An Kapahayagan na Itinao ki Juan

Kan nakapreso si apostol Juan sa isla nin Patmos, may ipinahiling saiya si Jesus na 16 na sunod-sunod na mga bisyon, o garo mga pasali, na manungod sa mga mangyayari sa maabot na panahon. Ipinapahiling diyan an pagpakangbanal sa pangaran ni Jehova, an pag-abot kan saiyang Kahadian, asin kun paano mangyayari an saiyang kabutan digdi sa daga arog kan sa langit.

Sa sarong bisyon, nahiling ni Juan si Jehova na nakatukaw sa saiyang mamuraway na trono sa langit. Napapalibutan siya nin 24 kamagurangan na nakasulot nin puting mga bado asin may mga koronang bulawan sa payo. May mga silyab nin kikilat hali sa trono asin mga tanog nin daguldol. An 24 kamagurangan minasubsob sa atubangan ni Jehova para sambahon siya. Sa saro pang bisyon, nakahiling si Juan nin sarong dakulang kadaklan nin mga tawong hali sa gabos na nasyon, banwaan, saka lengguwahe na nagsasamba ki Jehova. Papasturan sinda kan Kordero, si Jesus, asin gigiyahan pasiring sa mga burabod kan tubig nin buhay. Dai nahaloy, sa saro pang bisyon, nagpuon nang mamahala si Jesus bilang Hadi sa langit, kaiba an 24 kamagurangan. Sa suminunod na bisyon, nahiling ni Juan si Jesus na nakikipaglaban sa dragon, si Satanas, asin sa mga demonyo kaini. Pinalayas sinda ni Jesus sa langit asin ihinulog digdi sa daga.

Tapos sa sarong magayon na bisyon, nahiling ni Juan an Kordero asin an 144,000 na nakatindog sa Bukid nin Sion. Nakahiling man siya nin anghel na naglalayog palibot sa daga, na sinasabihan an mga tawo na matakot sa Diyos asin pamurawayon Siya.

Sa suminunod na bisyon, nagraralaban na sa giyera nin Armagedon. Sa giyerang iyan, dinaog ni Jesus asin kan saiyang hukbo an maraot na sistema ni Satanas. Sa huring bisyon, nahiling ni Juan na may lubos na pagkauruyon sa langit asin sa daga. Biyo nang pinara si Satanas asin an mga gikan niya, an gabos na nagsuportar saiya. An gabos na nasa langit asin nasa daga pinapakangbanal an pangaran ni Jehova asin siya sana an sinasamba.