KAPAHAYAGAN KI JUAN

1 Sarong kapahayagan* ni Jesu-Cristo, na itinao nin Diyos sa saiya,+ tanganing ipahiling sa mga uripon niya+ an mga bagay na madali nang mangyari. Asin isinugo niya an saiyang anghel tanganing ipresentar iyan paagi sa mga tanda sa saiyang uripon na si Juan,+ 2 na nagpatotoo manungod sa tataramon na itinao nin Diyos asin sa patotoong itinao ni Jesu-Cristo, iyo, manungod sa gabos na bagay na nahiling niya. 3 Maugma an nagbabasa nin makusog asin an mga nagdadangog sa mga tataramon kan propesiyang ini saka nag-uutob kan mga bagay na nakasurat digdi,+ huli ta an itinalaan na panahon harani na.

4 Hali ki Juan, para sa pitong kongregasyon+ na nasa probinsiya nin Asia:

Mapasaindo an daing kapantay na kabuutan asin katuninungan hali sa “Saro na iyo ngunyan asin iyo kaidto asin iyo an maabot,”+ asin hali sa pitong espiritu+ na nasa atubangan kan saiyang trono, 5 saka hali ki Jesu-Cristo, “an Maimbod na Saksi,”+ “an panganay hali sa mga gadan,”+ asin “an Tagapamahala kan mga hadi sa daga.”+

Sa saiya na namumuot sa sato+ asin nagpatalingkas sa sato sa mga kasalan niyato paagi kan saiyang sadiring dugo+— 6 asin ginibo niya kita na magin sarong kahadian,+ mga saserdote+ kan saiyang Diyos asin Ama—iyo, mapasaiya an kamurawayan asin an kakusugan sagkod lamang. Amen.

7 Uya! Siya maabot na kaiba kan mga panganuron,+ asin mahihiling siya kan lambang mata, pati na kan mga nagtusok sa saiya; asin tuturubtubon kan gabos na tribo sa daga an saindang daghan sa kamunduan nin huli sa saiya.+ Iyo, Amen.

8 “Ako an Alpha asin an Omega,”*+ an sabi kan Diyos na Jehova,* “an Saro na iyo ngunyan asin iyo kaidto asin iyo an maabot, an Makakamhan sa Gabos.”+

9 Ako, si Juan, na saindong tugang asin kapareho nindong nag-aagi nin kasakitan+ asin makakaibanan nindo sa kahadian+ saka kapareho man nindong nagtatagal+ bilang kasaro ni Jesus,+ nasa isla na inaapod na Patmos dahil sa pagtaram ko manungod sa Diyos asin pagpatotoo mapadapit ki Jesus. 10 Paagi sa pagpasabong, napaduman ako sa aldaw kan Kagurangnan, asin may nadangog ako sa likudan ko na sarong makusog na boses na siring sa tanog nin trumpeta, 11 na nagsasabi: “An nahihiling mo, isurat mo sa sarong rolyo asin ipadara mo iyan sa pitong kongregasyon: sa Efeso,+ sa Esmirna,+ sa Pergamo,+ sa Tiatira,+ sa Sardis,+ sa Filadelfia,+ asin sa Laodicea.”+

12 Nagsalingoy ako tanganing hilingon kun siisay an nakikipag-ulay sa sako, asin kan pagbirik ko, may nahiling akong pitong bulawan na kandelero,+ 13 asin sa tahaw kan mga kandelero may saro na siring sa aki nin tawo,+ na nakasulot nin bado na sagkod sa mga bitis an laba asin may hagkos na bulawan sa saiyang daghan. 14 Apuwera kaiyan, an saiyang payo saka an saiyang buhok kasingputi nin barahibo nin karnero, na siring sa niyebe, asin an saiyang mga mata garo naglalaad na kalayo,+ 15 asin an saiyang mga bitis garo purong tanso+ na nagliliwanag pag nagbabaga sa hurno, asin an saiyang boses garo tanog nin nagraragasang tubig. 16 Asin sa saiyang tuong kamot igwa nin pitong bituon,+ asin may luminuwas hali sa saiyang nguso na sarong matarom na halabang espada na mag-inibong an tarom,+ asin an saiyang lalawgon* siring sa aldaw* sa lubos na kaliwanagan kaiyan.+ 17 Kan mahiling ko siya, natumba ako sa saiyang pamitisan na garo gadan.

Asin ipinatong niya sa sako an saiyang tuong kamot asin sinabi: “Dai ka matakot. Ako an Inot+ asin an Huri,+ 18 asin an saro na buhay,+ asin ako nagin gadan,+ pero uya! ako buhay sagkod nuarin pa man,+ asin yaon sa sako an mga liyabe nin kagadanan saka kan Lubungan.*+ 19 Kaya isurat mo an mga bagay na nahiling mo, asin an mga bagay na nangyayari ngunyan, saka an mga bagay na mangyayari pagkatapos kaini. 20 Kun manungod sa sagradong hilom* kan pitong bituon na nahiling mo sa tuong kamot ko asin kan pitong bulawan na kandelero: An pitong bituon nagrerepresentar sa mga anghel kan pitong kongregasyon, asin an pitong kandelero nagrerepresentar sa pitong kongregasyon.+

2 “Sa anghel+ kan kongregasyon sa Efeso+ isurat mo: Ini an mga bagay na sinabi kan saro na may kapot kan pitong bituon sa saiyang tuong kamot asin na naglalakaw sa tahaw kan pitong bulawan na kandelero:+ 2 ‘Aram ko an saimong mga gibo, asin an saimong pagpapagal saka pagtagal, asin aram ko na dai mo kayang kunsintihon an maraot na mga tawo, asin na binabalo mo idtong mga nagsasabi na sinda mga apostol+ pero bako man, asin napatunayan mong mga putikon sinda. 3 Nagpapahiling ka man nin pakatagal, asin nagtitiyaga ka alang-alang sa pangaran ko+ saka dai ka nangluya.+ 4 Pero may sarong bagay ako laban sa saimo, an pagbaya mo sa pagkamuot na yaon sa saimo kan primero.

5 “‘Kaya girumdumon mo kun hain ka bago ka buminagsak, asin magsulsol+ ka saka gibuhon mo an mga ginigibo mo kan primero. Ta kun dai, madiyan ako sa saimo, asin hahalion ko an saimong kandelero+ sa puwesto kaiyan, apuwera na lang kun magsulsol+ ka. 6 Minsan siring, igwa ka kan sarong marahay na bagay na ini: ikinakaungis mo an mga gibo-gibo kan sekta ni Nicolas,+ na ikinakaungis ko man. 7 An may talinga magdangog sa sinasabi kan espiritu sa mga kongregasyon:+ Sa saro na makakadaog,+ tutugutan ko siya na kumakan sa kahoy nin buhay,+ na yaon sa paraiso nin Diyos.’

8 “Asin sa anghel kan kongregasyon sa Esmirna isurat mo: Ini an mga bagay na sinabi niya, ‘an Inot asin an Huri,’+ na nagin gadan asin nabuhay giraray:+ 9 ‘Aram ko an saimong pagsakit saka kadukhaan—pero mayaman+ ka—asin aram ko an paglanghad* kan mga tawong inaapod an sadiri ninda na mga Judio alagad sa katunayan bako man, kundi sinda sarong sinagoga ni Satanas.+ 10 Dai ka matakot sa mga bagay na madali mo nang maeksperyensiyahan.+ Uya! An Diyablo padagos na magibo nin paagi na mapreso an nagkapira sa saindo tanganing mabalo kamo nin lubos, asin mag-aagi kamo nin kasakitan sa laog nin sampulong aldaw. Patunayan mong maimbod ka sagkod sa kagadanan, asin itatao ko sa saimo an korona nin buhay.+ 11 An may talinga magdangog+ sa sinasabi kan espiritu sa mga kongregasyon: An saro na makakadaog+ dai nanggad makakayang danyaran kan ikaduwang kagadanan.’+

12 “Sa anghel kan kongregasyon sa Pergamo isurat mo: Ini an mga bagay na sinabi kan saro na igwa kan matarom na halabang espada na mag-inibong an tarom:+ 13 ‘Aram ko kun sain ka nakaistar, sa lugar kun sain yaon an trono ni Satanas; alagad ta padagos kang nangangapot sa pangaran ko,+ asin dai mo tinalikdan an saimong pagtubod sa sako+ maski kan mga aldaw ni Antipas, an sakuyang maimbod na saksi,+ na ginadan+ sa presensiya nindo, diyan sa lugar na iniirukan ni Satanas.

14 “‘Pero may nagkapirang bagay ako laban sa saimo. Igwa diyan sa saimo nin mga nangangapot sa katukduan ni Balaam,+ na nagtukdo ki Balak+ na magbugtak nin magigin dahilan na magkasala an* mga aki ni Israel, an pagkakan nin mga bagay na inatang sa mga idolo asin paggibo nin seksuwal na imoralidad.*+ 15 Kaagid kaiyan, igwa man diyan sa saimo nin mga nangangapot sa katukduan kan sekta ni Nicolas.+ 16 Kaya magsulsol ka. Ta kun dai, madiyan tulos ako sa saimo, asin makikipaglaban ako sa sainda gamit an halabang espada kan sakuyang nguso.+

17 “‘An may talinga magdangog sa sinasabi kan espiritu sa mga kongregasyon:+ Sa saro na makakadaog,+ tatawan ko siya nin nakatagong manna,+ asin tatawan ko siya nin sarong sadit na puting gapo, asin nakasurat sa gapong iyan an sarong bagong pangaran na mayo nin nakakaaram kundi idto sanang nakakaresibi kaiyan.’

18 “Sa anghel kan kongregasyon sa Tiatira+ isurat mo: Ini an mga bagay na sinabi kan Aki nin Diyos, an saro na an mga mata garo naglalaad na kalayo+ asin an mga bitis garo purong tanso:+ 19 ‘Aram ko an saimong mga gibo, asin an saimong pagkamuot saka pagtubod asin paglilingkod* saka pakatagal, asin aram kong an saimong mga ginigibo kaining huri mas urog kisa sa mga ginibo mo kan primero.

20 “‘Pero may sarong bagay ako laban sa saimo, an pagkunsinti mo sa babaying iyan na si Jezebel,+ na inaapod an sadiri niya na propetisa, asin tinutukduan niya saka ilinalagalag an sakuyang mga uripon tanganing gumibo nin seksuwal na imoralidad*+ asin kumakan nin mga bagay na inatang sa mga idolo. 21 Tinawan ko siya nin panahon para magsulsol, pero habo niyang pagsulsulan an saiyang seksuwal na imoralidad.* 22 Uya! Madali ko na siyang paabutan nin grabeng hilang, asin madali ko nang paabutan nin grabeng kasakitan an mga nakikisambay sa saiya, apuwera na lang kun magsulsol sinda sa mga gibong impluwensiyado niya. 23 Asin gagaradanon ko an saiyang mga aki paagi sa nakakagadan na hilang, tanganing maaraman kan gabos na kongregasyon na ako an saro na nagsisiyasat sa kauruiraruming mga kaisipan* asin sa mga puso, asin babalusan ko an lambang saro sa saindo sigun sa saindong mga gibo.+

24 “‘Minsan siring, sinasabi ko sa gabos na iba pa sa saindo na nasa Tiatira, sa gabos na dai nagsusunod sa katukduan na iyan, sa mga mayo nin aram sa inaapod na “harararom na bagay ni Satanas”:+ Dai ko na kamo tatawan nin ano pa man na dagdag na pagabat. 25 Alagad pangaptan man giraray nindo an mga bagay na yaon sa saindo sagkod na mag-abot ako.+ 26 Asin sa saro na makakadaog asin na sinusunod an mga gibo ko sagkod sa katapusan, tatawan ko siya nin awtoridad na mamahala sa mga nasyon,+ 27 arog kan itinao sa sako kan sakuyang Ama, asin papasturan niya an mga tawo paagi sa sugkod na lansang*+ tanganing magkaparasa sinda siring sa mga lalagan na dalipay. 28 Asin itatao ko sa saiya an maagahon na bituon.+ 29 An may talinga magdangog sa sinasabi kan espiritu sa mga kongregasyon.’

