IKADUWANG SURAT NI PEDRO

1 Ako, si Simon Pedro, sarong uripon asin apostol ni Jesu-Cristo. Sa mga nag-ako nin pagtubod na kasinghalaga kan samuyang pagtubod* paagi sa pagigin matanos kan satuyang Diyos asin kan Paraligtas na si Jesu-Cristo:

2 Lugod na urog pa kamong magkamit nin daing kapantay na kabuutan asin nin katuninungan paagi sa tamang kaaraman+ manungod sa Diyos asin ki Jesus na satuyang Kagurangnan, 3 huli ta an saiyang kapangyarihan bilang Diyos nagtao* sa sato kan gabos na bagay na kaipuhan niyato para makapamuhay kita na may debosyon sa Diyos, asin inako ta an mga bagay na iyan paagi sa tamang kaaraman manungod sa Saro na nag-apod sa sato+ paagi sa saiya mismong kamurawayan asin karahayan. 4 Paagi sa mga bagay na iyan tinawan niya kita kan* mahalagang marhay asin makangangalas nanggad na mga panuga,+ tanganing paagi sa mga ini magkaigwa man kamo nin mga karakteristiko na arog kan sa Diyos,+ dahil nakadulag na kamo sa karatan kan kinaban na bunga nin salang kamawutan.*

5 Kaya sa mismong dahilan na ini, gibuhon nindo an bilog nindong udok na paghihinguwa+ na maidagdag sa saindong pagtubod an karahayan,+ sa saindong karahayan an kaaraman,+ 6 sa saindong kaaraman an pagpupugol sa sadiri, sa saindong pagpupugol sa sadiri+ an pakatagal, sa saindong pakatagal an debosyon sa Diyos,+ 7 sa saindong debosyon sa Diyos an pagpadangat sa mga tugang,* sa saindong pagpadangat sa mga tugang an pagkamuot.+ 8 Huli ta kun an mga bagay na iyan yaon sa saindo asin nagsusupay, tatabangan kamo kaiyan na dai magin inaktibo o kaya bakong mabunga*+ kun mapadapit sa tamang kaaraman manungod sa satuyang Kagurangnan na Jesu-Cristo.

9 Huli ta an siisay man na mayo kan mga bagay na iyan buta, na ipinipirong an saiyang mga mata sa liwanag,*+ asin nalilingawan niyang lininig na siya sa mga kasalan+ na nagibo niya kaidto. 10 Kaya, mga tugang, urog pa nindong gibuhon an saindong pinakamakakaya na masiyertong mapagdanay nindo an pag-apod+ asin pagpili sa saindo, huli ta kun padagos nindong ginigibo an mga bagay na ini, dai nanggad kamo masusudya.+ 11 Sa katunayan, sa paggibo kaiyan, itatao sa saindo an dakulaon* na bendisyon na paglaog sa daing sagkod na Kahadian+ kan satuyang Kagurangnan asin Paraligtas na si Jesu-Cristo.+

12 Sa dahilan na iyan, buot ko na pirmi kamong pagirumdumon kan mga bagay na ini, maski ngani aram na nindo an mga iyan asin masarig na an pundasyon nindo sa katotoohan na yaon sa saindo. 13 Pero iniisip kong tama sanang pukawon ko kamo paagi sa mga pagirumdom+ sagkod na yaon pa ako sa tabernakulong ini,*+ 14 huling aram ko na an sakuyang tabernakulo madali nang halion, arog kan lininaw man sa sako kan satuyang Kagurangnan na Jesu-Cristo.+ 15 Pirmi kong gigibuhon an sakong pinakamakakaya tanganing pag naghali na ako, magirumduman* nindo an mga bagay na ini.

