An Ihinahapot nin mga Tawo Manongod sa Alkohol

“AN MGA madonong dai nanggad nag-iinom nin arak.” Iyan an ipinahayag nin sarong klerigong taga-Nigeria. Kaidtong dai pa nahahaloy, an siring na kapahayagan sasabihon na dai nagtatao nin libertad sa iba asin hayakpit an isip. Pero ngonyan naglalakop an opinyon kontra sa alkohol sa nagkapirang parte kan kinaban.

Halimbawa, an bago pa sanang surbey kan Reader’s Digest/Gallup (E.U.) nagpaheling na “an mga Amerikano nagpoon nang inaan an iniinom.” An magasin na Time nagbabareta man na “an Amerika nagluluya [sa nakukunsumong arak], asin ginigibo iyan nin mas marikas kisa kasuarin man poon kan magkaepekto an Pagprohibir kan 1920.” An Pransia nagbareta man nin pag-ina sa nakukunsumong arak.

An dahelan sa tendensiang ini pasiring sa pagpopogol? An nagkapira nagprotesta sa grabeng garadanan sa mga tinampong pampubliko huli sa burat na mga drayber. “Kan 1983,” sabi kan Reader’s Digest, “an alkohol . . . ginastuhan kan [Estados Unidos] nin $89.5 bilyones sa nawarang trabaho asin produkto, pag-ataman sa salud, napierdeng mga rogaring asin krimen, saka sa dai masokol na danyos sa buhay pampamilya kan mga napalabot.” Kaya bakong makangangalas na an World Health Organization kan NU kasuarin pa sana nagrekomendar na an mga gobyerno ‘limitaran an suplay nin alkohol para sa salud asin ikararahay kan saindang populasyon.’—New Nigerian, Marso 16, 1983.

An iba ngani nangangatanosan apabor sa biyong paglikay. An kinotar sa itaas na klerigong taga-Nigeria nagsasabi: “An Talinhaga 20:1 espisipikong nagsasabi na an mga nag-iinom nin arak bakong madonong.” Asin an sabi pa nin sarong predikador: “An Banal na Kasuratan kinokondenar an alkohol sa Libro ni Isaias,” na an boot sabihon an teksto sa Isaias 5:11, 12, asin 22.

Huli sa siring na mga tataramon, iniisip nin mga tawo: Ano an boot sabihon kan mga tekstong iyan sa Kasuratan? An Biblia daw talagang lubos na ipinangangalad an pag-inom nin mga inomon na de alkohol? Bako daw na si Jesus mismo nag-inom nin arak, o an ininom daw tagok nin ubas na daing alkohol? Huli sa napapalabot na risang mga peligro, posible daw na pinakamarahay para sa mga Kristiano na lumikay sa pag-inom nin alkohol? An simbag sa mga hapot na ini makukua paagi sa pagsiyasat sa Biblia mismo.