HAPOT 2
Paano mo manunudan an mga bagay manungod sa Diyos?
“Dai dapat mapasuhay sa saimong nguso an mga tataramon kan librong ini kan Katugunan, asin basahon mo ini sa maluway na boses aldaw asin banggi, tanganing maingat mong mautob an gabos na nakasurat digdi; huli ta sa paaging ini magigi kang mapanggana asin madunong.”
“Padagos sindang nagbasa nin makusog sa libro, sa Katugunan kan tunay na Diyos, na ipinapaliwanag iyan na marhay asin sinasabi nin malinaw an kahulugan kaiyan; kaya natabangan ninda an banwaan na maintindihan an binabasa.”
“Maugma an tawong dai naglalakaw sigun sa sadol kan mga maraot . . . , kundi an ikinakaugma niyang marhay iyo an katugunan ni Jehova, asin an Saiyang katugunan binabasa niya sa maluway na boses, aldaw asin banggi. . . . An gabos na ginigibo niya magigin mapanggana.”
“Duminalagan si Felipe asin sinabayan an karwahe. Nadangog niya an opisyal na binabasa nin makusog an mga isinurat ni Isaias na propeta, tapos sinabi niya: ‘Nasasabutan mo an binabasa mo?’ Sinabi kaini: ‘Paano ko man ini masasabutan kun mayo nin maggiya sa sako?’”
“An saiyang dai nahihiling na mga kuwalidad—an saiyang daing sagkod na kapangyarihan asin pagka-Diyos—malinaw na nahihiling puon pa sa paglalang kan kinaban, dahil namamansayan an mga iyan paagi sa mga bagay na linalang, kaya dai sindang rason na dai maniwala.”
“Hurop-hurupon mo an mga bagay na ini; itao mo diyan an saimong lubos na atensiyon, tanganing an saimong pag-uswag malinaw na mahiling kan gabos na tawo.”
“Isipon ta an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon.”
“Kun an siisay man sa saindo kulang sa kadunungan, padagos siyang maghagad sa Diyos, huling siya bukas-palad na nagtatao sa gabos asin dai nanunuyaw, asin itatao iyan sa saiya.”