16 Ipinahayag mi sa saindo an kapangyarihan asin presensiya kan satuyang Kagurangnan na Jesu-Cristo bakong base sa mga bakong totoong istorya na may katusuhan na inimbento, kundi ipinahayag mi iyan bilang mga saksing nakahiling mismo kan saiyang kamurawayan.+ 17 Huli ta nag-ako siya nin onra asin kamurawayan hali sa Diyos na Ama kan sabihon sa saiya an mga tataramon na ini paagi sa dakulang kamurawayan: “Ini an sakuyang Aki, an namumutan ko, na sakong inuuyunan.”+ 18 Iyo, nadangog mi hali sa langit an mga tataramon na ini kan kaibanan niya kami kaidto sa banal na bukid.

19 Kaya an mga tataramon nin propesiya mas urog na nagin siyerto sa sato, asin marahay an ginigibo nindong pagtao nin atensiyon sa mga tataramon na iyan siring sa sarong lampara+ na nagliliwanag sa madiklom na lugar (sagkod na umabot an maagahon asin sumirang an maagahon na bituon)+ sa saindong puso. 20 Aram baga nindo inot sa gabos, na mayong propesiya nin Kasuratan an gikan sa ano man na sadiring interpretasyon. 21 Huli ta an propesiya dai kasuarin man ihinayag paagi sa kabutan nin tawo,+ kundi an mga tawo nagtaram gikan sa Diyos mantang ginigiyahan* sinda kan banal na espiritu.+

2 Minsan siring, kun paanong nagkaigwa kaidto sa banwaan nin mga bakong tunay na propeta, magkakaigwa man diyan sa saindo nin mga bakong tunay na paratukdo.+ Pasekreto sindang maintrodusir nin mapangraot na mga sekta, asin tatalikdan pa ngani ninda an kagsadiri na buminakal sa sainda,+ na nagdadara nin marikas na kalaglagan sa saindang sadiri. 2 Apuwera pa kaiyan, dakul an maararog sa saindang daing pakundangan na paggawi,*+ asin huli sa sainda an dalan kan katotoohan pagtataraman nin maraot.+ 3 May kahanaban man ninda kamong aaprobetsaran paagi sa mapandayang mga tataramon. Pero an padusa sa sainda, na haloy nang nadesisyunan,+ dai nag-aatraso, asin an saindang kalaglagan siguradong maabot.+

4 An Diyos dai nanggad nag-alangan na padusahan an mga anghel na nagkasala,+ kundi inapon niya sinda sa Tartaro*+ asin kinadenahan sinda sa* grabeng kadikluman tanganing itagama sa paghukom.+ 5 Asin dai siya nag-alangan na padusahan an sarong suanoy na kinaban,+ pero iningatan niyang ligtas si Noe, na sarong parahulit nin katanusan,+ kaiba an pitong iba pa+ kan magpaabot siya nin baha sa kinaban nin bakong diyosnon na mga tawo.+ 6 Asin ginibo niyang abo an mga siyudad nin Sodoma asin Gomorra bilang paghukom sa mga iyan,+ na nagtatao nin patanid sa bakong diyosnon na mga tawo mapadapit sa mga bagay na maabot.+ 7 Ilinigtas niya an matanos na si Lot,+ na grabe an pagkapurisaw sa daing pakundangan na paggawi* kan mga tawong mayong pigsusunod na pamantayan— 8 huling aroaldaw na nasasakitan an matanos na kalag* kan matanos na tawong idto dahil sa mga karatan na nahihiling niya asin nadadangog mantang nakaistar sa kaibanan ninda. 9 Kaya, aram ni Jehova* kun paano iligtas sa kasakitan+ an mga tawong may debosyon sa Diyos asin itagama sa kalaglagan an maraot na mga tawo* sa aldaw nin paghukom,+ 10 lalo na idtong mga nagmamawot na ramugan an hawak* kan iba+ asin hinahamak an mga may awtoridad.+

Palibhasa mga pangahas asin sadiri sanang kagustuhan an sinusunod, dai sinda natatakot na magtaram nin maraot manungod sa mga tinawan nin Diyos nin onra, 11 pero an mga anghel, dawa mas makusog asin mas makapangyarihan, dai nag-aakusar sa sainda gamit an maraot na mga tataramon, bilang paggalang ki* Jehova.*+ 12 Alagad an mga tawong ini, na arog nin daing isip na mga hayop na naghihiro uyon sa naturalesa ninda asin na inurugbon para dakupon saka bunuon, nagtataram nin maraot na mga tataramon manungod sa mga bagay na mayo lamang sinda nin aram.+ Kalaglagan an sasaparon ninda dara kan sadiri nindang karatan, 13 asin kapahamakan an magigin balos sa sainda huli kan saindang mararaot na gibo.

