Nagagadan daw an Kalag?

AN HAPOT na iyan tibaad suminabong sa isip nin saro na nagbabasa kan magasin na Time kan Hulyo 30, 1990. Sa pagpaliwanag kan nadugangan na trapiko sa tinampo sa Sirangan na Alemania bago magkasaro an duwang Alemania kan Oktubre 3, 1990, ibinareta kan magasin sa artikulo kaiyan na “Speeding Over the Bumps”: “An mga nagadan sa tinampo sa Sirangan luminangkaw nin 60% sa enot na anom na bulan kan 1990, na kuminua nin 1,078 kalag.”

Malinaw na an boot sabihon kan artikulo 1,078 katawo an nagadan sa mga aksidente sa sakayan; nagadan sinda. Alagad nagadan daw an 1,078 kalag? Sala daw an magasin na Time sa paggamit kaiyan kan terminong “kalag” para sa mga tawong may laman asin dugo? Ano man nanggad an kalag?

Sa bilog na kasaysayan, may laen-laen na ideya manongod sa kalag. An dakol na suanoy na tawo nagtubod na an espirituwal na kalag nagpapadagos na mabuhay pagkagadan, na an kagadanan garo pinto pasiring sa ibang buhay. An ibang hade kan suanoy na mga panahon ipinagadan pa ngani an saindang mga oripon kan panahon na sinda magadan sa paniniwala na an kalag kan mga tawong ini puwedeng magpadagos na maglingkod sa sainda.

Minsan ngani dakol ngonyan an nagtutubod man na an kalag nangangahulogan nin espiritung kabtang nin sarong tawo na natatadang buhay pagkagadan kan pisikal na hawak, ini dai itinotokdo kan Biblia. An totoo, sa Bilang 6:6, iyan nagtataram manongod sa “arin man na gadan na kalag.” Dai, an kalag bakong espirituwal na bagay na nasa laog nindo. Kamo an kalag. An kalag puwedeng magadan, arog kan ibinareta kan magasin na Time.

An The Jewish Encyclopedia (1910) nagkomento: “An paniniwala na an kalag nagpapadagos na mabuhay pagkatunaw kan hawak pilosopiko o teolohikong pagkarkulo imbes na simpleng pagtubod, asin kun siring dai maliwanag na itinotokdo sa Banal na Kasuratan.”—Tomo VI, pahina 564.