Sarong Espesyal na Okasyon—Maatender daw Kamo?

BILANG inaaping mga oripon sa Egipto kaidtong labing 3,500 na taon na an nakaagi, an mga Israelita nagkakaipong gayo nin pagliligtas. Alagad ta si Faraon nagsayumang pahaleon an saiyang mga oripon. Kaya pinagbotan ni Jehova Dios an mga Israelita na magbono nin kordero asin iwirik an dugo kaiyan sa mga harigi asin balagbag sa itaas kan pinto sa saindang harong. Kan banggi man sanang idto an Saiyang anghel linihisan (sa Ingles, passed over) an mga harong na may dugo sa pinto pero ginadan an mga panganay sa harong kan gabos na Egipcio. Huli kaiyan pinabayaan na ni Faraon na humale an mga Israelita. Poon kaidto, sa petsang anibersaryo kan paglihis kan anghel sa mga harong na Israelita, sinilebrar nin mga Judio an okasyon na ini.

Dangan si Jesu-Cristo naglataw sa daga. Sarong aldaw si Juan na Bautisador, na nagbautismo ki Jesus, itinokdo sia asin nagsabi: “Uya, an Kordero nin Dios na naghahale kan kasalan kan kinaban!” (Juan 1:29) Kun paanong an dugo kan kordero nin Paskua (sa Ingles, Passover) nangahulogan nin kaligtasan sa mga panganay na Israelita, an pinabolos man na dugo ni Cristo makapagliligtas sa kasalan asin kagadanan.

Pinonan ni Jesus an sarong pagkakan tanganing girumdomon an saiyang sakripisyal na kagadanan. Tinawan nia nin tinapay an saiyang maimbod na mga apostol asin nagsabi: “Kua, kakan kamo. Ini nangangahulogan kan sakong hawak.” Dangan tinawan nia sinda nin sarong kopa nin arak asin nagsabi: “Inom kamo kaiyan, kamo gabos; huli ta ini nangangahulogan kan sakong ‘dugo kan tipan,’ na paboboloson manongod sa dakol para sa kapatawadan nin mga kasalan.” Siring man, si Jesus nagsabi: “Padagos na gibohon nindo ini sa paggirumdom sa sako.” (Mateo 26:​26-28; Lucas 22:​19, 20) Kaya katuyohan ni Jesus na iyan magin taonan na pagselebrar kan saiyang kagadanan.

Mainit kamong iniimbitaran nin mga Saksi ni Jehova na umiba sa sainda sa pagselebrar kan Memorial na ini. Puwede kamong umatender sa Kingdom Hall na pinakaharani sa saindong harong. Ihapot sa lokal na mga Saksi ni Jehova kun ano an eksaktong oras asin lugar. An petsa kan selebrasyon ngonyan na 1992 Biyernes, Abril 17.