IKADUWANG SURAT KI TIMOTEO

1 Ako, si Pablo, sarong apostol ni Cristo Jesus paagi sa kabutan nin Diyos uyon sa panuga mapadapit sa buhay na nagin posible paagi ki Cristo Jesus.+ 2 Ki Timoteo, na sakuyang namumutan na aki:+

Mapasaimo an daing kapantay na kabuutan, pagkahirak, asin katuninungan hali sa Diyos na Ama asin ki Cristo Jesus na satuyang Kagurangnan.

3 Nagpapasalamat ako sa Diyos, na iyo an tinatawan ko nin sagradong paglilingkod arog kan ginibo kan sakuyang mga apuon, asin sa paggibo ko kaiyan na may malinig na konsiyensiya, aldaw-banggi takang danay na ginigirumdom sa sakuyang mga pagngayo-ngayo.* 4 Pag nagigirumduman ko an saimong mga luha, lalo kong pigmamawot na mahiling ka, tanganing mapano an sakong puso nin kaugmahan. 5 Huli ta dai ko nalilingawan an saimong pagtubod na mayong pagsagin-sagin,+ na inot na nahiling sa saimong lola na si Loida asin sa saimong ina na si Eunice, na sigurado akong yaon man sa saimo.

6 Dahil kaini, pinapagirumdom taka na palaadon mo nin makusog na siring sa kalayo an balaog nin Diyos na inako mo kan ipatong ko an sakuyang mga kamot sa saimo.+ 7 Huli ta dai kita tinawan nin Diyos nin espiritu nin pagkamatalaw,+ kundi nin kapangyarihan+ asin nin pagkamuot saka nin tultol na isip. 8 Kaya dai mo ikasupog an ginigibo mong pagpatotoo manungod sa satuyang Kagurangnan,+ asin dai mo man ako ikasupog, na sarong preso nin dahil sa saiya, kundi magin andam ka na mag-agi nin kasakitan+ para sa maugmang bareta paagi sa pagsarig sa kapangyarihan nin Diyos.+ 9 Ilinigtas niya kita asin inapod na magin mga banal,+ bakong dahil kan satuyang mga gibo, kundi dahil kan saiyang sadiring katuyuhan asin daing kapantay na kabuutan.+ An daing kapantay na kabuutan na ini itinao sa sato paagi ki Cristo Jesus kaidto pang haluyon nang panahon, 10 pero ngunyan iyan mas nagin risang-risa paagi sa pagkahayag kan satuyang Paraligtas, si Cristo Jesus,+ na naghali kan kagadanan+ saka nagtaong liwanag mapadapit sa buhay+ asin pagkadaing kalapaan+ paagi sa maugmang bareta,+ 11 na para diyan ako ninombrahan na magin parahulit asin apostol saka paratukdo.+

12 Ini an dahilan kaya inaagihan ko man an mga kasakitan na ini,+ alagad dai ako nasusupog.+ Huli ta midbid ko an Saro na pigtutubudan ko, asin may kumpiyansa ako na kaya niyang ingatan idtong ipinagkatiwala ko sa saiya sagkod sa aldaw na iyan.+ 13 Padagos mong pangaptan an pamantayan* nin marahay* na mga tataramon+ na nadangog mo sa sako, mantang ipinapahiling mo an pagtubod asin pagkamuot na resulta nin pagigin kasaro ni Cristo Jesus. 14 Ingatan mo an marahayon na bagay na ini na ipinagkatiwala sa saimo paagi sa banal na espiritu na yaon sa satuya.+

15 Aram mo baga na binarayaan ako kan gabos na yaon sa probinsiya nin Asia,+ kaiba na si Figelo asin Hermogenes. 16 Kahirakan lugod kan Kagurangnan si Onesiforo+ saka an mga kairiba niya sa harong, huli ta parati niya akong pinapakusog, asin dai niya ako ikinasupog dawa nakakadenahan ako. 17 An totoo, kan nasa Roma siya, matiyaga niya akong hinanap asin nanumpungan niya ako. 18 Lugod na magkamit siya nin pagkahirak hali sa Kagurangnan na Jehova* sa aldaw na iyan. Siyertong aram mo an gabos na paglilingkod na ginibo niya sa Efeso.

