mamumuton na pagpapagal, asin an saindong pakatagal huli sa paglaom+ nindo sa satuyang Kagurangnan na Jesu-Cristo. 4 Huli ta aram mi, mga tugang na namumutan nin Diyos, an mapadapit sa pagpili niya sa saindo, 5 huling an maugmang bareta na ihinulit mi dai nag-abot sa saindo na gabos sana tataramon, kundi nag-abot iyan sa saindo na may puwersa asin may paggiya kan banal na espiritu saka may makusog na kumbiksiyon, asin aram nindo kun nagin anong klaseng tawo kami alang-alang sa saindo. 6 Asin nagin mga paraarog kamo sa samo+ asin sa Kagurangnan,+ huling inako nindo an mensahe na may kaugmahan na hali sa banal na espiritu sa ibong nin dakul na kasakitan,+ 7 kaya ngani nagin halimbawa kamo sa gabos na mga nagtutubod sa Macedonia asin sa Acaya.

8 An totoo, bako sanang sa Macedonia asin Acaya nadangog an tataramon ni Jehova* nin dahil sa saindo, kundi nabaretaan man sa gabos na lugar an mapadapit sa pagtubod nindo sa Diyos,+ kaya dai mi na kaipuhan pang magsabi nin ano man. 9 Huli ta sinda mismo an sigeng istorya manungod sa inot ming pagkanumpong sa saindo saka kun paano nindo binayaan an saindong mga idolo+ tanganing magin mga uripon kan buhay asin tunay na Diyos, 10 asin tanganing maghalat sa pag-abot hali sa langit kan saiyang Aki,+ na ibinangon niya hali sa mga gadan, si Jesus, na iyo an maligtas sa sato sa nagdadangadang na grabeng kaanggutan.*+

2 Siguradong aram mismo nindo, mga tugang, na dai nagin sayang an pagdalaw mi sa saindo.+ 2 Huli ta maski ngani nagsakit nguna kami asin trinato nin daing galang sa Filipos,+ arog kan aram nindo, nagtipon kami nin kusog nin buot sa tabang kan satuyang Diyos tanganing sabihon sa saindo an maugmang bareta nin Diyos+ sa ibong nin dakul na pagkontra.* 3 Asin an sinserong sadol na itinatao mi bakong base sa salang mga ideya o dahil sa maraot na motibo saka dai man iyan nin kalabot na pandadaya, 4 imbes, dahil ibinilang kami nin Diyos na angay na pagkatiwalaan kan maugmang bareta, nagpapahayag kami tanganing mapaugma, bako an mga tawo, kundi an Diyos, na nagsisiyasat kan samong puso.+

5 Sa katunayan, aram nindo na dai kami kasuarin man naggamit nin mabuladas na pananaram, asin dai mi man itinago an tunay ming pagkatawo dahil sa mahanab na mga motibo;+ saksi an Diyos! 6 Dai mi man pigmawot na pamurawayon nin mga tawo, hali man sa saindo o sa iba, dawa ngani puwede kuta kaming magin pagabat sa saindo sa pinansiyal bilang mga apostol ni Cristo.+ 7 Imbes, nagin mabuot an pagtrato mi sa saindo kan kaibanan nindo kami, arog nin sarong nagpapasusong ina na mapagpadabang inaasikaso an saiyang mga aki. 8 Kaya dahil sa hararom ming pagkamuot sa saindo, nagin determinado* kaming itao sa saindo, bako sana an maugmang bareta nin Diyos kundi pati mismo an samuyang sadiri,*+ huli ta napamahal na nanggad kamo sa samo.+

9 Mga tugang, siguradong nagigirumduman nindo an samuyang pagtrabaho nin magabat asin an samong pagpapagal. Aldaw-banggi kaming nagtrabaho, tanganing dai mi mapagabatan sa pinansiyal an siisay man sa saindo,+ kan ihinulit mi sa saindo an maugmang bareta nin Diyos. 10 Mga saksi kamo, pati na an Diyos, kun paano kami guminawi nin maimbod asin matanos saka daing katuyawan diyan sa saindo na mga nagtutubod. 11 Aram na aram nindo kun paano kami padagos na nagsadol asin nagranga sa saindo saka nagtao nin paggiya sa lambang saro sa saindo,+ siring sa ginigibo nin sarong ama+ sa saiyang mga aki, 12 tanganing padagos kamong maglakaw sa paaging inuuyunan nin Diyos,+ na nag-apod sa saindo sa saiyang Kahadian+ asin kamurawayan.+

