Introduksiyon

LIBRO ini nin totoong mga istorya hali sa pinakabantog na libro sa kinaban, an Bibliya. Sa mga istoryang iyan, maaaraman mo an kasaysayan kan kinaban puon kan maglalang an Diyos sagkod sa panahon niyato ngunyan. Sinasabi pa kaiyan an mga ipinangako nin Diyos na gigibuhon niya sa maabot na panahon.

Paagi sa librong ini, magkakaideya ka kun ano an laog kan Bibliya. Iniistorya kaini an manungod sa mga karakter sa Bibliya asin an mga ginibo ninda. Ipinapahiling man kaini an magayunon na paglaom na itinao nin Diyos sa mga tawo, an buhay na daing katapusan sa sarong paraisong daga.

Igwa nin 116 na istorya sa librong ini. Piggrupo iyan sa walong kabtang o parte. Sinasabi sa inot na pahina kan kada kabtang kun ano an laog kan kabtang na iyan. An pagkapresentar kan mga istorya digdi sigun sa pagkasunod-sunod kan mga pangyayari. Kaya, manunudan mo kun kasuarin nangyari an mga iyan sa kasaysayan.

Simpleng mga tataramon an ginamit sa mga istorya. An dakul sa mga aki kayang-kayang basahon ini maski solo lang sinda. Para sa mga magurang, mahihiling nindo na mauugmang marhay an saindong saradit na aki na pauruutro sindang basahan kan mga istoryang ini. An librong ini magugustuhan nanggad nin mga aki pati na nin mga may edad.

May mga teksto sa Bibliya sa katapusan kan kada istorya. Inaagda mi ika na basahon an mga porsiyon na iyan kan Bibliya na pinagbasaran kan mga istorya. Pagkatapos nin kada istorya, simbagon mo man an mga hapot para sa istoryang iyan na nasa mga pahina kasunod kan Istorya 116.