An Pagkasadiosan Iyo an Pinakamarahay na Prinsipyo sa Buhay
AN PAGKASADIOSAN inoomaw nanggad sa Biblia asin kahagadan para sa tunay na mga Kristiano. (Mateo 22:39; 2 Corinto 8:21) Saro pa, an pagkasadiosan talagang iyo an pinakamarahay na prinsipyo sa buhay, arog kan maheheling sa buhay nin dakol ngonyan na an isip asin puso binago kan tamang kaaraman sa Biblia. An sarong halimbawa kaini hale sa Liberia.
Pakatapos nin dakol na mapagngayongayong paghorophorop, sinirrahan nin sarong Kristianong magurang sa kongregasyon asin kan saiyang agom an saindang sastreriya. Taano? Huli ta inuubos kaiyan an dakol nindang panahon asin inoolang an saindang mga gibohon sa ministeryo asin personal na pag-adal. Nagkaoyon sinda na makontento na sa kadikit na nakukua sa pagpabakal nin tugma sa tela. Alagad ta pakagiboha tolos ninda kaini, buminaba an presyo nin tugma sa lokal. Ngonyan dai na masusustentohan an pamilya kan saindang nakukua. Ano an gigibohon ninda?
Ipinakiolay ninda sa kompaniyang nagsusuplay kan tugma na babaan an saindang presyo, sa siring minatogot sa mas marahay na ganansia. Sinayumahan ini. Pero, an kompaniya nag-opresir na magpadara nin duwang lista nin mga binakalan asin presyo, an saro yaon an aktuwal na presyo asin an saro may mas hababang presyo na ikapaheheling ninda sa Adwana tanganing mas hababa an bayadan na buhis. Ini matogot sa magurang na magkaigwa nin $2,000 na ilegal na ganansia sa kada alsada.
An tugang nagsayuma na makikabtang sa bagay na bakong sadiosan asin mandadaya sa gobyerno. Napangalas an mga opisyales kan kompaniya. Sinda nagsurat: “Iginagalang mi an saimong konsensia,” asin ninombrahan ninda an magurang bilang solamenteng ahente kan saindang produkto sa Liberia. Ngonyan na bastante na an sustento sa materyal na mga pangangaipo kan pamilya, an magurang asin an saiyang agom nakapag-auxiliary payunir, na dayupot na nakikiiba sa mga tugang sa pagpakosog sa kongregasyon. Tunay nanggad, an saindang pagkasadiosan nagin bendisyon para sa sainda.
Si Alfonso, na taga-España, nakaisi man na an pagkasadiosan iyo an pinakamarahay na prinsipyo sa buhay. An aking ini naghale sa saindang harong sa edad na 12, asin dai nahaloy sia nagtitinda na nin droga, saka nanhahabon sa mga kotse, harong, asin tindahan. Kun beses sagkod sa sampulong tindahan an hinahabonan nia sa sarong aldaw. Pag-edad nin 21, an apat sa saiyang kairiba binugbug sia nin grabe, hinabon an gabos niang droga, asin inuma siang gadanon kun isusumbong nia sinda sa pulis. Mantang midbid sia kan mga pulis, natakot ngani siang lumaog sa ospital tanganing magpabolong.
Mantang luway-luway na naoomayan an saiyang mga lugad, hinorophorop nin odok ni Alfonso an saiyang pamumuhay. Nagirumdoman nia an mga bagay manongod sa Biblia asin Kristianong mga prinsipyo na sinabi sa saiya kan saiyang ina kan sia aki pa. Kaidto, nagbinongog sia sa mga tataramon kan saiyang ina, pero ngonyan naghagad sia nin pag-adal sa Biblia kaiba nin mga Saksi ni Jehova. Sa laog nin anom na bulan biyo na niang nabakle an saiyang gawe asin personalidad asin nakuwalipikar na bautismohan.
Minsan siring, kan aldaw bago sia magpabautismo, nakaresibi sia nin sitasyon na umatubang sa husgado sa demandang armadong paghabon. Idto krimen na nahaloyhaloy na niang naginibo kaidto. Minsan siring, si Alfonso hayag na itinuga an kasalan asin nabilanggo na naghahalat na bistahon. Sinadol sia kan saiyang abogado na magsabi na mayo sia nin hinabon asin na mayo siang darang badil. Alagad ta si Alfonso nag-insistir na magsabi kan katotoohan. Huli sa kasalan asin sa maraot niang rekord sa pulis, an piskal naghagad nin sentensiang 13 taon. Alagad huli sa saiyang marahay na ugale asin pagkasadiosan, tinawan sia nin anom na bulan, na napagserbihan na nia mantang naghahalat na bistahon.
Ngonyan si Alfonso asin an saiyang agom maimbod na naglilingkod ki Jehova, na naoogma na sinda nakanompong nin tunay na katuyohan sa buhay asin napatunayan sa sadiri nindang eksperyensia na an pagkasadiosan iyo an pinakamarahay na prinsipyo sa buhay.