“An Publikasyon kan mga Saksi ni Jehova Angay na Basahon”

Ini an titulo kan sarong artikulo na naglataw kan Disyembre 23, 1988, sa Creston News Advertiser, kan Iowa, E.U.A. “Interesado ako sa pilosopiya asin relihiyon,” an komento kan parasurat na si Randy Porter, “alagad an mga publikasyon igwa man nin medyo sekular na mga estorya manongod sa makangangalas na manlaenlaen na isyu sa kinaban. . .

“Dugang pa, an nagkapira tibaad magngalas na maaraman na an mga magasin parateng nagkokotar sa ibang may autoridad na mga pinaghalean, apuwera sa Biblia. . .

“Sa dai tinutuyo, an Enero [22] na edisyon nagtatampok man nin halipot na estorya asin de-kolor na retrato kan gapo kan estado kan Iowa, an geode. An artikulo nagsasabi na an mga tawo siring kan mga geode. Imbes na ordinaryo sanang paghelingon sa luwas, kun nabuksan an mga geode nagpapaheling nin nakasusuriaw, kristal na panlaog na kagayonan. An tawo man, puwedeng magin ordinaryo sa luwas, asin daing girong asin masosopgon pa ngani; alagad, kun an tawo magkaigwa nin ’panahon na makamidbidan, nabubuksan sinda asin nagpapaheling saindo kan nagkikinang na panlaog na kagayonan.’. . .

“An isyu kan Enero [22] igwa nin dakol pang ibang artikulo na posibleng dai pa man nakaabot sa sakong lamesa! Bilang halimbawa, an kadaklan na tawo dai pa nakadangog manongod kan nakagagadan na mga alimbubuyog sa Aprika, alagad sarong artikulo an nagsabi kun paanong ’pinutakti’ kan mga siyentipiko sa mga insekto an mga alimbubuyog. Dinesenyo kan mga Amerikanong enhinyero, an microprocessor na kagamitan na igo sana an kasaditan tanganing ikabit sa likod kan alimbubuyog na magpapagin posible sa mga siyentipiko na mabantayan an mga paghiro kan alimbubuyog hale sa saro sagkod sa duwang kilometro.”

An Awake! igwa nin mga kabaretaan kaini sa dakol na nasyon sa palibot kan daga asin kun siring igwa nin paghahalean nin mga bareta na dai maabot nin dakol. Namamatean niamo na puwede kamong makinabang asin magayagayahan sa kawiliwiling mga artikulo kan Awake! Igwa ini nin promedyong imprinta na 11,250,000 kopya kada isyu asin ipinupublikar sa 54 lenguahe.

Tabi ipadara an sarong taon na suskripsion para sa Awake! Ilinakip ko an P60.00 para sa 24 isyu kan magasin na ini (2 kopya kada bulan).