An Sarong Bagong Kinaban Harani Na!

KADAKOL kan mga suhestion sa pagresolber sa mga problema kan kinaban. Sa kagabsan, an mga iyan naghahagad nin pagmalasakit asin kooperasyon, saka nin dakulaon na koordinadong paghihingoa nin gabos na nasyon sa bilog na kinaban. May pagmate na mantang naggagrabe an mga situwasyon, an pangangaipo nin pararehong pagkapreserbar makapipirit sa mga nasyon na tirutimbangon liwat an mga ipinaoorog ninda asin magtarabangan tanganing makagibo nin bago asin masususteniran na kinaban. Linalaoman na an mga presupuwesto militar iinaan na gayo tanganing gamiton an kuwarta sa pagresolber sa mga peligro sa palibot asin na, arog kan sinabi sa State of the World 1990, “imbes na papagdanayon an sadiri nindang darakulang establisimiento sa depensa, an mga gobyerno tibaad magsarig sa pinadakulang gayo asin pinakosog na puwersang nagpapatoninong kan N.U., saro na may kapangyarihan asin autoridad na idipensa an arin man na miembrong nasyon tumang sa sarong nananalakay.”

Alagad an siring na mga plano kulang na marhay tanganing papangyarihon an mga kamugtakan na hinihimuyawot na nalilista sa enot niatong mga pahina. An mga estratehiya nin tawo dai nanggad makaoomay sa pagkamakasalan asin kahanaban nin tawo; dai kaiyan hinahale an daing binabasaran na pagkaanggot asin iriwal etniko; dai iyan nakapupukaw sa daing kapasloan na pagkamoot sa tahaw nin gabos na tawo; ni nakagagarantiya man iyan nin pagkatapos nin helang asin kagadanan. An krimen dai nareresolberan nin epektibo, ni may nasasambitan man na paghale sa relihiyosong mga pagkalaenlaen asin pagkaongis. Asin dai man lamang ngani maiisip an paghale sa natural na mga kalamidad. An nasyonalismo, na may potensial na ponan nin problema, totogotan na magdanay. Makamomondo, kun siring, napipiritan kitang isipon na an mga tawo nasudya na makatao nin epektibong solusyon.

Pero, may solusyon! An totoo, an gabos na hinihimuyawot na ini nin mga tawo ipinanuga, asin an panuga gikan sa Dios “na dai makakapagputik.” (Tito 1:2) Aram nia nin eksakto kun ano an kaipuhan na gibohon, asin sia igwa kan kadonongan, kan kapangyarihan, asin kan abilidad na gibohon an saiyang katuyohan.—Kapahayagan 7:12; 19:1.

An Dios nanunuga: “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”—Salmo 37:10, 11.

Paano daw ini magigibo? An Isaias 11:9 minasimbag: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano kan kaaraman dapit ki Jehova kun paanong an tubig nakakatahob sa mismong kadagatan.” Iyo, an gabos na tawo totokdoan sa “kaaraman dapit ki Jehova,” asin an siisay man na habong kumuyog dian dai totogotan na magdanay asin ribokon an katoninongan nin iba. Dai na raraoton an satong magayon na daga.

“Helinga nindo an mga ginigibo ni Jehova . . . Pinaoontok nia an mga ralaban sagkod sa kaporoporohi kan daga,” an panuga kan Salmo 46:8, 9. (Helingon man an Miqueas 4:3, 4.) An sarong mahalagang bagay sa pagkaigwa nin panglobong katoninongan iyo an pagtapos sa nasyonalistikong mga pagkalaenlaen. Garantisado an kooperasyon, ta sasaro na sana an gobyerno sa bilog na kinaban—an sa Dios. Asin an saiyang gobyerno sarong Kahadean “na dai noarin man malalaglag.” (Daniel 2:44) Saro pa, an Hade dian iyo an binuhay liwat, inmortal na si Jesu-Cristo, na an paghade paagi sa hustisya asin katanosan.—Isaias 9:6, 7; 32:1.

Alagad ini daw mararaot nin natural na pagkabakong sangkap nin tawo asin madadanyaran nin nagpapadagos na kolog, helang, kamondoan, asin kagadanan? Dai, ta an mga ini makalilihis na. Sinisierto sato kan Kapahayagan 21:4: “Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” An minanang kasalan patatawadon basado sa pantubos na atang ni Jesus, asin an katawohan ibabalik sa pagkasangkap. (Roma 6:23; Efeso 1:7) Asin siisay pa an mas makakokontrol sa natural na mga puwersa asin makapopogol dian sa pagtao nin peligro sa katawohan kisa Kaglalang sa mga iyan?—Salmo 148:5-8; Isaias 30:30.

An mga bagay na malalaoman asin mapapangarap sana nin tawo, itatao nin Dios. Alagad noarin? Ipinaririsa kan hula sa Biblia na an mga pagkaliwat maabot sa panahon na an mga nasyon “nagkaaranggot” asin an tawo “naglalaglag kan daga.” (Kapahayagan 11:18) An huring mga aldaw kan daan na kinaban tatandaan nin “delikadong mga panahon na masakit pakibagayan”—na an resulta naggagrabeng mga kamugtakan na naheheling niato mismo ngonyan. (2 Timoteo 3:1-5, 13) Asin ihinula ni Jesus na an kapag-arakian na nakaheheling kan siring na mga bagay iyo an kapag-arakian na makakaheling sa kaotoban kan mga panuga nin Dios.—Mateo 24:3-14, 32-34.

Tawan nin panahon an pagsiyasat sa mga panugang ini na nasusurat sa Biblia. Huli ta sa puntong ini, kapwa an may pakaaram na mga tawo asin an Dios minaoyon: Ngonyan na an panahon para sa sarong bagong kinaban!