2 Kaya ika, aki ko,+ padagos kang magpakakusog paagi sa daing kapantay na kabuutan na ipinapahiling ni Cristo Jesus; 2 asin kun manungod sa mga bagay na nadangog mo sa sako na sinusuportaran nin dakul na mga saksi,+ ipagkatiwala mo an mga iyan sa maimbod na mga lalaki, na magigin lubos man na kuwalipikado na magtukdo sa iba. 3 Bilang sarong matibay na suldados+ ni Cristo Jesus, magin andam kang mag-agi nin kasakitan.+ 4 Mayo nin suldados na nakikilabot* sa mga aktibidad na may koneksiyon sa pagnenegosyo,* tanganing makamtan niya an pag-uyon kan saro na nagrehistro sa saiya bilang suldados. 5 Asin maski sa mga karawat, dai nag-aako nin korona an saro kun an pagkawat niya bakong uyon sa mga regulasyon.+ 6 An mahigos na parauma iyo an dapat na inot na magkakan kan mga bunga. 7 Pirmi mong isip-isipon an mga sinasabi ko; tatawan ka kan Kagurangnan nin pakasabot* sa gabos na bagay.

8 Tandaan mo na si Jesu-Cristo ibinangon hali sa mga gadan+ asin na siya gikan* ni David,+ uyon sa maugmang bareta na sakuyang ihinuhulit,+ 9 na alang-alang diyan ako nagsasakit saka nakapreso na siring sa sarong kriminal.+ Alagad, an tataramon nin Diyos dai nagagapos.+ 10 Huli kaini, padagos kong tinatagalan an gabos na bagay alang-alang sa mga pinili,+ tanganing sinda man magkamit kan kaligtasan na paagi ki Cristo Jesus, kaiba an daing sagkod na kamurawayan. 11 Mapagkakatiwalaan an mga tataramon na ini: Sigurado nanggad na kun magadan kitang nasa kaibanan niya, mabubuhay man kita kaiba niya;+ 12 kun padagos kitang magtatagal, mamamahala man kita bilang mga hadi kaiba niya;+ kun ninigaran niyato na midbid ta siya, ninigaran man niya na midbid niya kita;+ 13 kun bako kitang maimbod, nagdadanay siyang maimbod, huling dai niya magigibong dai magin totoo sa sadiri niya.

14 Padagos mong pagirumdumon sinda kan mga bagay na ini, na sinasabihan* sinda sa atubangan nin Diyos na dai pag-iriwalan an manungod sa mga tataramon, sarong bagay na dai lamang nin pakinabang huli ta nakakadanyar* iyan sa mga nagdadangog. 15 Gibuhon mo an saimong pinakamakakaya tanganing ikapresentar mo an saimong sadiri sa Diyos bilang saro na inuuyunan, sarong trabahador na daing ikinakasupog, na ginagamit sa tamang paagi an tataramon nin katotoohan.+ 16 Pero isikwal mo an daing saysay na mga tataramon na nagbabasang-basang sa kun ano an banal,+ huling an mga iyan maresulta sa lalo pang pag-urog nin bakong diyosnon na paggawi 17 asin malakop na garo ganggrena.* Kabilang sa mga nagtataram nin arog kaiyan si Himeneo asin Fileto.+ 18 An mga lalaking ini suminuway sa katotoohan, na nagsasabing nangyari na an pagkabuhay liwat,+ asin rinaraot ninda an pagtubod kan nagkapira. 19 Sa ibong kaiyan, an masarig na pundasyon nin Diyos nagdadanay na nakatindog, na igwa kan tatak na ini, “Midbid ni Jehova* kun sairisay an sa saiya,”+ asin, “Isikwal kan gabos na nag-aapod sa pangaran ni Jehova*+ an karatan.”

20 Ngunyan sa sarong dakulang harong igwa nin mga kasangkapan* na an iba gibo sa bulawan saka plata* tapos an iba man gibo sa kahoy saka dalipay, asin an iba diyan para sa espesyal na* gamit pero an iba man para sa ordinaryo sanang* gamit. 21 Kaya kun rarayuan nin siisay man an mga huring nasambit, magigin saro siyang instrumento* na para sa espesyal na* gamit, pinabanal, kapaki-pakinabang sa saiyang kagsadiri, andam para sa lambang marahay na gibo. 22 Kaya rayuan mo an mga kamawutan na dara nin pagigin hoben, pero magmaigot ka na mahiling sa saimo an pagigin matanos, an pagtubod, an pagkamuot, an pagigin matuninong, kaiba kan mga nag-aapod sa Kagurangnan gikan sa malinig na puso.