3 “Sa anghel kan kongregasyon sa Sardis isurat mo: Ini an mga bagay na sinabi niya, an saro na igwa kan pitong espiritu nin Diyos+ asin kan pitong bituon:+ ‘Aram ko an saimong mga gibo; aram kong igwa kang reputasyon* na ika buhay, alagad ta ika gadan.+ 2 Magi kang mapagbantay,+ asin pakusugon mo an mga natatada pa na madali nang magadan, huli ta dai ko nahiling na lubos mong ginibo* an saimong gibuhon sa atubangan kan sakuyang Diyos. 3 Kaya, pirmi mong isaisip* kun ano an saimong inako saka nadangog, asin padagos mong pangaptan iyan, saka magsulsol+ ka. Ta kun dai ka nanggad magmata, maabot ako na siring sa sarong parahabon,*+ asin dai ka lamang mag-aaram kun sa anong oras ako madiyan sa saimo.+

4 “‘Minsan siring, igwa diyan sa saimo nin nagkapirang indibidwal* sa Sardis na dai dinigtaan an saindang mga bado,+ asin malakaw sinda kaiba ko na nakasulot nin puti,+ huli ta mga maninigo sinda. 5 Kaya an saro na makakadaog+ masulot nin puting bado,+ asin dai ko nanggad paparaon an saiyang pangaran sa libro nin buhay,+ kundi ipapahayag ko na midbid ko an saiyang pangaran sa atubangan kan sakuyang Ama asin sa atubangan kan saiyang mga anghel.+ 6 An may talinga magdangog sa sinasabi kan espiritu sa mga kongregasyon.’

7 “Sa anghel kan kongregasyon sa Filadelfia isurat mo: Ini an mga bagay na sinabi niya, an saro na banal,+ an saro na totoo,+ an saro na igwa kan liyabe ni David,+ an saro na nagbubukas nin pinto na dai magigibong isara nin siisay man asin nagsasara nin pinto na dai magigibong buksan nin siisay man: 8 ‘Aram ko an saimong mga gibo—uya! binuksan ko sa atubangan mo an sarong pinto,+ na dai maisasara nin siisay man. Asin aram ko na igwa ka nin dikit na kusog, asin sinunod mo an sakuyang tataramon saka nagin maimbod ka sa sakuyang pangaran. 9 Uya! Ini an gigibuhon ko sa mga kabilang sa sinagoga ni Satanas na nagsasarabing mga Judio sinda pero bako man,+ kundi nagpupurutik—uya! papadiyanon ko sinda saka papaluhudon sa may pamitisan mo, asin ipapahiling ko sa sainda na namumutan taka. 10 Huling sinunod mo an nadangog mo manungod sa sakuyang pakatagal,*+ poprotektaran taka man sa oras nin pagbalo,+ na maabot sa bilog na daga,* tanganing baluon an mga nag-iistar sa daga. 11 Madali na akong mag-abot.+ Padagos mong pangaptan an yaon sa saimo, tanganing mayo nin siisay man na kumua kan saimong korona.+

12 “‘An saro na makakadaog—gigibuhon ko siyang sarong harigi sa templo kan sakuyang Diyos, asin dai na nanggad siya maluwas pa diyan, asin isusurat ko sa saiya an pangaran kan sakuyang Diyos+ asin an pangaran kan siyudad kan sakuyang Diyos, an Bagong Jerusalem+ na nagbababa hali sa langit gikan sa sakuyang Diyos, saka an sakuyang bagong pangaran.+ 13 An may talinga magdangog sa sinasabi kan espiritu sa mga kongregasyon.’

14 “Sa anghel kan kongregasyon sa Laodicea+ isurat mo: Ini an mga bagay na sinabi kan Amen,+ an maimbod asin totoong saksi,+ an kapinunan kan paglalang nin Diyos:+ 15 ‘Aram ko an saimong mga gibo, na ika bakong malipot asin bako man mainit. An gusto ko kutana malipot ka o kaya mainit. 16 Kaya huling maimbong* ka asin bakong mainit+ o malipot,+ itutupga taka hali sa sakuyang nguso. 17 Huling sinasabi mo, “Mayaman+ ako asin nakatipon na nin mga kayamanan saka dai ako nangangaipo nin ano pa man,” pero dai mo aram na ika miserable asin kahirak-hirak saka dukha asin buta saka huba, 18 sinasadol taka na magbakal ka sa sako nin bulawan na dinalisay sa kalayo tanganing magin mayaman ka, asin nin puting mga bado tanganing may ikasulot ka asin dai mahiling an makasupog mong kahubaan,+ saka nin panglahid sa mata tanganing ilahid sa saimong mga mata+ para makahiling ka.+

19 “‘An gabos na namumutan ko sinasaway ko asin dinidisiplina.+ Kaya magin maigot ka asin magsulsol.+ 20 Uni! Nakatindog ako sa may pinto asin nagtutuktok. Kun may siisay man na makadangog kan boses ko asin buksan an pinto, malaog ako sa saiyang harong saka makakan ako kan pamanggihan na kaiba siya asin siya makakan na kaiba ko. 21 Sa saro na makakadaog,+ papatukawon ko siyang kaiba ko sa sakuyang trono,+ kun paanong ako nakadaog asin tuminukaw+ kaiba kan sakuyang Ama sa saiyang trono. 22 An may talinga magdangog sa sinasabi kan espiritu sa mga kongregasyon.’”

4 Pagkatapos kaini, uya! may nahiling akong sarong bukas na pinto sa langit, asin an inot na boses na nadangog kong nakipag-ulay sa sako garo tanog nin trumpeta, na nagsasabi: “Magsakat ka digdi, asin ipapahiling ko sa saimo an mga bagay na kaipuhan mangyari.” 2 Dangan tulos-tulos akong napasairarom sa kapangyarihan kan espiritu, asin uya! may sarong trono na nasa puwesto kaiyan sa langit, asin igwa nin nakatukaw sa trono.+ 3 Asin an Saro na nakatukaw igwa nin itsurang nakakaagid sa gapong jaspe+ asin gapong sardio,* asin nakapalibot sa trono an sarong bulalangaw* na siring sa esmeralda an itsura.+

4 Sa palibot kan trono igwa nin 24 trono, asin sa mga tronong iyan nahiling kong nakatukaw an 24 kamagurangan+ na nakasulot nin puting mga bado, asin may koronang bulawan sa saindang mga payo. 5 Asin igwa nin kikilat+ asin mga boses saka mga daguldol+ hali sa trono; asin may pitong ilawan na naglalaad sa atubangan kan trono, asin an mga ini nagrerepresentar sa pitong espiritu nin Diyos.+ 6 Sa atubangan kan trono igwa nin garo salming na dagat,+ siring sa kristal.

Sa tahaw kan trono asin sa palibot kan trono,* igwa nin apat na buhay na linalang+ na pano nin mga mata sa atubangan asin likod. 7 An inot na buhay na linalang nakakaagid sa leon,+ asin an ikaduwang buhay na linalang nakakaagid sa torilyong baka,+ asin an ikatulong buhay na linalang+ igwa nin lalawgon na nakakaagid sa tawo, asin an ikaapat na buhay na linalang+ nakakaagid sa naglalayog na agila.+ 8 Asin an lambang saro sa apat na buhay na linalang igwa nin anom na pakpak; an mga iyan pano nin mga mata sa palibot saka sa irarom.+ Asin aldaw-banggi sindang padagos na nagsasabi: “Banal, banal, banal an Diyos na Jehova,*+ an Makakamhan sa Gabos, na iyo kaidto asin iyo ngunyan asin iyo an maabot.”+

9 Sa kada beses na an mga buhay na linalang minatao nin kamurawayan asin onra saka pasasalamat sa Saro na nakatukaw sa trono, an Saro na nabubuhay sagkod nuarin pa man,+ 10 minasubsob an 24 kamagurangan+ sa atubangan kan Saro na nakatukaw sa trono saka minasamba sinda sa Saro na nabubuhay sagkod nuarin pa man, asin inaapon ninda an saindang mga korona sa atubangan kan trono, na nagsasabi: 11 “Maninigo ka, Jehova* na samuyang Diyos, na mag-ako kan kamurawayan+ asin kan onra+ saka kan kapangyarihan,+ dahil linalang mo an gabos na bagay,+ asin huli sa saimong kabutan nag-eksister sinda asin nalalang.”

5 Asin nahiling ko sa tuong kamot kan Saro na nakatukaw sa trono+ an sarong rolyo na may surat sa mag-inibong* asin selyado nin pitong selyo. 2 Asin may nahiling akong sarong makusog na anghel na nagtataram sa makusog na boses: “Siisay an maninigo na magbukas kan rolyo asin magtangkas kan mga selyo kaiyan?” 3 Pero mayo nin siisay man sa langit o sa daga o sa irarom man kan daga an nakabukas kan rolyo o nakahiling kan laog kaiyan. 4 Grabe an hibi ko huling mayo nin nanumpungan na maninigong magbukas kan rolyo o maghiling kan laog kaiyan. 5 Pero an saro sa kamagurangan nagsabi sa sako: “Magpundo ka na sa paghibi. Uya! An Leon kan tribo ni Juda,+ an gamot+ ni David,+ nakadaog+ kaya maninigo siyang magbukas kan rolyo asin kan pitong selyo kaiyan.”

6 Asin nahiling kong nakatindog sa tahaw* kan trono asin kan apat na buhay na linalang saka kan kamagurangan+ an sarong kordero+ na garo baga ginadan,+ asin igwa iyan nin pitong sungay saka pitong mata, asin an mga mata nagrerepresentar sa pitong espiritu nin Diyos+ na ipinadara sa bilog na daga. 7 Tulos-tulos siyang nagrani asin kinua an rolyo sa tuong kamot kan Saro na nakatukaw sa trono.+ 8 Kan kuanon niya an rolyo, an apat na buhay na linalang saka an 24 kamagurangan+ suminubsob sa atubangan kan Kordero, asin an kada saro sa sainda igwa nin arpa asin mga bulawan na mangko na pano nin insenso. (An insenso nagrerepresentar sa mga pamibi kan mga banal.)+ 9 Asin nagkakaranta sinda nin sarong bagong kanta,+ na an sabi: “Maninigo kang magkua kan rolyo asin magbukas kan mga selyo kaiyan, huli ta ginadan ka asin paagi kan saimong dugo nagbakal ka nin mga tawo para sa Diyos+ hali sa lambang tribo asin lengguwahe asin banwaan saka nasyon,+ 10 asin ginibo mo sinda na magin sarong kahadian+ asin mga saserdote kan satuyang Diyos,+ asin papamahalaan ninda an daga bilang mga hadi.”+

11 Asin nahiling ko an dakul na anghel sa palibot kan trono asin kan mga buhay na linalang saka kan kamagurangan, asin nadangog ko man an saindang boses. An kabilangan ninda manampulong ribo nin manampulong ribo saka rinibong ribo-ribo,+ 12 asin sinasabi ninda sa makusog na boses: “An Kordero na ginadan+ maninigo na mag-ako kan kapangyarihan saka kayamanan asin kadunungan saka kusog asin onra saka kamurawayan asin kaumawan.”+

13 Asin nadangog ko an lambang linalang sa langit asin sa daga asin sa irarom kan daga+ saka sa dagat, asin an gabos na bagay na yaon sa mga iyan, na nagsasarabi: “Sa Saro na nakatukaw sa trono+ asin sa Kordero,+ mapasainda an kaumawan saka an onra+ asin an kamurawayan saka an kakusugan sagkod nuarin pa man.”+ 14 An apat na buhay na linalang nagsasarabi: “Amen!” asin an kamagurangan suminubsob saka suminamba.

