Surat Hali sa Namamahalang Grupo
Sa Namumutan Ming mga Tugang:
Sa pinakainot na isyu kan pampublikong edisyon kan An Torrengbantayan na Enero-Marso 2008, iinintrodusir sa sato an bagong magayon na serye nin mga artikulo na may temang ‘Arugon an Saindang Pagtubod.’ Puon kaidto, may ipinupublikar na bagong artikulo para sa seryeng iyan kada tulong bulan, na ikinakaugma ta nanggad!
Ano an reaksiyon kan mga nakabasa kaiyan? Pakabasa kan artikulo dapit ki Marta, sarong babayi an nagsurat: “Napangisi ako pakabasa ko kaiyan ta magkapareho nanggad kami—gusto pirming mag-istimar nin mga bisita asin magparasibot, kaya kun minsan nalilingawan ko nang kaipuhan man na magpundo nguna tanganing makaasosyar an mga katuod.” Ini an interesanteng sinabi nin sarong tin-edyer na babayi sa istorya dapit ki Ester: “Nasasabutan ko na tibaad kun minsan puro na sana bado asin bagong uso an iniisip ta. Maninigo na marahay an pagbado ta; pero, dai kita dapat sumobra.” Nagsabi pa siya: “An pighihiling ni Jehova an panglaog na pagkatawo ta.” Asin ini an entusiyastikong reaksiyon nin sarong sister sa artikulo manungod ki apostol Pedro: “Tutok na tutok ako sa pigbabasa kong istorya. Garo na man sana ako yaon duman! Pigmamati ko an ipinaparisa kan mga salaysay.”
An mga nagbasang ini—asin an dakul pang nagsurat para magpahayag nin apresasyon sa serye—nagpapatunay sa haloy nang isinurat ni apostol Pablo: ‘An gabos na isinurat kaidto, isinurat sa pagtukdo sato.’ (Roma 15:4) Iyo, iiniba ni Jehova sa Bibliya an mga istoryang ini tanganing tukduan kita nin mahahalagang leksiyon. Kita gabos puwedeng makanuod sa sainda, gurano man kahaloy ta nang aram an katotoohan.
Maugma mi ikang dinadagka na basahon tulos an librong ini. Gamiton iyan sa saindong Pampamilyang Pagsamba—magugustuhan nanggad iyan kan mga aki! Kun gamiton na an librong ini sa Pag-adal sa Bibliya kan Kongregasyon, umatender kada semana! Dai maghidali; basahon iyan na may paghurop-hurop. Gamiton an imahinasyon mo; mation an namamatian kan mga karakter sa Bibliya, hilingon an nahihiling ninda, asin dangugon an nadadangog ninda. Ikumparar an nagin reaksiyon ninda sa sarong sitwasyon sa posibleng magigin reaksiyon mo kun ika an yaon duman.
Ugmahon kaming marhay na itao sa saimo an publikasyon na ini. Magin lugod bendisyon ini sa saimo asin sa pamilya nindo. Nagpapaabot nin dakulang pagkamuot asin pangungumusta,
Namamahalang Grupo kan Mga Saksi ni Jehova