Relihiyosong mga Imahen—Ano an Punto-de-Vista Nindo Dian?
KAN 1888 nagkaigwa nin grabeng pagbaha sa Canton, China. An daing pondong oran nakadistroso sa mga pananom. An mga paraoma desesperadong namibi sa saindang dios na si Lung-wong na papondohon an oran, alagad ta daing nangyari. Naanggot sa pagkaindiperente kan saindang dios, prineso ninda an saiyang imahen sa laog nin limang aldaw! Mga pirang taon bago kaini, an dios man sanang iyan dai inintindi an saindang mga pamibi na papondohon an dai pag-oran. Ikinadena ninda an saiyang imahen sa luwas sa nakapapasong init.
Kan 1893 dai nag-oran sa Sicily. An relihiyosong mga prosisyon, mga kandilang sinuluan sa mga simbahan, asin mga pamibi sa mga imahen gabos dai nakatao nin oran. Nawaran na nin pasensia, hinubaan kan mga paraoma an ibang imahen, pinatalikod an iba, asin linunod pa ngani an iba sa mga raraan nin kabayo! Sa Licata si “San” Angelo hinubaan, ikinadena, pinagmuda asin inumang bitayon. Sa Palermo, Italia, Si “San” Jose iinapon sa alang na hardin tanganing maghalat nin oran.
An mga pangyayaring ini na isinaysay sa librong The Golden Bough, ni Sir James George Frazer, may nakariribok na mga kahulogan. Iyan nagpaparisa na an naghihingakong mga Kristiano asin bakong Kristiano garo pareho an punto-de vista sa relihiyosong mga imahen. Sa parehong kaso, ginamit kan mga parasamba an saindang mga imahen bilang paaging makikomunikar sa sarong “santo” o dios. Asin interesante nanggad pareho sinda naghingoa na pahiroon an saindang atrasadong mga “santo” o dios paagi sa pagbugtak sa sainda sa masakit na mga kamugtakan na inaagihan kan saindang mga parasamba!
Alagad ngonyan, an dakol na naggagamit nin relihiyosong mga imahen ibibilang an siring na mga gibo na sobra man, tibaad makangingisi pa. Mangangatanosan sinda na para sa sainda an mga imahen mga bagay sanang iginagalang—bakong sinasamba. Tibaad sabihon pa ngani ninda na an mga estatuwa, krus, asin relihiyosong mga ipininta lehitimong mga pantabang sa pagsamba sa Dios. Tibaad iyan man an saboot nindo. Alagad an hapot: Ano an saboot nin Dios manongod kaini? Posible daw na an odok na paggalang sa sarong imahen sa katotoohan pagsamba dian? Posible daw na an mga gibong siring sa katunayan nagtatao nin natatagong mga peligro?