IKADUWANG SURAT SA MGA TAGA TESALONICA

1 Ako, si Pablo, asin kaiba ko si Silvano* saka si Timoteo.+ Sa kongregasyon kan mga taga Tesalonica na kasaro nin Diyos na satuyang Ama asin kan Kagurangnan na Jesu-Cristo:

2 Mapasaindo an daing kapantay na kabuutan asin katuninungan hali sa Diyos na Ama asin sa Kagurangnan na Jesu-Cristo.

3 Pirmi kaming nakakamati nin obligasyon na magpasalamat sa Diyos nin huli sa saindo, mga tugang. Tama sana ini, dahil an saindong pagtubod lalong nagkukusog nin nagkukusog asin an pagkamuot kan gabos sa saindo para sa lambang saro lalong nagrararom.+ 4 Kaya ipinag-oorgulyo mi kamo+ sa mga kongregasyon nin Diyos dahil sa saindong pakatagal asin pagtubod sa ibong kan gabos na pagpersegir sa saindo asin kan gabos na kasakitan na inaagihan* nindo.+ 5 Patunay ini na matanos an paghusgar nin Diyos, na dahil kaiyan ibibilang kamong maninigo para sa Kahadian nin Diyos, na alang-alang diyan kamo nagsasakit.+

6 Tunay nanggad, katanusan sa parte nin Diyos na balusan nin kasakitan an mga nagdadara sa saindo nin kasakitan.+ 7 Pero kamo na nag-aagi nin kasakitan tatawan nin kaginhawahan kaibanan niyamo sa panahon na an Kagurangnan na Jesus+ kaiba an makapangyarihan niyang mga anghel ihayag na hali sa langit+ 8 na may naglalaad na kalayo, mantang nagsasagibo siya nin pamamalos sa mga dai nakakamidbid sa Diyos asin sa mga dai nagkukuyog sa maugmang bareta manungod sa satuyang Kagurangnan na Jesus.+ 9 An mga ini mismo huhukuman nin daing sagkod na kalaglagan;+ mawawara sinda sa atubangan kan Kagurangnan saka dai na nuarin man makakahiling kan saiyang mamuraway na kapangyarihan. 10 Mangyayari iyan sa panahon na siya mag-abot para pamurawayon kaiba an saiyang mga banal asin para an gabos na nagtutubod magngaralas sa saiya sa aldaw na iyan, huli ta nagtubod kamo sa samuyang pagpatotoo.

11 Nasa isip an mismong bagay na iyan, pirmi mi kamong ipinapamibi, na lugod ibilang kamo kan satuyang Diyos na maninigo sa saiyang pag-apod+ asin na paagi sa saiyang kapangyarihan isagibo niya nin lubos an gabos na marahay na bagay na saiyang mawot saka pangyarihon na magin mapanggana an gabos na gibo na bunga nin pagtubod. 12 Sa paaging ini, an pangaran kan satuyang Kagurangnan na Jesus mapapamuraway paagi sa saindo asin kamo mapapamuraway man dahil kasaro niya kamo, kauyon kan daing kapantay na kabuutan kan satuyang Diyos asin kan Kagurangnan na Jesu-Cristo.

2 Minsan siring, mga tugang, kun mapadapit sa presensiya kan satuyang Kagurangnan na Jesu-Cristo+ asin sa pagtipon sa sato para makaibanan niya,+ nakikiulay kami sa saindo 2 na dai kamo tulos mawaran kan saindong tamang pag-iisip o mataranta dahil sa sarong ipinasabong na kapahayagan*+ o sa itinaram na mensahe o sa surat na garo baga hali sa samo, na pinapaluwas na nag-abot na an aldaw ni Jehova.*+

3 Dai kamo magpalagalag* sa kiisay man sa ano man na paagi, huli ta dai iyan maabot sagkod na dai nguna mangyari an apostasya+ asin dai nguna mahayag an tawong tampalasan,+ an aki nin kalaglagan.+ 4 Saro siyang kaiwal, saka ilinalangkaw niya an saiyang sadiri sa gabos na inaapod na diyos asin sa lambang bagay na sinasamba,* kaya nagtutukaw siya sa templo nin Diyos, na hayag na nagpepresentar kan saiyang sadiri bilang sarong diyos. 5 Dai nindo nagigirumduman na pirmi kong sinasabi sa saindo an mga bagay na ini kan kaibanan pa nindo ako?

6 Asin ngunyan aram nindo kun ano an nagseserbing pang-ulang,* na huli kaiyan mahahayag sana siya pag panahon niya na. 7 Totoo, an misteryo kan katampalasanan na ini nag-eepekto na,+ pero magdadanay sana iyan na misteryo sagkod na umabot an panahon na mawara na idtong saro na nagseserbi ngunyan na pang-ulang.* 8 Dangan, mahahayag na nanggad ining saro na tampalasan, na lalaglagon kan Kagurangnan na Jesus paagi sa espiritu kan saiyang nguso+ asin paparaon sa panahon kan paghahayag+ kan saiyang presensiya. 9 Pero an presensiya kan saro na tampalasan kagigibuhan ni Satanas,+ na nagtatao sa sarong iyan nin kapangyarihan na magsagibo nin lambang klase nin milagro* asin mapandayang mga tanda saka ngangalásan*+ 10 asin lambang klase nin karatan saka pandadaya+ para duman sa mga mapapara, na iyo an balos sa sainda huling dai ninda inako asin dai ninda namutan an katotoohan na makakapagligtas kuta sa sainda. 11 Iyan an dahilan kaya pinabayaan nin Diyos na mailagalag sinda nin sarong mapandayang impluwensiya para magturubod sinda sa kaputikan,+ 12 tanganing sa siring gabos sinda mahukuman huli ta dai sinda nagtubod sa katotoohan, imbes ikinaugma ninda an karatan.