6 Asin nahiling ko na binuksan kan Kordero+ an saro sa pitong selyo,+ asin nadangog ko an saro sa apat na buhay na linalang+ na garo daguldol an boses na nagsabi: “Madya!” 2 Asin uya! nahiling ko an sarong puting kabayo,+ asin an nakasakay diyan igwa nin pana; asin sarong korona an itinao sa saiya,+ asin luminuwas siya tanganing mandaog saka tanganing lubuson an saiyang pandadaog.+

3 Kan buksan niya an ikaduwang selyo, nadangog ko an ikaduwang buhay na linalang+ na nagsabi: “Madya!” 4 Saro pang kabayo an luminuwas, sarong kabayo na kulor kalayo, asin tinugutan an nakasakay diyan na halion an katuninungan sa daga tanganing maggaradanan an mga tawo, asin sarong dakulang espada an itinao sa saiya.+

5 Kan buksan niya an ikatulong selyo,+ nadangog ko an ikatulong buhay na linalang+ na nagsabi: “Madya!” Asin uya! nahiling ko an sarong itom na kabayo, asin an nakasakay diyan igwang kapot-kapot na timbangan. 6 Nadangog ko an garo sarong boses sa tahaw kan apat na buhay na linalang na nagsabi: “Sarong takad* nin trigo sa kantidad na sarong denario*+ asin tulong takad* nin sebada sa kantidad na sarong denario; asin dai mo pagdanyaran an lanang oliba saka an arak.”+

7 Kan buksan niya an ikaapat na selyo, nadangog ko an boses kan ikaapat na buhay na linalang+ na nagsabi: “Madya!” 8 Asin uya! nahiling ko an sarong malungsing kabayo, asin an nakasakay diyan igwa nin pangaran na Kagadanan. Asin an Lubungan* nagsusunod sa likudan niya. Asin tinawan sinda nin awtoridad sa ikaapat na kabtang kan daga, tanganing gumadan paagi sa halabang espada asin paagi sa kakulangan nin kakanon+ asin paagi sa nakakagadan na epidemya* saka paagi sa mababangis na hayop sa daga.+

9 Kan buksan niya an ikalimang selyo, nahiling ko sa irarom kan altar+ an dugo*+ kan mga ginadan huli sa tataramon nin Diyos asin huli sa ginibo nindang pagpatotoo.+ 10 Nagkurahaw sinda sa makusog na boses, na nagsasabi: “Soberanong Kagurangnan,* banal asin totoo,+ sagkod nuarin ka magpupugol sa paghukom asin sa pagbalos sa mga nag-iistar sa daga para sa samuyang dugo?”+ 11 Asin sarong halabang puting bado an itinao sa kada saro sa sainda,+ asin sinabihan sinda na maghalat pa nin dikit na panahon, sagkod na makumpleto an bilang kan saindang mga kapwa uripon asin mga tugang na gagadanon man kapareho ninda.+

12 Asin nahiling ko na binuksan niya an ikaanom na selyo, asin nagkaigwa nin makusog na linog; asin an saldang* nagin maitom na siring sa telang sako na gibo sa barahibo,* asin an bulan nagin mapula na siring sa dugo,+ 13 asin an mga bituon sa langit nagkahurulog sa daga na siring sa pagtakdag nin mga hilaw na igos* hali sa puon kaiyan pag nayuyugyog nin makusog na duros. 14 Asin nawara an langit na siring sa linukot* na rolyo,+ asin an lambang bukid saka an lambang isla hinali sa kinamumugtakan kaiyan.+ 15 Dangan an mga hadi sa daga, an mga halangkaw na opisyal, an mga komandante militar, an mga mayaman, an mga makusog, an lambang uripon, asin an lambang tawong talingkas nagtarago sa mga lungib saka sa darakulang gapo sa kabukidan.+ 16 Asin pigpaparasabi ninda sa mga bukid asin sa darakulang gapo: “Rumpagi kami+ asin tagua kami sa mga mata kan Saro na nakatukaw sa trono+ asin sa kaanggutan* kan Kordero,+ 17 huli ta nag-abot na an dakulang aldaw kan saindang kaanggutan,+ asin siisay an makakaligtas?”+

7 Pagkatapos kaini, nakahiling ako nin apat na anghel na nakatindog sa apat na kanto kan daga, na pinupugulan nin higot an apat na duros kan daga, tanganing dai nin duros na maghuyop sa daga o sa dagat o sa arin man na kahoy. 2 Asin nahiling ko an saro pang anghel na nag-iitaas hali sa sirangan,* na kapot an pantatak kan buhay na Diyos; asin nagkurahaw siya sa makusog na boses sa apat na anghel na tinawan nin awtoridad na rauton an daga saka an dagat, 3 na sinasabi: “Dai nindo pagrauton an daga o an dagat o an mga kahoy, sagkod na dai mi pa natatapos na tatakan+ an mga uripon kan satuyang Diyos sa saindang angog.”+

4 Asin nadangog ko an bilang kan mga tinatakan, 144,000,+ na tinatakan hali sa lambang tribo kan mga aki ni Israel:+

5 Hali sa tribo ni Juda 12,000 an tinatakan;

hali sa tribo ni Ruben 12,000;

hali sa tribo ni Gad 12,000;

6 hali sa tribo ni Aser 12,000;

hali sa tribo ni Neftali 12,000;

hali sa tribo ni Manases+ 12,000;

7 hali sa tribo ni Simeon 12,000;

hali sa tribo ni Levi 12,000;

hali sa tribo ni Isacar 12,000;

8 hali sa tribo ni Zebulon 12,000;

hali sa tribo ni Jose 12,000;

hali sa tribo ni Benjamin 12,000 an tinatakan.

9 Pagkatapos kaini, uya! nahiling ko an sarong dakulang kadaklan, na dai kayang bilangon nin siisay man na tawo, hali sa gabos na nasyon asin tribo asin banwaan saka lengguwahe,+ na nakatindog sa atubangan kan trono asin sa atubangan kan Kordero, saka nakasulot nin haralabang puting bado;+ asin may kapot sindang mga sanga nin palma.+ 10 Asin padagos sindang nagkukurahaw sa makusog na boses, na nagsasabi: “Utang mi an samong kaligtasan sa satuyang Diyos, na nakatukaw sa trono,+ pati man sa Kordero.”+

11 An gabos na anghel nakatindog sa palibot kan trono asin kan kamagurangan+ saka kan apat na buhay na linalang, asin suminubsob sinda sa atubangan kan trono saka suminamba sa Diyos, 12 na sinasabi: “Amen! An kaumawan saka an kamurawayan asin an kadunungan saka an pasasalamat asin an onra saka an kapangyarihan asin an kusog mapasa-Diyos niyato sagkod nuarin pa man.+ Amen.”

13 Dangan an saro sa kamagurangan nagsabi sako: “Ining mga nakasulot nin haralabang puting bado,+ sairisay sinda asin sain sinda hali?” 14 Kaya sinabi ko tulos sa saiya: “Kagurangnan ko, ika an nakakaaram.” Asin sinabi niya sa sako: “Ini an mga nakabalyo* hali sa nag-aging dakulang kasakitan,*+ asin linabahan ninda an saindang haralabang bado saka pinaputi an mga iyan sa dugo kan Kordero.+ 15 Iyan an dahilan kaya yaon sinda sa atubangan kan trono nin Diyos, saka nagtatao sinda sa saiya nin sagradong paglilingkod aldaw asin banggi sa saiyang templo; asin bibikladon kan Saro na nakatukaw sa trono+ an saiyang tolda sa ibabaw ninda.+ 16 Dai na sinda magugutom ni mapapaha man, asin dai na sinda mapapaso kan aldaw o kan ano man na grabeng init,+ 17 huli ta an Kordero,+ na yaon sa tahaw* kan trono, iyo an magpapastor sa sainda+ saka magiya sa sainda pasiring sa mga burabod kan tubig nin buhay.+ Asin papahidon nin Diyos an lambang luha sa saindang mga mata.”+

8 Kan buksan niya+ an ikapitong selyo,+ nagsilensiyo sa langit sa laog nin mga kabangang oras. 2 Asin nahiling ko an pitong anghel+ na nakatindog sa atubangan nin Diyos, asin tinawan sinda nin pitong trumpeta.

3 Saro pang anghel, na may kapot na bulawan na lalagan* nin insenso, an nag-abot saka tuminindog sa may altar,+ asin tinawan siya nin dakul na insenso+ tanganing idulot niya iyan sa bulawan na altar+ na nasa atubangan kan trono kasabay kan pagpamibi kan gabos na mga banal. 4 An aso kan insenso na nasa kamot kan anghel nag-itaas sa atubangan nin Diyos kasabay kan mga pamibi+ kan mga banal. 5 Pero tulos-tulos na pinano kan anghel nin naglalaad na mga baga hali sa altar an lalagan nin insenso asin inapon iyan sa daga. Asin nagkaigwa nin mga daguldol saka mga boses asin mga silyab nin kikilat+ saka nin linog. 6 Asin an pitong anghel na may pitong trumpeta+ nag-andam na patanugon an mga iyan.

7 Pinatanog kan inot na anghel an saiyang trumpeta. Asin nag-uran sa daga+ nin yelo* asin kalayo na may salak na dugo; asin nasulo an ikatulong kabtang kan daga asin an ikatulong kabtang kan kakahuyan saka an gabos na berdeng tanom.+

8 Pinatanog kan ikaduwang anghel an saiyang trumpeta. Asin sarong garo dakulang bukid na nagkakalayo an inapon sa dagat.+ Asin nagin dugo an ikatulong kabtang kan dagat;+ 9 asin nagkagaradan an ikatulong kabtang kan mga buhay na linalang sa dagat,*+ asin nagkararaot an ikatulong kabtang kan mga barko.

10 Pinatanog kan ikatulong anghel an saiyang trumpeta. Asin sarong dakulang bituon na naglalaad na siring sa lampara an nahulog hali sa langit, asin buminagsak iyan sa ikatulong kabtang kan mga salog saka sa mga burabod nin tubig.+ 11 An pangaran kan bituon Ahenho.* Asin an ikatulong kabtang kan katubigan nagin ahenho, asin dakul na tawo an nagkagaradan dahil sa tubig, huling nagin mapait ini.+

12 Pinatanog kan ikaapat na anghel an saiyang trumpeta. Asin tinamaan an ikatulong kabtang kan saldang*+ asin an ikatulong kabtang kan bulan saka an ikatulong kabtang kan mga bituon, tanganing an ikatulong kabtang kan mga iyan magdiklom+ asin dai magkaigwa nin liwanag an ikatulong kabtang kan lawig kan aldaw, siring man kan banggi.

13 Asin nahiling ko an sarong agila na naglalayog sa kaitaasan asin nadangog ko iyan na nagsabi sa makusog na boses: “Hirak man, hirak man, hirak man+ sa mga nag-iistar sa daga dahil sa natatada pang pagpatanog nin trumpeta kan tulong anghel na madali nang maghayop kan saindang mga trumpeta!”+

9 Pinatanog kan ikalimang anghel an saiyang trumpeta.+ Asin nahiling ko an sarong bituon na nahulog sa daga hali sa langit, asin itinao sa saiya an liyabe sa bunganga* kan kairaruman.*+ 2 Binuksan niya an bunganga* kan kairaruman, asin may nag-itaas na aso hali sa bunganga* na siring sa aso nin dakulang hurno, asin nagdiklom an saldang,*+ pati an duros, dahil sa aso na hali sa bunganga.* 3 Asin hali sa aso may nagruluwas na mga duron na nagpasiring sa daga,+ asin tinawan sinda nin awtoridad, na kapareho kan awtoridad kan mga eskorpiyon* sa daga. 4 Sinabihan sinda na dai pagdanyaran an mga tanom sa daga o an arin man na berdeng tinanom o an arin man na kahoy, kundi idto sanang mga tawo na mayo nin tatak nin Diyos sa saindang angog.+

5 Asin tinugutan an mga duron, bakong para gadanon sinda, kundi para pasakitan sinda nin limang bulan, asin an saindang pagsakit kapareho kan pagsakit na namamatian nin sarong tawo pag pigtusok nin eskorpiyon.*+ 6 Sa mga aldaw na idto, hahanapon nin mga tawo an kagadanan pero dai nanggad ninda iyan makukua, asin gugustuhon nindang magadan, alagad an kagadanan madulag sa sainda.

7 Asin an itsura kan mga duron nakakaagid sa mga kabayong andam para sa ralaban;+ an saindang mga payo igwa nin garo mga koronang bulawan, asin an saindang mga lalawgon nakakaagid sa lalawgon nin mga tawo, 8 pero an saindang buhok nakakaagid sa buhok nin mga babayi. Asin an saindang mga ngipon nakakaagid sa mga ngipon nin mga leon,+ 9 asin igwa sinda nin mga takop sa daghan na nakakaagid sa mga lansang na takop sa daghan. Asin an tanog kan saindang mga pakpak garo tanog nin mga karwaheng guyod nin mga kabayong nagdadaralagan pasiring sa ralaban.+ 10 Igwa man sinda nin mga ikog na may pantusok* na kapareho kan sa mga eskorpiyon, asin yaon sa mga ikog ninda an saindang awtoridad na pasakitan an mga tawo nin limang bulan.+ 11 Igwa sinda nin hadi na namamahala sa sainda, an anghel kan kairaruman.+ Sa Hebreo an saiyang pangaran Abadon,* pero sa Griego igwa siya nin pangaran na Apolyon.*

12 Tapos na an sarong pagdeklarar nin hirak man.+ Uya! Duwa pang pagdeklarar nin hirak man an maabot pagkatapos kan mga bagay na ini.