13 Sa katunayan, iyan an dahilan kaya dai man kami minapundo sa pagpasalamat sa Diyos,+ huling kan madangog nindo an tataramon nin Diyos hali sa samuya, inako nindo iyan bako bilang tataramon nin mga tawo, kundi inako nindo iyan sa kun ano talaga iyan, bilang tataramon nin Diyos, na igwa man ngunyan nin epekto sa saindo na mga nagtutubod. 14 Mga tugang, nagi kamong mga paraarog sa mga kongregasyon nin Diyos na kasaro ni Cristo Jesus na yaon sa Judea, huli ta an mga kasakitan na naeksperyensiyahan nindo sa kamot kan sadiri nindong mga kahimanwa+ kapareho man kan mga naeeksperyensiyahan ninda sa kamot kan mga Judio, 15 na guminadan pa ngani sa Kagurangnan na Jesus+ asin sa mga propeta saka nagpersegir sa samo.+ Apuwera kaiyan, naggigibo sinda nin mga dai nakakapaugma sa Diyos, asin kinokontra ninda an mga bagay na nagtataong pakinabang sa gabos na tawo, 16 mala ta hinihinguwa nindang pugulan kami sa ginigibo ming pagpahayag sa mga tawo kan mga nasyon* kun paano sinda maliligtas.+ Huli kaiyan, pirmi nindang pigpaparadagdagan an saindang mga kasalan. Pero ngunyan, aabutan man giraray sinda kan saiyang kaanggutan.+

17 Alagad, mga tugang, kan napasuway kami sa saindo nin halipot na panahon (sa pisikal, bako sa puso mi), ginibo mi an gabos na paghihinguwa para mahiling kamo,* dahil gustong-gusto mi kamong mahiling. 18 Ini an dahilan kaya gusto ming magdiyan sa saindo. Iyo, akong si Pablo, duwang beses akong nagpurbar na magdiyan; pero inulang kami ni Satanas. 19 Huli ta ano an samuyang paglaom o an samuyang kaugmahan o korona nin kagaya-gayahan sa atubangan kan satuyang Kagurangnan na Jesus sa panahon kan saiyang presensiya? Bako daw na kamo?+ 20 Kamo nanggad an samong kamurawayan asin kaugmahan.

3 Kaya kan dai mi na matios an kapungawan sa saindo, naisip mi na pinakamarahay nang magpirmi nguna sa Atenas;+ 2 asin isinugo mi si Timoteo,+ na satuyang tugang asin ministro nin Diyos* na nagpapahayag kan maugmang bareta manungod sa Cristo, para parigunon* kamo asin rangahon kamo mapadapit sa saindong pagtubod, 3 tanganing dai matanyog* kan mga kasakitan na ini an pagtubod nin siisay man. Huli ta kamo mismo nakakaaram na dai niyato malilikayan na dai mag-agi nin arog kaining mga bagay.*+ 4 Kan kaibanan mi baga kamo, pirmi ming sinasabi sa saindo na maagi kita nin kasakitan, asin iyan an nangyari, arog kan aram nindo.+ 5 Kaya, kan dai ko na matios an kapungawan, may isinugo ako tanganing maaraman an mapadapit sa saindong kaimbudan,+ ta tibaad nakakua nin paagi an Paratentar+ na tentaran kamo, asin nasayang sana an samong pagpapagal.

6 Pero kakaabot pa sana ni Timoteo digdi sa samuya hali diyan sa saindo+ asin may dara siyang magayon na bareta manungod sa saindong kaimbudan asin pagkamuot, na pirmi daa nindong nagigirumduman an maugma tang pag-iribanan asin na minamawot nanggad nindong mahiling kami kun paanong minamawot mi man na mahiling kamo. 7 Kaya mga tugang, sa gabos ming kapurisawan* asin kasakitan, nararanga kami nin huli sa saindo asin sa kaimbudan na ipinapahiling nindo.+ 8 Huli ta nabubuhayan kami nin buot* pag naninindugan kamo sa Kagurangnan. 9 Paano daw kami makakapagpasalamat sa Diyos sa dakulaon na kaugmahan na namamatian mi sa atubangan niya nin huli sa saindo? 10 Aldaw-banggi kaming udok na nagngangayo-ngayo* na lugod mahiling mi kamo* asin maitao sa saindo an ano man na kulang pa sa saindong pagtubod.+

11 Lugod na an satuyang Diyos asin Ama saka an satuyang Kagurangnan na Jesus gumibo ngunyan nin paagi para makadiyan kami sa saindo. 12 Apuwera kaiyan, lugod na pangyarihon kan Kagurangnan na mag-urog an saindong pagkamuot sa lambang saro+ saka sa gabos, iyo, na iyan magsupay, kapareho kan pagkamuot mi sa saindo, 13 tanganing maparigon niya an saindong puso, daing katuyawan asin banal sa atubangan kan satuyang Diyos+ asin Ama sa panahon kan presensiya kan satuyang Kagurangnan na Jesus+ kaiba an gabos niyang mga banal.