23 Saro pa, isikwal mo an mangmang asin daing saysay na mga debate,+ huling aram mo na nagbubunga iyan nin iriwal. 24 Huli ta an sarong uripon kan Kagurangnan dai kaipuhan na makiiwal, kundi kaipuhan na magin mabuot sa gabos,*+ kuwalipikadong magtukdo, nagpupugol pag ginigibuhan nin sala,+ 25 na may kahuyuan na* nagtutukdo sa mga mahilig magkontra.+ Tibaad pa tawan sinda nin Diyos nin oportunidad na magsulsol* na minagiya pasiring sa tamang kaaraman mapadapit sa katotoohan,+ 26 asin makabalik sinda sa tultol na isip saka makadulag sa siod kan Diyablo, ta nagkadarakop niya kaya sindang buhay para gibuhon an saiyang kabutan.+

3 Pero dapat mo ining maaraman, na sa huring mga aldaw+ maabot an delikado asin masakit na mga panahon. 2 Huli ta an mga tawo magigin interesado na sana sa sadiri nindang kapakanan,* mamumuton sa kuwarta, mahambog, mapalangkaw, paralanghad,* masinuway sa mga magurang, dai tataong magpasalamat, bakong maimbod, 3 mayong natural na kapadangatan, habo nin ano man na kasunduan, parapakaraot, daing pagpupugol sa sadiri, maringis, daing pagkamuot sa karahayan, 4 traydor, matagas an payo, orgulyoso, mahilig magpasiram-siram imbes na magpahiling nin pagkamuot sa Diyos, 5 na nagsasagin man ngayang maki-Diyos pero dai man talaga iyan nahihiling sa buhay ninda;+ rumayo ka sa sainda. 6 Hali sa sainda, maralataw an mga tawo na tusong maralaog sa mga pamilya saka mang-eengganyar nin mga babayi na madaling maloko* asin kadakul nin kasalan, mga babaying kontrolado nin manlain-lain na pagmawot, 7 na sigeng kaaadal pero dai man lamang nagkakaigwa nin tamang kaaraman sa katotoohan.

8 Kun paanong kinontra si Moises ni Janes asin Jambres, padagos man na kinokontra kan mga ini an katotoohan. An arog kaiyan na mga tawo igwa nanggad nin maraot na kaisipan, na mga dai inuyunan sigun sa pamantayan kan pagtubod. 9 Alagad, mayo na sindang ibang magigibo pa, huli ta an saindang kalulungan* magigin malinaw sa gabos, arog kan nangyari sa duwang lalaking idto.+ 10 Pero ika, maingat mong sinundan an sakuyang pagtutukdo, an sakuyang paagi nin pamumuhay,+ an sakuyang katuyuhan sa buhay, an sakuyang pagtubod, an sakuyang pagkamapasensiya,* an sakuyang pagkamuot, an sakuyang pakatagal, 11 an mga persekusyon asin kasakitan na inagihan ko arog kan sa Antioquia,+ sa Iconio,+ sa Listra.+ Tinagalan ko an mga persekusyon na idto, asin ilinigtas ako kan Kagurangnan sa gabos na iyan.+ 12 Sa katunayan, an gabos na nagmamawot na mamuhay na may debosyon sa Diyos bilang mga parasunod ni Cristo Jesus pepersegiron man.+ 13 Alagad an mga maraot na tawo asin impostor lalo pang magigin maraot, na nanglalagalag asin nailalagalag.*+

14 Pero ika, magpadagos ka sa mga bagay na nanudan mo asin nakumbinsir na paniwalaan,+ huling aram mo kun kiisay mo iyan nanudan 15 asin puon sa pagkaumboy+ may aram ka na sa banal na mga kasuratan,+ na makakatao sa saimo nin kadunungan para sa kaligtasan paagi sa pagtubod ki Cristo Jesus.+ 16 An bilog na Kasuratan ipinasabong nin Diyos+ asin kapaki-pakinabang sa pagtukdo,+ sa pagsaway, sa pagtanos kan mga bagay-bagay,* sa pagdisiplina uyon sa matanos na pamantayan,+ 17 tanganing an lingkod nin Diyos magin lubos na may kakayahan, lubos na nasangkapan para sa gabos na marahay na gibo.

