An Inani nin Sarong Tunay na Paraebanghelyo

SI William R. Brown enot na nagduman sa Aprika kan 1923. Kaiba an saiyang agom asin aki, sia ‘naggibo kan gibohon nin sarong paraebanghelyo’ sa Gambia, Ghana, Liberia, Nigeria, asin Sierra Leone. (2 Timoteo 4:5) Pambihira nanggad an bunga kan saiyang ginibo.

An tubong taga-West Indies na ini bakong miembro kan saro sa mga iglesya nin Kakristianohan asin dai nanggad nakilabot sa politika. Imbes, inarog nia si Jesus asin an mga apostol paagi sa pagbalangibog kan ngaran asin soberaniya ni Jehova, na idinodoon an halaga kan pantubos, asin ihinuhulit an maogmang bareta kan Kahadean. (Mateo 9:35; 20:28; Juan 17:​4-6) Perming ginagamit ni William R. Brown an Biblia, na itinotokdo iyan bilang ultimong autoridad kun dapit sa doktrina asin pagtubod. (2 Timoteo 3:16) Nag-iinsister siang marhay digdi kaya inapod siang si Bibliang Brown.

Sa bendisyon ni Jehova, an mga banhing isinabwag ni Bibliang Brown tuminubo asin nagtalubo. Ngonyan, sa mga nasyon na pinangenotan nia, haros 200,000 na Aprikano na an nagdusay kan saindang buhay sa saindang Kaglalang asin naghuhulit man kan maogmang bareta kan Kahadean sa iba. (Mateo 24:14; 1 Corinto 3:​6-9) An aktibong mga Kristianong ini midbid nin dakol para sa saindang pagkasadiosan asin pagkamasasarigan. Ipinag-oorgolyo ninda na magin mga Saksi ni Jehova asin sakop ni Cristo, an natutukaw nang Hade.

An siring na ani bunga nin tunay na Kristianong pag-ebanghelyo. May siring man na inaani sa bilog na kinaban sa lambang kontinenteng may tawo. Sa labing 200 na kadagaan, labing apat na milyon na mahoyo an pusong mga lalaki asin babae an “inani” asin inootro man sa iba an mga tataramon kan anghel na nag-eebanghelyo: “Matakot sa Dios asin pamurawayon sia, huli ta nag-abot na an oras kan saiyang paghokom.” (Kapahayagan 14:7) An totoo, an solamenteng paagi na makanompong nin paglaom sa satong maribok na panahon iyo an pagdolok sa Dios asin pagpasakop sa pamamahala kan saiyang Kahadean.