13 Pinatanog kan ikaanom na anghel+ an saiyang trumpeta.+ Asin may nadangog akong sarong boses hali sa mga sungay kan bulawan na altar+ na nasa atubangan nin Diyos 14 na nagsabi sa ikaanom na anghel na igwa kan trumpeta: “Hubadan mo an apat na anghel na nakagapos duman sa dakulang salog na Eufrates.”+ 15 Asin an apat na anghel na inandam para sa itinalaan na oras asin aldaw asin bulan saka taon hinubadan sa pagkakagapos tanganing gadanon an ikatulong kabtang kan mga tawo.

16 An mga hukbo kan mga kabalyero igwa nin bilang na duwang pulong ribo na manampulong ribo;* nadangog ko an kabilangan ninda. 17 Asin sa bisyon arog kaini an nahiling ko sa mga kabayo asin sa mga nakasakay diyan: Igwa sinda nin mga takop sa daghan na siring sa kalayo an pagkapula asin siring sa jacinto an pagkaasul saka siring sa asupre an pagka-yellow, asin an mga payo kan mga kabayo nakakaagid sa mga payo nin mga leon,+ asin igwa nin kalayo asin aso saka asupre na nagluwas sa mga nguso kaini. 18 An ikatulong kabtang kan mga tawo ginadan kan tulong damat na ini, kan kalayo asin kan aso saka kan asupre na nagluwas sa saindang nguso. 19 Huli ta an awtoridad kan mga kabayo yaon sa saindang nguso asin sa saindang ikog, dahil an mga ikog ninda nakakaagid sa mga halas saka igwa nin payo, asin paagi kaiyan nandadanyar sinda.

20 Pero an mga tawong dai nagadan kan mga damat dai nagsulsol sa mga gibo kan saindang kamot; dai sinda nagpundo sa pagsamba sa mga demonyo asin sa mga idolo na gibo sa bulawan asin plata* asin tanso asin gapo saka kahoy, na dai man nakakahiling ni nakakadangog ni nakakalakaw.+ 21 Asin dai ninda pinagsulsulan an mga ginibo nindang paggadan o an pagsagibo ninda nin espiritismo o an saindang seksuwal na imoralidad* o an saindang mga paghabon.

10 Asin nahiling ko an saro pang makusog na anghel na nagbababa hali sa langit na nagugubingan* nin panganuron saka may bulalangaw sa saiyang payo, asin an saiyang lalawgon nakakaagid sa aldaw,*+ asin an saiyang mga tabay* nakakaagid sa mga hariging kalayo, 2 asin igwa siyang kapot na sadit na rolyo na nakabiklad. Asin itinungtong niya an tuo niyang bitis sa dagat, pero an wala niyang bitis itinungtong niya sa daga, 3 asin nagkurahaw siya sa makusog na boses na siring sa pag-ungal nin sarong leon.+ Asin kan magkurahaw siya, nadangog ko an boses kan pitong daguldol.+

4 Kan magtaram an pitong daguldol, masurat na kuta ako, pero may nadangog akong boses na hali sa langit+ na nagsabi: “Selyaduhan mo an mga bagay na sinabi kan pitong daguldol, asin dai mo iyan ipagsurat.” 5 An anghel na nahiling kong nakatindog sa dagat asin sa daga itinaas an saiyang tuong kamot sa langit, 6 asin suminumpa siya sa ngaran kan Saro na nabubuhay sagkod nuarin pa man,+ na naglalang kan langit saka kan mga bagay na yaon diyan asin kan daga saka kan mga bagay na yaon diyan asin kan dagat saka kan mga bagay na yaon diyan,+ na sinasabi: “Dai na nin mangyayaring pag-atraso pa. 7 Kundi sa mga aldaw na diyan papatanugon na kan ikapitong anghel+ an saiyang trumpeta,+ an sagradong hilom+ na ipinahayag nin Diyos bilang maugmang bareta sa saiyang mga uripon na mga propeta+ nautob na nanggad.”

8 Asin nadangog ko an boses na hali sa langit+ na nakikipag-ulay giraray sa sako asin nagsasabi: “Magduman ka, kuana an nakabiklad na rolyo na kapot kan anghel na nakatindog sa dagat asin sa daga.”+ 9 Nagduman ako sa anghel asin sinabi ko sa saiya na itao sa sako an sadit na rolyo. Sinabi niya sa sako: “Kuanon mo iyan asin kakanon mo,+ asin papahaldaton* kaiyan an tulak mo, pero sa nguso mo magigin mahamis iyan na siring sa tangguli.”* 10 Kinua ko sa kamot kan anghel an sadit na rolyo tapos kinakan iyan,+ asin sa nguso ko iyan nagin mahamis na siring sa tangguli,+ pero kan makakan ko na iyan, naghaldat* an tulak ko. 11 Asin sinabi ninda sa sako: “Kaipuhan na magpropesiya ka giraray manungod sa mga banwaan saka mga nasyon asin mga lengguwahe saka dakul na hadi.”

11 Asin tinawan ako nin sarong tambo* na garo sugkod*+ mantang sinasabi niya: “Tumindog ka asin sukulon mo an santuwaryo kan templo nin Diyos asin an altar saka an mga nagsasaramba diyan. 2 Alagad kun manungod sa patyo na yaon sa luwas kan santuwaryo kan templo, pabayaan mo iyan asin dai mo iyan pagsukulon, huli ta itinao na iyan sa mga nasyon, asin titimak-timakan ninda an banal na siyudad+ sa laog nin 42 na bulan.+ 3 Isusugo ko an sakuyang duwang saksi tanganing magpropesiya sa laog nin 1,260 aldaw na nakasulot nin telang sako.” 4 Nagrerepresentar sa sainda an duwang puon nin olibo+ saka an duwang kandelero,+ asin nakatindog sinda sa atubangan kan Kagurangnan kan daga.+

5 Kun may siisay man na gustong maggibo sa sainda nin maraot, minaluwas sa saindang nguso an kalayo asin tinutumtom an saindang mga kaiwal. Iyo, kun may siisay man na gustong maggibo sa sainda nin maraot, sa arog kaiyan na paagi siya gagadanon. 6 Igwa sinda nin awtoridad na sarahan an kalangitan+ tanganing mayong bumagsak na uran+ sa mga aldaw kan pagpropesiya ninda, asin igwa sinda nin awtoridad na gibuhon na dugo an katubigan+ saka paabutan an daga nin gabos na klase nin damat pirang beses man ninda iyan gustuhon.

7 Pag natapos na ninda an saindang pagpapatotoo, an mabangis na hayop na naghawas hali sa kairaruman* makikipaglaban sa sainda asin dadaugon sinda saka gagadanon sinda.+ 8 Asin an saindang mga bangkay mahuhutad sa mayor na tinampo kan dakulang siyudad na sa espirituwal na sentido* inaapod na Sodoma asin Ehipto, kun sain duman man pinadusahan nin kagadanan sa harigi an saindang Kagurangnan. 9 Asin an mga tawo hali sa mga banwaan asin mga tribo asin mga lengguwahe saka mga nasyon pagmamasdan an saindang mga bangkay sa laog nin tulo may kabangang aldaw,+ asin dai ninda tutugutan na mailubong an saindang mga bangkay. 10 Asin an mga nag-iistar sa daga mag-uurugma saka magseselebrar dahil sa pagkagadan ninda, asin mapadara sinda nin mga regalo sa lambang saro, huli ta pinasakitan kan duwang propetang ini an mga nag-iistar sa daga.

11 Pakalihis kan tulo may kabangang aldaw, an espiritu nin buhay hali sa Diyos luminaog sa sainda,+ asin tuminindog sinda, asin nakamati nin grabeng takot an mga nakahiling sa sainda. 12 Asin nadangog ninda an sarong makusog na boses na hali sa langit na nagsabi sa sainda: “Magsakat kamo digdi.” Asin nag-itaas sinda na nasa panganuron pasiring sa langit, asin nahiling sinda kan* saindang mga kaiwal. 13 Kan oras na iyan, naglinog nin makusog, asin nagaba an ikasampulong kabtang kan siyudad; asin 7,000 katawo an nagkagaradan sa linog, asin an iba pa nagkatarakot saka nagpamuraway sa Diyos nin langit.

14 Tapos na an pagdeklarar kan ikaduwang hirak man.+ Uya! Madali nang umabot an pagdeklarar kan ikatulong hirak man.

15 Pinatanog kan ikapitong anghel an saiyang trumpeta.+ Asin nagkaigwa nin makusog na mga boses sa langit, na nagsasabi: “An kahadian kan kinaban nagin nang Kahadian kan satuyang Kagurangnan+ saka kan saiyang Cristo,+ asin mamamahala siya bilang hadi sagkod nuarin pa man.”+

16 Asin an 24 kamagurangan+ na nakatukaw sa saindang mga trono sa atubangan nin Diyos suminubsob asin suminamba sa Diyos, 17 na sinasabi: “Nagpapasalamat kami sa saimo, Diyos na Jehova,* an Makakamhan sa Gabos, an saro na iyo ngunyan+ asin iyo kaidto, huli ta ginamit mo na an saimong dakulang kapangyarihan asin nagpuon ka nang mamahala bilang hadi.+ 18 Pero an mga nasyon nagkaaranggot nin grabe, asin ipinahiling mo an grabeng kaanggutan mo, asin uminabot an itinalaan na panahon tanganing hukuman an mga gadan saka tawan nin balos+ an saimong mga uripon na mga propeta+ asin an mga banal saka idtong mga may pagkatakot sa saimong pangaran, an mga hamak saka an mga midbid, asin tanganing laglagon idtong mga nagraraot* kan daga.”+

19 Asin nabuksan an santuwaryo kan templo nin Diyos sa langit, asin an kaban kan saiyang tipan nahiling sa santuwaryo kan templo niya.+ Asin nagkaigwa nin mga silyab nin kikilat asin mga boses saka mga daguldol asin linog saka makusog na uran nin yelo.*

12 Dangan sarong dakulang tanda an nahiling sa langit: Sarong babayi+ na nagugubingan kan aldaw, asin an bulan nasa irarom kan saiyang mga bitis, asin sa saiyang payo igwa nin koronang 12 bituon, 2 asin siya bados. Nagkukurahaw siya dahil sa kulog na saiyang namamatian asin sa sakit nin pangangaki.

3 Saro pang tanda an nahiling sa langit. Uya! Sarong dakulang dragon+ na kulor kalayo, na may pitong payo saka sampulong sungay, asin sa mga payo kaiyan igwa nin pitong diyadema;* 4 asin ginuguyod kan ikog kaiyan an ikatulong kabtang kan mga bituon+ sa langit, asin inapon kaiyan an mga bituon paibaba sa daga.+ Asin padagos na nagtindog an dragon sa atubangan kan babayi+ na madali nang mangaki, tanganing pag nangaki na siya, masiba kaini an saiyang aki.