4 Seryoso takang tinutugon sa atubangan nin Diyos asin ni Cristo Jesus, na iyo an mahukom+ sa mga buhay asin mga gadan,+ paagi sa saiyang pagkakahayag+ asin sa saiyang Kahadian:+ 2 Ihulit mo an tataramon;+ gibuhon mo iyan na may pagkaapurado, trangkilo man o masakit an mga panahon; magsaway ka,+ magsagwi, magsadol, na ginigibo iyan na may dakulang pagpapasensiya* asin mahusay na paagi nin pagtutukdo.+ 3 Huli ta maabot an sarong peryodo nin panahon na diyan dai sinda makakatagal sa marahay* na katukduan,+ kundi kauyon kan sadiri nindang mga pagmawot, papalibutan ninda an saindang sadiri nin mga paratukdo na makitik kan saindang mga talinga.*+ 4 Mapundo sinda sa pagdangog sa katotoohan asin matao nin atensiyon sa mga bakong totoong istorya. 5 Pero ika, papagdanayon mong tultol an saimong pag-iisip sa gabos na bagay, tagalan mo an kasakitan,+ gibuhon mo an trabaho nin sarong ebanghelisador,* lubos mong utubon an saimong ministeryo.+

6 Huli ta ngunyan, garo na ako ibinububo na siring sa dulot na inumon,+ asin an oras kan sakuyang pagkatalingkas+ madali nang umabot. 7 Naipakipaglaban ko na an marahayon na laban,+ natapos ko na an sakuyang pagdalagan,+ nasunod ko an pagtubod. 8 Puon ngunyan, igwa nang nakatagama para sa sakuya na korona para sa mga matanos,+ na itatao sa sako kan Kagurangnan, an matanos na hukom,+ bilang balos sa aldaw na iyan,+ pero bako lang sa sako, kundi sa gabos man na nagmamawot na umabot an panahon kan paghahayag sa saiya.

9 Hinguwahon mo nanggad na makadigdi tulos sa sako. 10 Binayaan na kaya ako ni Demas+ huling namutan niya an presenteng sistema nin mga bagay,* asin nagpasiring siya sa Tesalonica, si Cresente man sa Galacia, si Tito sa Dalmacia. 11 Si Lucas na sana an kaibanan ko. Iiba mo si Marcos, dahil makakatabang siyang marhay sa sako sa ministeryo. 12 Pero si Tiquico+ pinaduman ko na sa Efeso. 13 Sa pagdigdi mo, darahon mo su alikboy na nawalat ko ki Carpo duman sa Troas, asin idtong mga rolyo, lalo na su mga pergamino.*

14 Si Alejandrong panday nin tanso grabe an pigparagibong maraot sako. Babaluson siya ni Jehova* sigun sa mga gibo niya.+ 15 Mag-ingat ka man sa saiya, ta kinontra niya nin todo an mensahe mi.

16 Sa inot kong pagdepensa, mayo nin suminurog sa sako, kundi gabos sinda binayaan ako—dai man lugod sinda papanimbagon dahil kaini. 17 Alagad tuminindog sa kataid ko an Kagurangnan saka tinawan niya ako nin kusog, tanganing paagi sa sakuya lubos na maisagibo an paghuhulit asin madangog iyan kan gabos na nasyon;+ asin nailigtas ako sa nguso kan leon.+ 18 Ililigtas ako kan Kagurangnan sa lambang karatan, asin ililigtas niya ako para sa saiyang langitnon na Kahadian.+ Mapasaiya an kamurawayan sagkod nuarin pa man. Amen.

19 Ipaabot mo an sakuyang pangungumusta ki Prisca asin Aquila+ saka ki Onesiforo+ asin sa mga kairiba niya sa harong.

20 Nagpirmi nguna si Erasto+ sa Corinto, pero iwinalat ko si Trofimo+ sa Mileto dahil may hilang siya. 21 Gibuhon mo an saimong pinakamakakaya na makadigdi bago magtiglipot.

Nagpapaabot si Eubulo kan saiyang pangungumusta sa saimo, asin iyo man si Pudente asin si Lino saka si Claudia pati an gabos na tugang.

22 Bendisyunan lugod kan Kagurangnan an espiritu* na saimong ipinapahiling. Mapasaindo an saiyang daing kapantay na kabuutan.