4 Ultimo, mga tugang, mantang nag-ako kamo nin instruksiyon hali sa samo kun paano kamo dapat maglakaw tanganing mapaugma an Diyos,+ na sa katunayan iyo na an piggigibo nindo, nakikiulay kami sa saindo asin sinasadol mi kamo sa ngaran kan Kagurangnan na Jesus na padagos nindong gibuhon iyan nin mas lubos. 2 Huli ta aram nindo an mga instruksiyon* na itinao mi sa saindo hali sa Kagurangnan na Jesus.

3 Ini kaya an kabutan nin Diyos, na kamo magin banal+ asin maglikay sa seksuwal na imoralidad.*+ 4 An kada saro sa saindo dapat na makanuod kun paano kokontrulon an sadiri niyang hawak*+ para mapagdanay iyan na may kabanalan+ asin dignidad, 5 na dai nagpapadara sa may kapasluan asin daing kontrol na seksuwal na pagmawot+ arog kan ginigibo kan mga tawo kan mga nasyon na dai nakakamidbid sa Diyos.+ 6 Mapadapit sa bagay na ini, mayo nin siisay man an dapat lumampas sa kun ano an maninigo asin mang-aprobetsar sa saiyang tugang, huli ta pinapadusahan ni Jehova* an mga naggigibo kan gabos na bagay na iyan. Manungod diyan, dati mi na kamong sinabihan asin tinawan man nin mapuwersang patanid. 7 Huli ta inapod kita nin Diyos, bakong para sa karigsukan,* kundi para sa kabanalan.+ 8 Kaya an tawong nagbabaliwala kaini nagbabaliwala, bako sa mga tawo, kundi sa Diyos,+ na nagtatao sa saindo kan saiyang banal na espiritu.+

9 Alagad, kun manungod sa pagkamuot na sa-magturugang,+ dai mi na kamo kaipuhan na suratan pa, huling tinukduan mismo kamo nin Diyos na kamutan an lambang saro.+ 10 Sa katunayan, ginigibo nindo iyan sa gabos na tugang sa bilog na Macedonia. Pero dinadagka mi kamo, mga tugang, na padagos nindong gibuhon iyan nin mas urog pa. 11 Magin obheto nindo na mamuhay nin tuninong+ asin na an intindihon sana iyo an sadiri nindong mga bagay-bagay+ asin na magtrabaho gamit an sadiri nindong mga kamot,+ arog kan tugon mi sa saindo, 12 tanganing magibo nindong maglakaw na may disenteng paggawi sa paghiling nin mga tawo sa luwas+ saka dai kamo magkulang nin ano man.

13 Apuwera kaiyan, mga tugang, habo mi na dai kamong pakaaram manungod duman sa mga nagtuturog sa kagadanan,+ tanganing dai kamo magmundo kapareho kan iba na mayong paglaom.+ 14 Huli ta kun kita nagtutubod na si Jesus nagadan asin nagbangon hali sa mga gadan,+ nagtutubod man kita na ibabangon man nin Diyos idtong mga nagturog sa kagadanan na kasaro ni Jesus para makaibanan niya.+ 15 Ini an sinasabi mi sa saindo na basado sa tataramon ni Jehova:* An mga buhay pa sa sato sa panahon kan presensiya kan Kagurangnan dai nanggad maiinot sa mga nagturog na sa kagadanan; 16 huli ta an Kagurangnan mismo mababa hali sa langit na nagtatao nin pagbuot, may boses nin arkanghel+ saka may kapot na trumpeta nin Diyos, asin idtong mga gadan na kasaro ni Cristo maiinot na magbarangon.+ 17 Dangan kita na mga buhay pa aagawon pasiring sa mga panganuron,+ asin makakaibanan niyato sinda tanganing sabaton an Kagurangnan+ sa kaitaasan;* asin sa siring, pirmi ta nang makakaibanan an Kagurangnan.+ 18 Kaya padagos nindong rangahon kan mga tataramon na ini an lambang saro.