5 Asin nangaki siya nin sarong aki,+ sarong lalaki, na iyo an magpapastor sa gabos na nasyon paagi sa sugkod na lansang.+ Asin inagaw* an saiyang aki asin dinara sa Diyos duman sa Saiyang trono. 6 Dangan nagdulag an babayi pasiring sa kaawagan, kun sain igwa siya nin lugar na inandam nin Diyos asin kun sain papakakanon ninda siya sa laog nin 1,260 aldaw.+

7 Asin nagkaigwa nin giyera sa langit: Si Miguel*+ asin an saiyang mga anghel nakipaglaban sa dragon, asin an dragon saka an mga anghel kaini nakipaglaban 8 pero dai nanggana an mga ini,* asin nawaran na sinda nin lugar sa langit. 9 Kaya iinapon an dakulang dragon,+ an gurangan* na halas,+ an inaapod na Diyablo+ asin Satanas,+ na nanglalagalag sa bilog na daga;*+ iinapon siya paibaba sa daga,+ asin an saiyang mga anghel iinapon kaibanan niya. 10 Nadangog ko an sarong makusog na boses sa langit na nagsabi:

“Ngunyan nag-abot na an kaligtasan+ hali sa Diyos asin naihayag na an saiyang kapangyarihan asin naestablisar na an saiyang Kahadian+ saka nagpuon na an awtoridad kan saiyang Cristo, huli ta iinapon na paibaba an paraakusar sa satong mga tugang, na aldaw-bangging nag-aakusar sa sainda sa atubangan kan satuyang Diyos!+ 11 Asin dinaog ninda siya+ dahil sa dugo kan Kordero+ asin dahil sa mensahe kan saindang pagpatotoo,+ asin dai ninda namutan an saindang mga kalag*+ mapaatubang man sinda sa kagadanan. 12 Huli kaini, mag-ugma an kalangitan asin kamo na nag-iirok diyan! Hirak man kan daga asin kan dagat,+ huli ta buminaba na diyan sa saindo an Diyablo, na grabe an kaanggutan, palibhasa aram niyang halipot na sana an panahon niya.”+

13 Kan mahiling kan dragon na iinapon na siya paibaba sa daga,+ pinersegir niya an babayi+ na nangaki kan aking lalaki. 14 Pero itinao sa babayi an duwang pakpak kan dakulang agila,+ tanganing makalayog siya pasiring sa saiyang lugar duman sa kaawagan, kun sain papakakanon siya sa laog nin sarong panahon asin mga panahon saka kabangang panahon,*+ na harayo sa halas.+

15 Asin nagbuga an halas sa likudan kan babayi nin tubig na siring sa salog, tanganing malamos ini sa salog. 16 Pero tinabangan kan daga an babayi, asin ibinuka kan daga an nguso kaiyan tapos hinalon an salog na ibinuga kan dragon hali sa nguso kaini. 17 Kaya naanggot nin grabe an dragon sa babayi asin nagpuon ining makipaglaban sa mga natatada kan mga gikan*+ kan babayi, na nag-uutob kan mga tugon nin Diyos saka igwa kan gibuhon na pagpatotoo mapadapit ki Jesus.+

13 Asin nagtindog iyan* na daing hiro-hiro sa baybayon kan dagat.

Asin nahiling kong nagbubutwa sa dagat+ an sarong mabangis na hayop,+ na may sampulong sungay saka pitong payo, asin sa mga sungay kaiyan igwa nin sampulong diyadema,* pero sa mga payo kaiyan igwa nin mapanglanghad na mga pangaran. 2 An mabangis na hayop na nahiling ko kaagid nin leopardo, pero an mga bitis kaiyan kaagid kan mga bitis nin oso, asin an nguso kaiyan kaagid kan nguso nin leon. Asin tinawan kan dragon+ an hayop kan kapangyarihan kaini* asin kan trono kaini saka nin dakulang awtoridad.+

3 Nahiling kong an saro sa mga payo kaiyan garo baga nalugadan nin grabe, pero narahay an nakakagadan na lugad kaiyan,+ asin an bilog na daga may paghangang nagsunod sa mabangis na hayop. 4 Asin sinamba ninda an dragon huli ta itinao kaini an awtoridad sa mabangis na hayop, asin sinamba ninda an mabangis na hayop, na sinasabi: “Siisay an arog kan mabangis na hayop, asin siisay an kayang lumaban diyan?” 5 Tinawan iyan nin sarong nguso na nagtataram nin mga kapalangkawan saka mga paglanghad, asin tinawan iyan nin awtoridad na humiro sa laog nin 42 na bulan.+ 6 Asin ibinuka kan mabangis na hayop an nguso kaini tanganing magtaram nin mga paglanghad+ tumang sa Diyos, na linalanghadan an saiyang pangaran asin an saiyang irukan, iyo, idtong mga nag-iirok sa langit.+ 7 Tinugutan iyan na makipaglaban sa mga banal saka daugon sinda,+ asin tinawan iyan nin awtoridad na pamahalaan an lambang tribo asin banwaan asin lengguwahe saka nasyon. 8 Asin sasambahon iyan kan gabos na nag-iistar sa daga. Puon pa sa pagkaestablisar kan kinaban, mayo ni saro sa mga pangaran ninda an naisurat sa rolyo nin buhay+ kan Kordero na ginadan.+

9 Kun an siisay man igwa nin talinga, magdangog siya.+ 10 Kun an siisay man para sa pagkabihag, mabibihag siya. Kun an siisay man manggagadan* paagi sa espada,+ gagadanon siya paagi sa espada. Digdi kaipuhan an pakatagal+ asin pagtubod+ sa parte kan mga banal.+

11 Dangan nahiling ko an saro pang mabangis na hayop na nagluluwas hali sa daga, asin igwa iyan nin duwang sungay na arog kan sa kordero, pero nagpuon iyan na magtaram na siring sa dragon.+ 12 Ginagamit kaiyan an gabos na awtoridad kan inot na mabangis na hayop+ sa presensiya kaini. Asin an daga saka an mga nakaistar diyan pinapasamba kaiyan sa inot na mabangis na hayop, na narahay sa lugad kaining nakakagadan.+ 13 Asin naggigibo iyan nin darakulang tanda, mala ta nagpapababa iyan nin kalayo sa daga hali sa langit sa atubangan kan mga tawo.

14 Ilinalagalag kaiyan an mga nag-iistar sa daga paagi sa mga tanda na itinugot na gibuhon kaiyan sa presensiya kan mabangis na hayop, asin kasabay kaini, sinasabihan kaiyan an mga nag-iistar sa daga na gumibo nin sarong imahen+ kan mabangis na hayop na nagkaigwa nin tama nin espada alagad ta narahay.+ 15 Asin tinugutan iyan na tawan nin hinangos* an imahen kan mabangis na hayop, tanganing makapagtaram an imahen kan mabangis na hayop asin maipagadan kaini an gabos na habong sumamba sa imahen kan mabangis na hayop.

16 Inoobligar kaini an gabos na tawo—an mga hamak asin an mga midbid, an mga mayaman asin an mga pobre, an mga talingkas asin an mga uripon—na magkaigwa sinda nin marka sa saindang tuong kamot o sa saindang angog,+ 17 tanganing mayo nin siisay man na makabakal o makapabakal apuwera sa tawong igwa kan marka, na iyo an pangaran+ kan mabangis na hayop o an numero kan pangaran kaiyan.+ 18 Digdi kaipuhan an kadunungan: Sa siisay man na may pakasabot, sabuton* niya an numero kan mabangis na hayop, huli ta iyan numero nin tawo, asin an numero kaiyan 666.+

14 Asin uya! nahiling ko an Kordero+ na nakatindog sa Bukid nin Sion,+ asin kaibanan niya an 144,000+ na sa saindang mga angog nakasurat an saiyang pangaran asin an pangaran kan saiyang Ama.+ 2 Nadangog ko an sarong tanog na hali sa langit na siring sa tanog nin nagraragasang tubig asin siring sa tanog nin makusog na daguldol; asin an tanog na nadangog ko nakakaagid sa boses nin mga parakanta na nagkakanta mantang nagtutugtog kan saindang mga arpa. 3 Asin nagkakaranta sinda nin garo baga sarong bagong kanta+ sa atubangan kan trono asin sa atubangan kan apat na buhay na linalang+ saka kan kamagurangan,+ asin dai makabisado nin siisay man an kantang iyan apuwera sa 144,000,+ na binakal hali sa daga. 4 Sinda an mga dai nagpadigta sa mga babayi; sa katunayan, mga birhen sinda.+ Sinda an mga padagos na nagsusunod sa Kordero sain man siya magduman.+ Binakal sinda+ hali sa katawuhan bilang mga inot na bunga+ para sa Diyos asin para sa Kordero, 5 asin dai lamang sinda nagtaram nin pandadaya; dai sinda nin katuyawan.+

6 Asin nahiling ko an saro pang anghel na naglalayog sa kaitaasan,* asin igwa siya nin daing katapusan na maugmang bareta na ipapahayag sa mga nag-iistar sa daga, sa lambang nasyon asin tribo asin lengguwahe saka banwaan.+ 7 Sinasabi niya sa makusog na boses: “Magkaigwa kamo nin pagkatakot sa Diyos asin pamurawayon nindo siya, huli ta nag-abot na an oras kan saiyang paghukom,+ kaya sambahon nindo an Saro na naggibo kan langit asin kan daga asin kan dagat+ saka kan mga burabod nin tubig.”

8 Asin suminunod an ikaduwang anghel, na nagsasabi: “Buminagsak na siya! Buminagsak+ na an Dakulang Babilonya,+ siya na nagpainom sa gabos na nasyon kan saiyang arak na nagpapakusog sa pagmawot na gumibo nin* seksuwal na imoralidad!”*+

9 Suminunod sa sainda an ikatulong anghel, na nagsasabi sa makusog na boses: “Kun an siisay man magsamba sa mabangis na hayop+ asin sa imahen kaiyan saka mag-ako nin marka sa saiyang angog o sa saiyang kamot,+ 10 mainom man siya kan arak kan kaanggutan nin Diyos na ipinapalis nin puro sa kopa kan Saiyang grabeng kaanggutan,+ asin papasakitan siya paagi sa kalayo saka asupre+ sa atubangan kan banal na mga anghel asin sa atubangan kan Kordero. 11 Asin an aso kan pagsakit* ninda padagos na mag-iitaas sagkod nuarin pa man,+ asin aldaw-banggi sindang mayo nin kapahingaluan, idtong mga nagsasamba sa mabangis na hayop asin sa imahen kaiyan saka an siisay man na nag-ako kan marka kan pangaran kaiyan.+ 12 Digdi kaipuhan an pakatagal sa parte kan mga banal,+ idtong mga nag-uutob kan mga tugon nin Diyos asin nangangapot sa pagtubod+ ki Jesus.”

13 Asin nadangog ko an sarong boses na hali sa langit na nagsabi, “Isurat mo: Maugma an mga gadan na nagadan kasaro kan Kagurangnan+ puon sa panahon na ini. Iyo, an sabi kan espiritu, pagpahingaluon sinda sa saindang mga pagpapagal, huling an mga bagay na ginibo ninda dai nanggad malilingawan.”*

14 Asin uya! nahiling ko an sarong maputing panganuron, asin nakatukaw sa panganuron an saro na siring sa aki nin tawo,+ na igwa nin koronang bulawan sa saiyang payo saka sarong matarom na asyab sa saiyang kamot.

15 Saro pang anghel an nagluwas hali sa santuwaryo kan templo, na nagkukurahaw sa makusog na boses sa saro na nakatukaw sa panganuron: “Gamita an saimong asyab asin maggapas ka, ta nag-abot na an oras nin paggapas, huli ta hirinugon na an anihon sa daga.”+ 16 Asin an nakatukaw sa panganuron ginamit an saiyang asyab sa daga, asin naisagibo an pag-ani sa daga.

17 Asin saro na naman na anghel an nagluwas hali sa santuwaryo kan templo na nasa langit, asin igwa man siya nin matarom na asyab.

18 Asin saro pa giraray na anghel an nagluwas hali sa altar, asin may awtoridad siya sa kalayo. Asin nagkurahaw siya sa makusog na boses sa saro na igwa kan matarom na asyab, na sinasabi: “Gamita an saimong matarom na asyab asin tiripunon mo an mga rawog* kan puon nin ubas kan daga, huli ta hirinog na an mga bunga kaiyan.”+ 19 Ginamit kan anghel an saiyang asyab sa daga, asin pinutol niya an puon nin ubas kan daga, asin inapon niya iyan sa dakulang pugaan nin ubas kan kaanggutan nin Diyos.+ 20 Tinimak-timakan an nasa pugaan nin ubas duman sa luwas kan siyudad, asin hali sa pugaan buminulos an dugo na an rarom uminabot sa mga renda kan mga kabayo saka an rayo uminabot nin 1,600 na estadyo.*

15 Asin nahiling ko sa langit an saro pang dakula asin makangangalas na tanda, pitong anghel+ na may darang pitong damat. Iyo na ini an pinakahuring mga damat, huli ta paagi kan mga ini matatapos an kaanggutan nin Diyos.+

2 Asin nahiling ko an sarong garo dagat na salming+ na may kasalak na kalayo, asin idtong mga nanggana+ laban sa mabangis na hayop asin sa imahen kaiyan+ saka sa numero kan pangaran kaiyan+ nakatindog sa gilid kan dagat na salming, na may kapot na mga arpa nin Diyos. 3 Kinakanta ninda an kanta ni Moises+ na uripon nin Diyos asin an kanta kan Kordero,+ na an sabi:

“Kahanga-hanga asin makangangalas an saimong mga gibo,+ Diyos na Jehova,* an Makakamhan sa Gabos.+ Matanos asin tunay* an saimong mga dalan,+ Hading daing sagkod.+ 4 Siisay man nanggad an dai magkakaigwa nin pagkatakot sa saimo, Jehova,* asin dai magpapamuraway sa pangaran mo, huling ika an solamenteng maimbod?+ An gabos na nasyon madurulok saka masamba sa atubangan mo,+ huli ta an saimong matanos na mga pagbuot naihayag na.”