Ibinibilang nindang kaugmahan an magpasiram-siram*+ maski sa kaliwanagan kan aldaw. Mga ati sinda asin digta, na nag-uugmang marhay sa saindang mapandayang mga katukduan mantang kaiba-iba nindong nagkakarakan sa mga pagtiripon-tipon.+ 14 Mahihiling sa mga mata ninda an grabeng pagmawot na magsambay+ asin an mga iyan dai nakakapagpugol na dai maggibo nin kasalan, asin inaakit ninda idtong mga* bako pang marigon sa pagtubod. Igwa sinda nin puso na tuod na sa kahanaban. Sinda mga aking isinumpa. 15 Palibhasa binayaan an tanos na dalan, nagkaralagalag sinda. Sinundan ninda an dalan ni Balaam+ na aki ni Beor, na gustong-gusto an bayad sa paggibo nin maraot,+ 16 pero sinaway siya huli sa pagbalga niya sa kun ano an tama.+ Sarong pantrabahong hayop na dai man nakakapagtaram an nagtaram na siring sa tawo asin inulang an kalulungan* kan propeta.+

17 Garo sinda mga burabod na mayong tubig saka garo mga alupuop na ipinapadpad nin makusugon na duros, asin an pinakagrabeng kadikluman iyo an nakatagama sa sainda.+ 18 Naggagamit sinda nin nakakalulang mga tataramon na dai man nin saysay. Paagi sa pagpukaw sa mga kamawutan kan laman+ asin paagi sa daing pakundangan na paggawi,* ineengganyar ninda an mga tawong kakasuway pa sana sa mga naggigibo nin maraot.+ 19 Nangangako sinda sa mga ini nin katalingkasan, pero sinda mismo mga uripon nin karatan;+ huli ta kun an siisay man kontrolado nin saro, uripon siya kan sarong iyan.*+ 20 Siyerto nanggad na kun pagkatapos na makabutas sa mga ramog kan kinaban+ paagi sa tamang kaaraman manungod sa Kagurangnan asin Paraligtas na si Jesu-Cristo, maimbuwelto giraray sinda sa mismong mga bagay na iyan asin makontrol kaiyan, an huri nindang kamugtakan mas maraot pa kisa kan nainot.+ 21 Mas marahay pang dai na lang ninda naaraman an tamang dalan nin katanusan kisa pagkatapos maaraman iyan, tatalikdan ninda an banal na mga pagbuot na inako ninda.+ 22 An nangyari sa sainda nagpapahiling na totoo an sinasabi kan talinhaga: “An ayam nagbalik sa suka kaiyan, asin an kinarigos na urig sa pagligid-ligid sa lamaw.”+

3 Mga namumutan, ini na an ikaduwang surat ko sa saindo kun sain, arog kan sa inot kong surat, pinupukaw ko an saindong kakayahan na mag-isip nin malinaw paagi sa pagirumdom,+ 2 na dapat nindong tandaan an mga tataramon na sinabi kaidto* kan banal na mga propeta asin an pagbuot kan Kagurangnan asin Paraligtas na itinao paagi sa saindong mga apostol. 3 Inot sa gabos, dapat nindong maaraman ini, na sa huring mga aldaw maarabot an mga paratuya para mantuya-tuya, na ginigibo an sadiri nindang mga kamawutan+ 4 asin nagsasarabi: “Hain man ining ipinanugang presensiya niya?+ Mala baga, puon kan magturog sa kagadanan an samuyang mga apuon sagkod ngunyan, an gabos na bagay iyong-iyo pa man giraray puon sa kapinunan kan paglalang.”+

