Introduksiyon sa Seksiyon 14

Ipinaabot kan inot na mga Kristiyano an maugmang bareta kan Kahadian sagkod sa pinakahararayong lugar. Giniyahan sinda ni Jesus kun sain mahulit asin paagi sa milagro, tinawan nin kakayahan na magtaram nin ibang mga lengguwahe para matukduan an mga tawo na nagtataram kan mga lengguwaheng iyan. Tinabangan sinda ni Jehova na magin makusog an buot asin makayanan an grabeng persekusyon.

Paagi sa bisyon, ipinahiling ni Jesus ki apostol Juan an kamurawayan ni Jehova. Nahiling ni Juan an Kahadian kan kalangitan na dinaog si Satanas saka tinapos an marauton na impluwensiya kaini. Nahiling niya si Jesus na namamahala bilang Hadi asin an 144,000 na kairiba kaining tagapamahala. Nahiling man niyang nagin paraiso an bilog na daga, na diyan an gabos nagsasamba ki Jehova na may katuninungan asin pagkasararo.