5 Pagkatapos kaini, nahiling ko sa langit+ na nabuksan an santuwaryo kan tolda kan patotoo,+ 6 asin an pitong anghel na may dara kan pitong damat+ nagluwas hali sa santuwaryo, na nakasulot nin badong lino na malinig saka makintab asin may hagkos na bulawan sa saindang daghan. 7 Tinawan kan saro sa apat na buhay na linalang an pitong anghel nin pitong bulawan na mangko na pano kan kaanggutan nin Diyos,+ an saro na nabubuhay sagkod nuarin pa man. 8 Asin an santuwaryo napano nin aso dahil sa kamurawayan nin Diyos+ asin dahil sa saiyang kapangyarihan, asin mayo nin nakalaog sa santuwaryo sagkod sa natapos an pitong damat+ na dara kan pitong anghel.

16 Asin nadangog ko an sarong makusog na boses na hali sa santuwaryo+ na nagsabi sa pitong anghel: “Magduman kamo asin iula nindo sa daga an laog kan pitong mangko kan kaanggutan nin Diyos.”+

2 Huminali an inot na anghel, asin inula niya an laog kan saiyang mangko sa daga.+ Asin nagkaigwa nin sarong makulog saka malalang lugad+ an mga tawo na igwa kan marka kan mabangis na hayop+ asin na nagsasamba sa imahen kaiyan.+

3 Inula kan ikaduwang anghel an laog kan saiyang mangko sa dagat.+ Asin an dagat nagin dugo+ na siring sa dugo nin gadan na tawo, asin nagkagaradan an gabos na buhay na linalang* na yaon sa dagat.+

4 Inula kan ikatulong anghel an laog kan saiyang mangko sa mga salog saka sa mga burabod nin tubig.+ Asin nagin dugo an mga iyan.+ 5 Nadangog ko an anghel na may awtoridad sa katubigan na nagsabi: “Matanos ka, ika na iyo ngunyan asin iyo kaidto,+ an Saro na maimbod,+ huli ta itinao mo an mga paghukom na ini,+ 6 dahil pinabulos ninda an dugo kan mga banal saka kan mga propeta,+ asin huli kaiyan, pinainom mo sinda nin dugo;+ maninigo iyan sa sainda.”+ 7 Asin nadangog ko an altar na nagsabi: “Iyo, Diyos na Jehova* na Makakamhan sa Gabos,+ tunay* asin matanos an saimong mga paghukom.”*+

8 Inula kan ikaapat na anghel an laog kan saiyang mangko sa saldang,*+ asin tinugutan an saldang na pasuon nin kalayo an mga tawo. 9 Asin nagkaparaso an mga tawo kan grabeng init, pero linanghadan ninda an pangaran nin Diyos, na igwa kan awtoridad sa mga damat na ini, asin dai sinda nagsurulsol saka dai man nagtao nin kamurawayan sa saiya.

10 Inula kan ikalimang anghel an laog kan saiyang mangko sa trono kan mabangis na hayop. Asin nagdiklom+ an kahadian kaini, asin kinaragat ninda an saindang dila dahil sa kulog, 11 pero linanghadan ninda an Diyos nin langit dahil sa kulog asin dahil sa saindang mga lugad, asin dai ninda pinagsulsulan an saindang mga gibo.

12 Inula kan ikaanom na anghel an laog kan saiyang mangko sa dakulang salog nin Eufrates,+ asin namara an tubig+ kaiyan tanganing maiandam an agihan para sa mga hadi+ na hali sa pigsisirangan kan aldaw.*

13 Asin may nahiling akong tulong maating ipinasabong na mga kapahayagan* na garo mga talapang na nagluwas hali sa nguso kan dragon+ asin hali sa nguso kan mabangis na hayop saka hali sa nguso kan bakong tunay na propeta. 14 Sa katunayan, mga kapahayagan iyan na ipinasabong nin mga demonyo asin naggigibo an mga iyan nin mga tanda,+ asin dinudumanan kan mga iyan an mga hadi sa bilog na daga,* tanganing tiripunon sinda sa giyera+ kan dakulang aldaw kan Diyos na Makakamhan sa Gabos.+

15 “Uya! Maabot ako na siring sa sarong parahabon.+ Maugma an saro na nagdadanay na mata+ asin iniingatan an saiyang pang-ibabaw na mga bado, tanganing dai siya maglakaw na huba asin mahiling kan mga tawo an saiyang kasusupgan.”+

16 Asin tiniripon sinda kan mga iyan sa lugar na sa Hebreo inaapod na Armagedon.*+

17 Inula kan ikapitong anghel an laog kan saiyang mangko sa duros. Dangan sarong makusog na boses an nadangog hali sa trono duman sa santuwaryo,+ na nagsasabi: “Tapos na!” 18 Asin nagkaigwa nin mga silyab nin kikilat asin mga boses saka mga daguldol, asin nagkaigwa nin sarong makusog na linog na dai pang kaagid na nangyari puon kan magkaigwa nin tawo sa daga,+ asin mahiwason saka makusugon an linog na iyan. 19 Nabanga sa tulong parte an dakulang siyudad,+ asin nagkagaraba an mga siyudad kan mga nasyon; asin ginirumdom nin Diyos an Dakulang Babilonya,+ tanganing itao diyan an kopa kan arak kan saiyang naglalaad na kaanggutan.+ 20 Siring man, nagdurulag an lambang isla, asin nagkawarara an mga bukid.+ 21 Dangan hali sa langit buminagsak sa mga tawo an darakulang yelo,*+ na an kada saro mga sarong talento* an gabat, asin linanghadan kan mga tawo an Diyos huli sa damat na pag-uran nin yelo,+ dahil grabe nanggad an damat na iyan.

17 An saro sa pitong anghel na igwa kan pitong mangko+ nagrani asin nagsabi sa sako: “Madya, ipapahiling ko sa saimo an gigibuhon na paghukom sa maimpluwensiyang hostes* na nakatukaw sa ibabaw kan dakul na katubigan,+ 2 na sa saiya nagkaigwa nin imoral na pakipagrelasyon*+ an mga hadi sa daga, asin an mga nag-iistar sa daga binurat sa arak kan saiyang seksuwal na imoralidad.”*+

3 Asin paagi sa kapangyarihan kan espiritu dinara niya ako sa sarong kaawagan. Asin nahiling ko an sarong babayi na nakasakay sa sarong mabangis na hayop na mapulahon an kulor* asin pano nin mapanglanghad na mga pangaran saka igwa nin pitong payo asin sampulong sungay. 4 An babayi nakasulot nin badong purpura*+ asin iskarlata,* asin nasasamnuhan siya nin bulawan asin mamahalon na mga bato saka mga perlas,+ asin may kapot-kapot siyang bulawan na kopa na pano nin makababalding mga bagay saka kan maating mga gibo kan saiyang seksuwal na imoralidad.* 5 Nakasurat sa saiyang angog an sarong pangaran, sarong misteryo: “Dakulang Babilonya, an ina kan mga hostes+ asin kan makababalding mga bagay sa daga.”+ 6 Asin nahiling kong an babayi burat* sa dugo kan mga banal asin sa dugo kan mga saksi ni Jesus.+

Ngunyan kan mahiling ko siya, napangalas nanggad ako. 7 Kaya sinabi kan anghel sa sako: “Taano ta napangalas ka? Sasabihon ko sa saimo an misteryo kan babayi+ saka kan mabangis na hayop na sinasakayan niya na igwa kan pitong payo asin kan sampulong sungay:+ 8 An mabangis na hayop na nahiling mo dating yaon, alagad nawara, pero madali na iyan maghawas hali sa kairaruman,*+ asin pasiring iyan sa kalaglagan. Asin an mga nakaistar sa daga—idtong an mga pangaran dai nakasurat sa rolyo nin buhay+ puon pa sa pagkaestablisar kan kinaban—magngangaralas pag nahiling ninda na an mabangis na hayop dating yaon, alagad nawara, pero matunga giraray.

9 “Digdi kaipuhan an isip na may kadunungan: An pitong payo+ nagrerepresentar sa pitong bukid, na sa ibabaw kaiyan nakatukaw an babayi. 10 Asin igwa nin pitong hadi: An lima buminagsak na, an saro yaon ngunyan, asin an saro dai pa nag-aabot; pero pag uminabot na siya, magdadanay siya nin halipot na panahon. 11 Asin an mabangis na hayop na dating yaon alagad nawara,+ iyan man an ikawalong hadi, pero naggikan iyan sa pito, asin pasiring iyan sa kalaglagan.

12 “An sampulong sungay na nahiling mo nagrerepresentar sa sampulong hadi na dai pa nag-aako nin kahadian, pero maako sinda nin awtoridad na mamahala bilang mga hadi sa laog nin sarong oras kaiba kan mabangis na hayop. 13 An mga ini igwa nin sarong kaisipan, kaya itinatao ninda an saindang kapangyarihan asin awtoridad sa mabangis na hayop. 14 Makikipaglaban an mga ini sa Kordero,+ pero huling siya Kagurangnan nin mga kagurangnan asin Hadi nin mga hadi,+ dadaugon sinda+ kan Kordero. Dadaugon man sinda kan mga kaibanan niya na mga inapod asin mga pinili saka mga maimbod.”+

15 Sinabi sa sako kan anghel: “An katubigan na nahiling mo, kun sain nakatukaw an hostes, nagrerepresentar sa mga banwaan asin mga grupo nin tawo asin mga nasyon saka mga lengguwahe.+ 16 Asin an sampulong sungay+ na nahiling mo saka an mabangis na hayop,+ mauungis an mga ini sa hostes+ asin sasamsaman ninda siya saka huhubaan, asin uubuson nindang kakanon an saiyang laman saka biyo siyang tututungon sa kalayo.+ 17 Huli ta ilinaag nin Diyos sa saindang puso na isagibo an saiyang kaisipan,+ iyo, tanganing isagibo ninda an saindang nagkakasararong kaisipan paagi sa pagtao kan saindang kahadian sa mabangis na hayop,+ sagkod na mautob an mga tataramon nin Diyos. 18 Asin an babayi+ na nahiling mo nagrerepresentar sa dakulang siyudad na igwa nin kahadian na nakakasakop sa mga hadi sa daga.”

18 Pagkatapos kaini, nahiling ko an saro pang anghel na nagbababa hali sa langit na may dakulang awtoridad, asin nagliwanag an daga huli kan saiyang kamurawayan. 2 Asin nagkurahaw siya sa makusog na boses, na nagsasabi: “Buminagsak na siya! Buminagsak na an Dakulang Babilonya,+ asin siya nagin istaran nin mga demonyo saka lugar na taguan kan lambang maraot na espiritu* asin lambang gamgam* na bakong malinig asin makauyam!+ 3 Huli ta dahil kan saiyang arak na nagpapakusog sa pagmawot na gumibo nin* seksuwal na imoralidad,* nabiktima an gabos na nasyon,+ asin an mga hadi sa daga nagkaigwa nin imoral na pakipagrelasyon sa saiya,+ asin an mga negosyante* sa daga yuminaman dahil sa daing supog na luho niya.”

4 Asin nadangog ko an saro pang boses na hali sa langit na nagsabi: “Lumuwas kamo sa saiya, banwaan ko,+ kun habo nindong madamay sa saiyang mga kasalan, asin kun habo nindong magsapar nin mga damat na para sa saiya.+ 5 Huli ta nagkaparatong-patong na an saiyang mga kasalan na uminabot sagkod sa langit,+ asin ginirumdom nin Diyos an mga ginibo niyang inhustisya.*+ 6 Gibuha sa saiya an mga bagay na ginibo niya sa iba,+ iyo, gibuha sa saiya nin doble an mga bagay na ginibo niya;+ an kopang+ tinimplahan niya, timplahi nin doble kadakul para sa saiya.+ 7 Kun gurano niya pinamuraway an saiyang sadiri asin kun gurano siya nagpangana sa saiyang daing supog na luho, arog man kaiyan kagrabe an pasakit asin kamunduan na itao nindo sa saiya. Huli ta pigpaparasabi niya sa saiyang puso: ‘Nakatukaw ako na siring sa reyna, asin bako akong balo, saka dai ako nuarin man maagi nin pagmundo.’+ 8 Iyan an dahilan kaya sa sarong aldaw maabot an mga damat na para sa saiya, an kagadanan asin pagmundo saka tiggutom, asin biyo siyang tututungon sa kalayo,+ huli ta makusog an Diyos na Jehova*+ na iyo an naghukom sa saiya.