5 Tinutuyo kaya nindang dai pag-intindihon an katotoohan na ini, na kaidtong haloy nang panahon igwa nin kalangitan asin nin daga na paagi sa tataramon nin Diyos masarig na nakatindog sa ibabaw nin tubig asin sa tahaw nin katubigan;+ 6 asin na paagi sa mga iyan, an kinaban kan panahon na idto nalaglag kan iyan paabutan nin baha.+ 7 Pero paagi sa iyo man sanang tataramon, an mga langit asin an daga na nag-eeksister ngunyan nakatagama sa kalayo saka irinereserba sagkod na umabot an aldaw nin paghukom asin nin paglaglag sa mga bakong diyosnon na tawo.+

8 Minsan siring, dai nindo paglingawan an bagay na ini, mga namumutan, na an sarong aldaw ki Jehova* garo sangribong taon asin an sangribong taon garo sarong aldaw.+ 9 Si Jehova* dai nag-aatraso sa pag-utob kan saiyang panuga,+ arog kan pighuhuna nin ibang tawo, kundi mapasensiya siya sa saindo huling habo niyang malaglag an siisay man, imbes, gusto niya na an gabos makapagsulsol.+ 10 Alagad an aldaw ni Jehova*+ maabot na siring sa sarong parahabon,*+ na diyan an mga langit mapapara+ na may makusog na ragubrob,* asin an mga elemento na sobra an init magkakaturunaw, asin an daga saka an mga bagay na ginibo diyan biyong mahahayag.+

11 Huling an gabos na bagay na ini magkakaturunaw sa arog kaining paagi, isip-isipon nindo kun dapat na magin anong klaseng tawo kamo. Dapat na kamo mga tawong banal an paggawi asin igwa nin mga gibong nagpapahiling nin debosyon sa Diyos, 12 mantang hinahalat nindo saka pirming isinasaisip* an pag-abot* kan aldaw ni Jehova,*+ na paagi kaiyan an mga langit lalaglagon+ sa kalayo asin an mga elemento magkakaturunaw sa grabeng init! 13 Pero igwa nin bagong mga langit asin sarong bagong daga na hinahalat ta uyon sa saiyang panuga,+ asin sa mga ini magdadanay an katanusan.+

14 Kaya, mga namumutan, huling hinahalat nindo an mga bagay na ini, gibuhon nindo an saindong pinakamakakaya tanganing sa huri mahiling nin Diyos na kamo lubos na malinig asin daing digta saka may katuninungan.+ 15 Dugang pa, isipon nindo na an pagpapasensiya kan satuyang Kagurangnan nangangahulugan nin kaligtasan, arog kan isinurat man sa saindo kan namumutan niyatong tugang na si Pablo kauyon kan kadunungan na itinao sa saiya,+ 16 asin sa katunayan, may sinabi siya manungod sa mga bagay na iyan sa gabos niyang surat. Alagad, may nagkapirang bagay sa mga iyan na masakit masabutan, asin iyan an binibiribid kan mga daing aram* asin bakong marigon sa pagtubod, siring kan ginigibo man ninda sa iba pang kabtang kan Kasuratan, na maresulta sa sadiri nindang kalaglagan.

17 Kaya, mga namumutan, mantang patiinot na nindong aram ini, magin mapagbantay kamo tanganing dai kamo mailagalag kaiba ninda paagi sa pandadaya kan mga tawong daing pigsusunod na pamantayan asin dahil diyan mawara an saindong pagigin marigon.+ 18 Imbes, mamuhay kamo sa paaging urog pa nindong kakamtan an daing kapantay na kabuutan kan satuyang Kagurangnan asin Paraligtas na si Jesu-Cristo asin an kaaraman mapadapit sa saiya. Mapasaiya an kamurawayan ngunyan asin sagkod sa panahon na daing kasagkudan. Amen.