13 Minsan siring, pirmi kaming nakakamati nin obligasyon na magpasalamat sa Diyos nin huli sa saindo, mga tugang na namumutan ni Jehova,* huling sa kapinunan pa sana pinili kamo+ nin Diyos para sa kaligtasan paagi sa pagpabanal sa saindo+ gamit an saiyang espiritu dahil sa pagtubod nindo sa katotoohan. 14 Inapod niya kamo para digdi paagi sa maugmang bareta na samuyang ipinapahayag, tanganing makamtan nindo an kamurawayan kan satuyang Kagurangnan na Jesu-Cristo.+ 15 Kaya mga tugang, manindugan kamo nin marigon+ asin padagos na mangapot sa mga tradisyon na itinukdo sa saindo,+ iyan man paagi sa mensaheng sinabi sa saindo o paagi sa surat na hali sa samo. 16 Dugang pa, an satuya lugod na Kagurangnan na Jesu-Cristo mismo asin an Diyos na satuyang Ama, na namuot sa sato+ saka nagtao sa sato nin daing sagkod na karangahan asin magayon na paglaom+ paagi sa daing kapantay na kabuutan, 17 an magranga sa saindong puso asin magparigon* sa saindo tanganing pirming marahay an mga ginigibo saka sinasabi nindo.

3 Ultimo, mga tugang, padagos kamong mamibi para sa samo,+ na an tataramon ni Jehova* padagos lugod na maglakop nin marikas+ saka padagos na mapamuraway, arog kan nangyayari diyan sa saindo, 2 asin na mailigtas lugod kami sa mga abusado saka mararaot na tawo,+ huli ta bakong gabos na tawo igwa nin pagtubod.+ 3 Pero maimbod an Kagurangnan, asin papakusugon niya kamo saka poprotektaran kamo sa saro na maraot. 4 Siring man, may kumpiyansa kami sa Kagurangnan mapadapit sa saindo, na ginigibo nindo asin padagos na gigibuhon an samuyang mga instruksiyon. 5 Lugod na an saindong puso padagos nanggad na giyahan kan Kagurangnan sa pagkamuot sa Diyos+ asin sa pagpahiling nin pakatagal+ para sa Cristo.

6 Ngunyan, mga tugang, tinatawan mi kamo nin mga instruksiyon sa ngaran kan satuyang Kagurangnan na Jesu-Cristo, na likayan an lambang tugang na naglalakaw na bakong husay+ asin bakong kauyon kan tradisyon* na inako nindo* hali sa samuya.+ 7 Huli ta kamo mismo nakakaaram kun paano nindo kami aarugon,+ huling dai kami guminawi na bakong husay sa tahaw nindo, 8 asin dai man kami nagkakan na libre.*+ Imbes, aldaw-banggi kaming nagtrabaho nin magabat asin nagpagal tangani sanang dai mi mapagabatan sa pinansiyal an siisay man sa saindo.+ 9 Dai buot sabihon na mayo kaming deretso na mag-ako kan siring na bagay,*+ kundi gusto ming magpahiling nin marahay na halimbawa para arugon nindo.+ 10 Sa katunayan, kan kaibanan nindo kami, arog kaini an pirmi niyamong tugon: “Kun an siisay man habong magtrabaho, di dai man siya magkakan.”+ 11 Nabaretaan mi kaya na may nagkapira diyan sa saindo na naglalakaw na bakong husay,+ na dai man lamang nagtatrabaho, kundi nakikiaram sa mga bagay na dai man nin labot sa sainda.+ 12 Para sa mga tawong arog kaiyan, sinasabihan mi sinda asin sinasadol sa ngaran kan Kagurangnan na Jesu-Cristo na an intindihon sana iyo an sadiri nindang trabaho asin na magkakan kan pinagpagalan ninda.+

13 Sa parte man nindo, mga tugang, dai kamo magpundo* sa paggibo nin marahay. 14 Alagad kun may siisay man na dai nagsusunod sa mga sinabi mi sa surat na ini, markahan an sarong iyan asin ipundo an pakikiiba-iba sa saiya,+ tanganing masupog siya. 15 Pero dai nindo siya ibilang na kaiwal, kundi padagos siyang sadulon+ bilang tugang.

16 Ngunyan an Kagurangnan nin katuninungan lugod na iyo mismo an danay na magtao sa saindo nin katuninungan sa lambang paagi.+ Lugod na masakaibanan nindo gabos an Kagurangnan.

17 Ako, si Pablo, nagpapaabot kan sakuyang pangungumusta. Kamot ko mismo an nagsurat kaini,+ sa istilong mahihiling nindo sa gabos kong surat; ini an paagi ko nin pagsurat.

18 Mapasaindo gabos an daing kapantay na kabuutan kan satuyang Kagurangnan na Jesu-Cristo.