9 “Asin an mga hadi sa daga na nagkaigwa nin imoral na pakipagrelasyon* sa saiya asin namuhay sa daing supog na luho kaiba niya magtatarangis, asin tutubtubon ninda an saindang daghan sa kamunduan dahil sa nangyari sa saiya pag nahiling ninda an aso kan pagtutong sa saiya. 10 Matirindog sinda sa harayo dahil sa takot na pasakitan man sinda arog sa saiya, asin masarabi sinda: ‘Sayang, sayang talaga, ika na dakulang siyudad,+ ikang makusog na siyudad na Babilonya, huli ta sa sarong oras uminabot an paghukom sa saimo!’

11 “Siring man, an mga negosyante sa daga nagtatarangis asin nagmumurundo dahil sa nangyari sa saiya, huli ta mayo nang mabakal kan gabos nindang paninda, 12 mga panindang bulawan, plata, mamahalon na mga bato, mga perlas, marahay na klaseng telang lino, telang purpura, seda, saka telang iskarlata; asin gabos na bagay na gibo sa mahamot na kahoy; asin gabos na klase nin produkto na gibo sa marpil* asin gibo sa mamahalon na kahoy, tanso, lansang, saka marmol; 13 pati man sinamon, mga sangkap hali sa India, insenso, pahamot na lana, kamangyan, arak, lanang oliba, pinong harina, trigo, mga baka, mga karnero, mga kabayo, mga karitela, mga uripon, asin mga tawo.* 14 Iyo, mayo na saimo an marahay na mga bunga na minawot mo,* asin an gabos na masisiram na kakanon saka magagarbong bagay nawara na sa saimo, asin dai na iyan nuarin man manunumpungan.

15 “An mga negosyanteng nagpapabakal kan mga bagay na ini, na yuminaman dahil sa saiya, matirindog sa harayo huli sa takot na pasakitan man sinda arog sa saiya asin magtatarangis sinda saka magmumurundo, 16 na sinasabi: ‘Sayang, sayang talaga, an dakulang siyudad, na nakasulot nin bado na gibo sa marahay na klaseng telang lino, purpura, asin iskarlata saka nasasamnuhan nin mga alahas na bulawan, mamahalon na mga bato, asin mga perlas,+ 17 huli ta sa sarong oras nagkawarara an kadakul na kayamanan na iyan!’

“Asin an lambang kapitan nin barko asin an lambang biyahero sa dagat asin an lambang tripulante saka an gabos na an hanapbuhay nakadepende sa dagat nagtirindog sa harayo 18 asin nagkururahaw mantang pinagmamasdan ninda an aso kan pagtutong sa saiya saka nagsabi: ‘Arin pang siyudad an arog kan dakulang siyudad na iyan?’ 19 Sinabwagan ninda nin alpog an saindang payo asin nagkururahaw sinda, na nagtatarangis saka nagmumurundo, asin sinabi ninda: ‘Sayang, sayang talaga, an dakulang siyudad, na paagi kan saiyang kayamanan yuminaman an gabos na may barko sa dagat, huli ta sa sarong oras siya nagaba!’+

20 “Mag-ugma ka dahil sa nangyari sa saiya, O langit,+ asin pati man kamong mga banal+ asin mga apostol saka mga propeta, huli ta ipinahayag na nin Diyos an paghukom niya sa saiya alang-alang sa saindo!”+

21 Asin sarong makusog na anghel an nag-alsa nin sarong gapo na garo sarong dakulaon na gapong gilingan, asin inapon niya iyan sa dagat, na sinasabi: “Arog kaiyan karikas an gigibuhon na pag-apon sa Babilonya na dakulang siyudad, asin dai na siya nuarin man manunumpungan.+ 22 Asin an boses nin mga parakanta na nagtutugtog man nin mga arpa asin an pagtugtog nin mga musikero, nin mga paraplawta, saka nin mga paratrumpeta dai na nuarin man madadangog giraray diyan sa saimo. Asin dai na nuarin man mahihiling giraray diyan sa saimo an siisay man na ekspertong trabahador, asin dai na nuarin man madadangog giraray diyan sa saimo an tanog nin gapong gilingan. 23 Dai na nuarin man magkakaigwa giraray nin liwanag nin lampara diyan sa saimo, asin dai na nuarin man madadangog giraray diyan sa saimo an boses nin sarong nobyo asin nin sarong nobya; huli ta an saimong mga negosyante iyo an nagin pinakamaimpluwensiyang mga tawo sa daga, asin paagi sa paggibo mo nin espiritismo+ nalagalag an gabos na nasyon. 24 Iyo, diyan sa saiya nakua an dugo kan mga propeta asin kan mga banal+ saka kan gabos na ginadan sa daga.”+

19 Pagkatapos kaini, nadangog ko an garo sarong makusog na boses nin dakul na linalang sa langit. Sinabi ninda: “Umawon nindo si Jah!*+ An kaligtasan asin an kamurawayan saka an kapangyarihan yaon sa satuyang Diyos, 2 dahil an saiyang mga paghukom tunay* asin matanos.+ Huli ta hinukuman na niya an maimpluwensiyang hostes na nagparaot sa kinaban huli kan seksuwal na imoralidad* kaini, asin ibinalos na niya an dugo kan saiyang mga uripon na yaon sa mga kamot*+ kan babaying ini.” 3 Asin tulos-tulos nindang sinabi sa ikaduwang pagkakataon: “Umawon nindo si Jah!*+ Asin an aso kan pagtutong sa saiya padagos na mag-iitaas sagkod nuarin pa man.”+

4 Asin an 24 kamagurangan+ saka an apat na buhay na linalang+ suminubsob asin suminamba sa Diyos na nakatukaw sa trono asin nagsabi: “Amen! Umawon nindo si Jah!”*+

5 Igwa man nin sarong boses na hali sa trono na nagsabi: “Umawon nindo an satuyang Diyos, kamo gabos na uripon niya,+ na may pagkatakot sa saiya, mga hamak man o mga midbid.”+

6 Asin may nadangog akong tanog na siring sa boses nin dakul na linalang asin siring sa nagraragasang tubig asin siring sa makusog na mga daguldol. Sinabi ninda: “Umawon nindo si Jah,*+ huli ta si Jehova* na satuyang Diyos, an Makakamhan sa Gabos,+ nagpuon nang mamahala bilang hadi!+ 7 Mag-ugma kita asin maggaya-gayang marhay asin magpamuraway sa saiya, huli ta nag-abot na an kasal kan Kordero asin an agom niya nag-andam na kan saiyang sadiri. 8 Iyo, tinugutan ining magsulot nin bado na makintab, malinig, marahay na klaseng lino—huli ta an marahay na klaseng lino simbolo kan matanos na mga gibo kan mga banal.”+

9 Asin sinabi niya sa sako, “Isurat mo: Maugma idtong mga inimbitaran sa bangkete kan kasal kan Kordero.”+ Sinabi man niya sa sako: “Ini an tunay* na mga tataramon nin Diyos.” 10 Dangan suminubsob ako sa pamitisan niya tanganing sambahon siya. Pero sinabihan niya ako: “Mag-ingat ka! Dai mo iyan paggibuhon!+ Uripon man sana ako kapareho mo asin kan mga tugang mo na igwa kan gibuhon na pagpatotoo mapadapit ki Jesus.+ Sambahon mo an Diyos!+ Huli ta an pagpatotoo mapadapit ki Jesus iyo mismo an katuyuhan kan mga propesiya.”+

11 Nahiling ko an langit na nabuksan, asin uya! sarong puting kabayo.+ Asin an nakasakay diyan inaapod na Maimbod+ asin Totoo,+ asin naghuhukom siya saka nakikipaglaban uyon sa katanusan.+ 12 An saiyang mga mata naglalaad na kalayo,+ asin sa saiyang payo igwa nin dakul na diyadema.* Nakasurat sa saiya an sarong pangaran na mayo nin nakakaaram kundi siya sana, 13 asin nakasulot siya nin pang-ibabaw na bado na may mantsa* nin dugo, asin inaapod siya sa pangaran na An Tataramon+ nin Diyos. 14 Siring man, an mga hukbo sa langit nagsusunod sa saiya na nakasakay sa puting mga kabayo, asin nakasulot sinda nin bado na puti, malinig, marahay na klaseng lino. 15 Asin may luminuwas hali sa saiyang nguso na sarong matarom na halabang espada+ na gagamiton niya para laglagon an mga nasyon, asin papasturan niya sinda paagi sa sugkod na lansang.+ Titimak-timakan man niya an mga nasa pugaan nin ubas kan naglalaad na kaanggutan kan Diyos na Makakamhan sa Gabos.+ 16 Sa saiyang pang-ibabaw na bado, iyo, sa may paa niya, igwa nin nakasurat na pangaran, Hadi nin mga hadi asin Kagurangnan nin mga kagurangnan.+

17 Nakahiling man ako nin sarong anghel na nakatindog sa tahaw kan aldaw, asin nagkurahaw siya sa makusog na boses asin nagsabi sa gabos na gamgam na naglalayog sa kaitaasan:* “Madya kamo, magtiripon kamo sa dakulang bangkete nin Diyos,+ 18 tanganing makakan nindo an laman kan mga hadi asin an laman kan mga komandante militar asin an laman kan mga makusog na tawo+ asin an laman kan mga kabayo saka kan mga nakasakay diyan,+ asin an laman kan gabos, kan mga talingkas pati kan mga uripon asin kan mga hamak saka kan mga midbid.”

19 Asin nahiling ko an mabangis na hayop asin an mga hadi sa daga saka an saindang mga hukbo na nagtiripon tanganing makipaglaban sa saro na nakasakay sa kabayo asin sa saiyang hukbo.+ 20 Asin dinakop an mabangis na hayop, asin kaiba kaiyan dinakop man an bakong tunay na propeta+ na nagsagibo sa atubangan kaiyan kan mga tanda na ipinanglagalag niya sa mga nag-ako kan marka kan mabangis na hayop+ saka sa mga nagsasamba sa imahen kaiyan.+ Mantang buhay pa, pareho sindang inapon sa nagkakalayong danaw na may naglalaad na asupre.+ 21 Pero an iba pa ginaradan paagi sa halabang espada na nagluwas sa nguso kan saro na nakasakay sa kabayo.+ Asin an gabos na gamgam nagkabarasog kan saindang mga laman.+

20 Asin nahiling ko an sarong anghel na nagbababa hali sa langit dara an liyabe kan kairaruman*+ asin may kapot na dakulang kadena. 2 Dinakop niya an dragon,+ an gurangan* na halas,+ na iyo an Diyablo+ asin Satanas,+ asin ginapos niya siya sa laog nin 1,000 taon. 3 Asin inapon niya siya sa kairaruman+ asin sinarahan iyan saka tinatakan an ibabaw kaiyan, tanganing dai na kaini mailagalag an mga nasyon sagkod na matapos an 1,000 taon. Pagkatapos kaiyan, papaluwason siya nin dikit na panahon.+

4 Asin nakahiling ako nin mga trono, asin an mga nakatukaw sa mga iyan tinawan nin awtoridad na maghukom. Iyo, nahiling ko an dugo* kan mga ginadan* dahil sa pagpatotoo ninda manungod ki Jesus saka sa pagtaram ninda manungod sa Diyos, iyo, an mga dai nagsamba sa mabangis na hayop o sa imahen kaiyan saka nagsayumang magkaigwa kan marka sa saindang angog asin sa saindang kamot.+ Asin nagkaburuhay sinda saka namahala bilang mga hadi kaiba kan Cristo+ sa laog nin 1,000 taon. 5 (An iba pa sa mga gadan+ dai nabuhay sagkod sa matapos an 1,000 taon.) Iyo iyan an inot na pagkabuhay liwat.+ 6 Maugma asin banal an siisay man na kabilang sa inot na pagkabuhay liwat;+ an ikaduwang kagadanan+ daing awtoridad+ sa sainda, kundi sinda magigin mga saserdote+ nin Diyos asin kan Cristo, asin mamamahala sinda bilang mga hadi kaiba niya sa laog nin 1,000 taon.+

7 Buweno, pagkatapos tulos kan 1,000 taon, papaluwason si Satanas hali sa saiyang presuhan, 8 asin maluwas siya para ilagalag an mga nasyon na yaon sa apat na kanto kan daga, an Gog asin Magog, tanganing tiripunon sinda para sa giyera. An bilang kan mga ini siring kan baybay sa dagat. 9 Asin nag-abante sinda sa bilog na daga, asin pinalibutan ninda an kampo kan mga banal saka an namumutan na siyudad. Pero buminaba an kalayo hali sa langit asin tinumtom sinda.+ 10 Asin an Diyablo na nanglalagalag sa sainda inapon sa danaw nin kalayo asin asupre, kun sain dati nang yaon an mabangis na hayop+ saka an bakong tunay na propeta;+ asin aldaw-banggi sindang papasakitan* sagkod nuarin pa man.

