“Mga Liryo sa Oma”

KADAIHAN nin trabaho. Naglalangkaw na mga presyo. Pagtios. Depresyon ekonomiko. An mga terminong ini nag-oorog na nagigin parate sa mga bareta. Asin ipinaririsa kaiyan an mga kasakitan na inaatubang nin minilyon sa saindang paghihingoang pakakanon asin gubingan an saindang mga pamilya saka may maistaran.

Apektado pareho an mga may pagtubod asin daing pagtubod. Alagad an mga may pagtubod dai nagsosolo sa pag-atubang sa mga problemang iyan. Si Jesus, sa pagtaram sa dukhang mga tawo kan enot na siglo, nagsabi: “Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinakakakan sinda kan saindong langitnon na Ama. Bako daw na kamo orog na mahalaga kisa sainda?”​—Mateo 6:26.

Sinabi man ni Jesus: “Makanood kamo nin leksion sa mga liryo sa oma, kun paano iyan nagtutubo; dai iyan nagpapagal, ni naghahabol; alagad ako nagsasabi saindo na minsan si Salomon sa bilog niang kamurawayan dai nagubingan nin siring sa saro kaini. Ngonyan, kun ginugubingan nin Dios nin siring an mga doot sa oma, . . . kamo pa daw an dai nia paggubingan?”​—Mateo 6:​28-30.

Ini daw nangangahulogan na an Kristiano dai na kaipuhan na maghanapbuhay? Dai man! An Kristiano nagtatrabaho nin mahigos siring sa kaipuhan tanganing mabayadan an saiyang mga obligasyon. Si apostol Pablo nagsabi: “Kun an siisay man habong magpagal, dai man sia pagpakakanon.” (2 Tesalonica 3:10) Minsan siring, namamatean kan Kristiano an mamomoton na pangataman nin Dios asin may pagtubod sia na sia binabantayan kan saiyang langitnon na Ama. Kun siring, dai sia napupukan kan mga kahaditan sa buhay. Minsan sa masakit na mga panahon, inienot nia an pangenot na mga bagay​—espirituwal na mga bagay. Nagtutubod sia sa mga tataramon ni Jesus: “Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:33.