An Inot na Bulalangaw

ARAM mo kun ano an inot na ginibo ni Noe pagluwas ninda kan pamilya niya sa arka? Nagtao siya nin dulot o regalo sa Diyos. Mahihiling mo iyan sa ritrato sa ibaba. Nagdulot si Noe nin mga hayop ’nganing pasalamatan an Diyos sa pagligtas sainda sa dakulang baha.

Ano sa paghuna mo, naugma daw si Jehova sa dulot? Iyo. Kaya nangako siya ki Noe na dai na niya paparaon giraray paagi sa baha an mga nasa ibabaw kan daga.

Nagmara na an daga, kaya pinunan kan pamilya ni Noe an bagong buhay sa luwas kan arka. Binendisyunan sinda nin Diyos asin sinabi sainda: ‘Magkaigwa kamo nin dakul na aki. Panuon nindo nin tawo an bilog na daga.’

Pero pag-abot nin panahon, pag madangog nin mga tawo an manungod sa dakulang baha, ’baad matakot sinda na mauutro idto. Kaya nagtao an Diyos nin tanda na mapagirumdom sainda kan panuga niya na dai na niya liwat papabahaon sa bilog na daga. Aram mo kun anong tanda iyan? Sarong bulalangaw.a

An bulalangaw parating nahihiling sa langit pag minasirang an aldaw pagkatapos mag-uran. Igwa iyan nin dakul na magagayon na kolor. Nakahiling ka na kaiyan? May nahihiling kang bulalangaw sa ritrato?

Sinabi nin Diyos: ‘Nangangako ako na dai na nuarin man pupuhuon an gabos na tawo asin hayop paagi sa baha. Ibinubugtak ko an sakuyang bulalangaw sa mga panganuron. Pag iyan minalataw, mahihiling ko iyan asin gigirumdumon ko an sakuyang pangako.’

Kaya pag nakakahiling ka nin bulalangaw, anong naiisip mo? Iyo, an panuga nin Diyos na dai na niya paparaon liwat paagi sa baha an mga nasa ibabaw kan daga.