11 Asin nahiling ko an sarong dakulang puting trono asin an Saro na nakatukaw diyan.+ Hali sa atubangan niya, nagdulag an daga saka an langit,+ asin mayo nang lugar para sa mga iyan. 12 Asin nahiling ko an mga gadan, an mga midbid asin an mga hamak, na nakatindog sa atubangan kan trono, asin biniklad an mga rolyo. Pero saro pang rolyo an biniklad; iyo ini an rolyo nin buhay.+ Hinukuman an mga gadan sigun sa saindang mga gibo base sa mga nakasurat sa mga rolyo.+ 13 Asin itinao kan dagat an mga gadan na yaon diyan, asin itinao kan kagadanan saka kan Lubungan* an mga gadan na yaon sa mga iyan, asin hinukuman an kada saro sa sainda sigun sa saindang mga gibo.+ 14 Asin an kagadanan saka an Lubungan* inapon sa danaw nin kalayo.+ Iyo ini an nagrerepresentar sa ikaduwang kagadanan,+ an danaw nin kalayo.+ 15 Saro pa, an siisay man na dai nakasurat sa libro nin buhay+ inapon sa danaw nin kalayo.+

21 Asin nahiling ko an sarong bagong langit asin an sarong bagong daga;+ huli ta an dating langit asin an dating daga napara na,+ asin an dagat+ mayo na. 2 Nahiling ko man an banal na siyudad, an Bagong Jerusalem, na nagbababa hali sa langit gikan sa Diyos+ asin andam na siring sa sarong nobya na nasasamnuhan para sa saiyang agom.+ 3 Dangan nadangog ko an sarong makusog na boses na hali sa trono na nagsabi: “Hilinga! An tolda nin Diyos yaon sa katawuhan, asin mag-iirok siya sa kaibanan ninda, asin sinda magigin saiyang banwaan. Asin an Diyos mismo masasakaibanan ninda.+ 4 Asin papahidon niya an lambang luha sa saindang mga mata,+ asin an kagadanan mawawara na.+ Dai na man magkakaigwa nin pagmundo, o nin pagtangis, o nin kulog.+ An mga dating bagay nakalihis na.”

5 Asin an Saro na nakatukaw sa trono+ nagsabi: “Uya! Ginigibo kong bago an gabos na bagay.”+ Sinabi man niya: “Isurat mo, huli ta an mga tataramon na ini maimbod* asin totoo.” 6 Asin sinabi niya sa sako: “Nautob na an mga iyan! Ako an Alpha asin an Omega,* an kapinunan asin an katapusan.+ Sa siisay man na napapaha, papainumon ko siya nin daing bayad sa burabod kan tubig nin buhay.+ 7 An siisay man na makakadaog magmamana kan mga bagay na ini, asin ako magigin saiyang Diyos asin siya magigin sakuyang aki. 8 Pero para sa mga matalaw asin sa mga daing pagtubod+ asin sa mga makababaldi dahil sa saindang karigsukan* asin sa mga paragadan+ asin sa mga imoral*+ asin sa mga nagsasagibo nin espiritismo asin sa mga parasamba sa idolo saka sa gabos na putikon,+ an saindang kaaabtan iyo an danaw nin naglalaad na kalayo asin asupre.+ Nagrerepresentar ini sa ikaduwang kagadanan.”+

9 An saro sa pitong anghel na igwa kan pitong mangko na pano kan pitong huring damat+ nagrani asin nagsabi sa sako: “Madya, asin ipapahiling ko sa saimo an nobya, an agom kan Kordero.”+ 10 Kaya paagi sa kapangyarihan kan espiritu dinara niya ako sa sarong dakulaon saka halangkawon na bukid, asin ipinahiling niya sa sako an banal na siyudad na Jerusalem na nagbababa hali sa langit gikan sa Diyos+ 11 asin igwa kan kamurawayan nin Diyos.+ An kinang kaiyan siring sa sarong mamahalon na marhay na gapo, siring sa gapong jaspe na nagkikinang na kasinglinaw nin kristal.+ 12 Dakulaon saka halangkawon an pader kaiyan, asin igwa iyan nin 12 trangkahan, asin may 12 anghel sa mga trangkahan. Nakaukit sa mga trangkahan an mga pangaran kan 12 tribo kan mga aki ni Israel. 13 Sa sirangan na parte kan siyudad igwang tulong trangkahan, asin sa norteng parte igwang tulong trangkahan, asin sa timog na parte igwang tulong trangkahan, saka sa sulnupan na parte igwang tulong trangkahan.+ 14 An pader kan siyudad igwa man nin 12 gapong pundasyon, asin mahihiling sa mga iyan an 12 pangaran kan 12 apostol+ kan Kordero.

15 An saro na nakikipag-ulay sa sako may kapot na pansukol na bulawan na tambo tanganing sukulon an siyudad asin an mga trangkahan kaiyan saka an pader kaiyan.+ 16 Kuwadrado an pagkadisenyo kan siyudad, asin an laba kaiyan kapareho kan lakbang kaiyan. Asin sinukol niya an siyudad gamit an tambo, 12,000 na estadyo;* parareho an sukol kan laba asin lakbang saka langkaw kaiyan. 17 Sinukol man niya an pader kaiyan, 144 maniko,* base sa paagi nin pagsukol nin tawo, na iyo man an paagi nin pagsukol nin anghel. 18 An pader kaiyan gibo sa jaspe,+ asin an siyudad purong bulawan na siring sa silag na salming. 19 An mga pundasyon kan pader kan siyudad pinagayon paagi sa gabos na klase nin mamahalon na gapo: an inot na pundasyon gibo sa jaspe, an ikaduwa sa sapiro, an ikatulo sa kalsedonya, an ikaapat sa esmeralda, 20 an ikalima sa sardonika, an ikaanom sa sardiyo, an ikapito sa krisolito, an ikawalo sa berilo, an ikasiyam sa topasyo, an ikasampulo sa krisopraso, an ikaonse sa jacinto, an ikadose sa amatista. 21 Siring man, an 12 trangkahan 12 perlas; an kada trangkahan gibo sa sarong perlas. Asin an mayor na tinampo kan siyudad purong bulawan, siring sa silag na salming.

22 Mayo akong nahiling na templo diyan, huli ta an templo kaiyan iyo an Diyos na Jehova* na Makakamhan sa Gabos,+ asin iyo man an Kordero. 23 Asin dai na kaipuhan kan siyudad an liwanag kan saldang* o kan bulan, huli ta an kamurawayan nin Diyos an nagtataong liwanag diyan,+ asin an Kordero+ an lampara kaiyan. 24 Asin an mga nasyon magraralakaw paagi sa liwanag kaiyan,+ asin dadarahon kan mga hadi sa daga an saindang kamurawayan sa laog kaiyan. 25 An mga trangkahan kaiyan dai na nanggad isasara sa bilog na aldaw, huling mayo na diyan nin banggi.+ 26 Asin dadarahon ninda sa laog kaiyan an kamurawayan asin an onra kan mga nasyon.+ 27 Pero an ano man na may digta saka an siisay man na may ginigibong makababaldi asin pandadaya dai nanggad makakalaog diyan;+ idto sanang mga nakasurat sa rolyo nin buhay kan Kordero an makakalaog.+

22 Asin ipinahiling niya sa sako an sarong salog nin tubig nin buhay,+ kasinglinaw nin kristal, na nagbubulos hali sa trono nin Diyos asin kan Kordero+ 2 pababa sa tahaw kan mayor na tinampo kan siyudad. Sa mag-ibong na gilid kan salog igwa nin mga kahoy nin buhay na namumunga nin 12 beses kada taon, sarong beses sa kada bulan. Asin an mga dahon kan mga kahoy para sa pagpaumay kan mga nasyon.+

3 Asin dai na magkakaigwa nin ano pa man na sumpa. Imbes, an trono nin Diyos asin kan Kordero+ mamumugtak sa siyudad, asin an saiyang mga uripon magtatao sa saiya nin sagradong paglilingkod; 4 asin mahihiling ninda an saiyang lalawgon,+ asin an saiyang pangaran masusurat sa saindang angog.+ 5 Saro pa, mayo na nin banggi,+ asin dai na ninda kaipuhan an liwanag nin lampara o an liwanag kan saldang, huli ta an Diyos na Jehova* iyo an matao nin liwanag sa sainda,+ asin mamamahala sinda bilang mga hadi sagkod nuarin pa man.+

6 Sinabi niya sa sako: “An mga tataramon na ini maimbod* asin totoo;+ iyo, si Jehova,* an Diyos na nagpasabong sa mga propeta,+ nagsugo kan saiyang anghel tanganing ipahiling sa mga uripon niya an mga bagay na madali nang mangyari. 7 Uya! Madali na akong mag-abot.+ Maugma an siisay man na nag-uutob kan mga tataramon kan propesiya na nasa rolyong ini.”+

8 Buweno, ako, si Juan, iyo an nakakadangog asin nakakahiling kan mga bagay na iyan. Kan madangog ko asin mahiling an mga iyan, suminubsob ako sa pamitisan kan anghel tanganing sumamba sa anghel na ini na nagpapahiling sa sako kan mga bagay na iyan. 9 Pero sinabi niya sa sako: “Mag-ingat ka! Dai mo iyan paggibuhon! Uripon man sana ako kapareho mo asin kan mga tugang mo na mga propeta asin kan mga nag-uutob kan mga tataramon sa rolyong ini. Sambahon mo an Diyos.”+

10 Sinabi man niya sa sako: “Dai mo pagselyaduhan an mga tataramon kan propesiya na nasa rolyong ini, huli ta an itinalaan na panahon harani na. 11 An siisay man na bakong matanos magpadagos sa mga gibong bakong matanos, asin an siisay man na marigsok* magpadagos sa saiyang karigsukan; pero an saro na matanos magpadagos sa mga gibong matanos, asin an saro na banal magpadagos sa kabanalan.

12 “‘Uya! Madali na akong mag-abot, asin dara ko an balos na sakuyang itatao, tanganing balusan an lambang saro sigun sa saiyang mga gibo.+ 13 Ako an Alpha asin an Omega,*+ an inot asin an huri, an kapinunan asin an katapusan. 14 Maugma an mga naglalaba kan saindang haralabang bado,+ tanganing magkaigwa sinda nin awtoridad na makaduman sa mga kahoy nin buhay+ asin tanganing makaagi sinda sa mga trangkahan+ saka makalaog sa siyudad. 15 Pero sa luwas yaon an mga ayam* asin an mga nagsasagibo nin espiritismo asin an mga imoral* asin an mga paragadan asin an mga parasamba sa idolo saka an gabos na gustong-gusto an kaputikan saka nagpaparaputik.’+

16 “‘Ako, si Jesus, nagsugo kan sakuyang anghel tanganing magpatotoo sa saindo manungod sa mga bagay na ini para sa mga kongregasyon. Ako an gamot asin an gikan ni David+ saka an maliwanag na maagahon na bituon.’”+

17 Asin an espiritu saka an nobya+ padagos na nagsasabi, “Madya!” asin an siisay man na nagdadangog magsabi, “Madya!” asin an siisay man na napapaha magdigdi;+ an siisay man na gusto, kumua siya kan tubig nin buhay na daing bayad.+

18 “Ini an pinapatotoohan ko sa lambang saro na nagdadangog sa mga tataramon kan propesiya na nasa rolyong ini: Kun an siisay man magdagdag sa mga bagay na ini,+ idadagdag nin Diyos sa saiya an mga damat na nakasurat sa rolyong ini;+ 19 asin kun an siisay man maghali nin ano man sa mga tataramon kan rolyo kan propesiyang ini, hahalion nin Diyos an saiyang kahirasan sa mga kahoy nin buhay+ asin sa banal na siyudad,+ mga bagay na nakasurat sa rolyong ini.

20 “An saro na nagpapatotoo manungod sa mga bagay na ini nagsabi, ‘Iyo, madali na akong mag-abot.’”+

“Amen! Mag-abot ka na, Kagurangnan na Jesus.”

21 Lugod na mapasa mga banal an daing kapantay na kabuutan kan Kagurangnan na Jesus.