5 Kun manungod sa mga panahon asin itinalaan na mga aldaw, mga tugang, dai na kaipuhan na suratan pa kamo. 2 Huli ta aram na aram mismo nindo na an aldaw ni Jehova*+ maabot na kaparehong-kapareho kan pag-abot nin sarong parahabon* sa banggi.+ 3 Sa panahon na sinda nagsasarabi, “Katuninungan asin katiwasayan!” saka man tulos-tulos na maabot sa sainda an biglang pagkalaglag,+ siring sa kulog nin pangangaki na minaabot sa sarong babaying bados, asin dai nanggad sinda makakadulag. 4 Pero kamo, mga tugang, mayo man kamo sa kadikluman para abutan kamo kan aldaw na iyan na garo mga parahabon na inabutan kan liwanag kan aldaw, 5 huli ta gabos kamo mga aki nin liwanag asin mga aki nin aldaw.+ Bako kitang nasa banggi ni nasa kadikluman.+

6 Kaya dai kita magturog arog kan ginigibo kan iba,+ kundi magdanay kitang mata+ asin tultol an pag-iisip.+ 7 Huli ta an mga nagtuturog, nagtuturog sa banggi, asin an mga nagbuburat* burat sa banggi.+ 8 Pero kita na nasa aldaw, papagdanayon tang tultol an satong pag-iisip asin isulot ta an pagtubod saka pagkamuot bilang takop sa daghan asin an paglaom niyatong kaligtasan bilang helmet+ 9 huli ta pinili kita nin Diyos, bako para itagama sa saiyang kaanggutan, kundi tanganing magkamit nin kaligtasan+ paagi sa satuyang Kagurangnan na Jesu-Cristo. 10 Nagadan siya para sa sato,+ tanganing magdanay man kitang mata o nagtuturog man kita,* mabubuhay kitang kaiba niya.+ 11 Kaya, padagos na pakusugon* asin parigunon an lambang saro,+ na sa katunayan iyo na an piggigibo nindo.

12 Ngunyan, mga tugang, nakikiulay kami sa saindo na magpahiling kamo nin paggalang sa mga nagpapagal diyan sa saindo asin nanginginot sa saindo sa paglilingkod sa Kagurangnan saka nagsasadol sa saindo; 13 asin na tawan sinda nin mas urog na pagpapahalaga na may pagkamuot huli kan saindang trabaho.+ Makipagkatuninungan kamo sa lambang saro.+ 14 Sa ibong na kampi, sinasadol mi kamo, mga tugang, na patanidan* an mga pasaway,+ magtaram na may pagranga sa mga nagmumundo nin grabe,* alalayan an mga maluya, magin mapasensiya sa gabos.+ 15 Siguraduhon nindo na dai nin siisay man sa saindo an magbalos nin maraot sa saro na naggibo sa saiya nin maraot,+ kundi pirming pagmaigutan na gumibo nin marahay sa lambang saro asin sa gabos na iba pa.+

16 Pirmi kamong mag-ugma.+ 17 Pirming mamibi.+ 18 Magpasalamat sa gabos na bagay.+ Ini an kabutan nin Diyos para sa saindo bilang mga parasunod ni Cristo Jesus. 19 Dai nindo pagsigbuhon an laad kan espiritu.+ 20 Dai nindo pagbasang-basangon an mga propesiya.+ 21 Siyertuhon an gabos na bagay;+ pangaptan nin higot an marahay. 22 Likayan an gabos na klase nin karatan.+

23 Pabanalon lugod kamo nin lubos kan Diyos nin katuninungan. Asin mga tugang, lugod na an saindong espiritu asin kalag* saka hawak magin marahay sa gabos na aspekto asin mapagdanay na daing digta sa panahon kan presensiya kan satuyang Kagurangnan na Jesu-Cristo.+ 24 Maimbod an saro na nag-aapod sa saindo, asin siguradong gigibuhon niya iyan.

25 Mga tugang, padagos nindo kaming ipamibi.+

26 Kumustahon nindo an gabos na tugang paagi sa hadok na pangmagturugang.*

27 Tinatawan ko kamo nin magabat na paninimbagan sa ngaran kan Kagurangnan na basahon an surat na ini sa gabos na tugang.+

28 Mapasaindo an daing kapantay na kabuutan kan satuyang Kagurangnan na Jesu-Cristo.