Gayon na Dai Nawawara

“AN GAYON nawawara; an gayon minaagi sana,” an komento kan parasurat nin berso na si Walter De la Mare. Tunay na ini an nangyayari sa magayonon na mga burak nin kaktus na ipinaheheling digdi. Madaling nawawara an gayon kaiyan.

An Kristianong disipulong si Santiago nagsurat: “Siring kan burak nin doot sia [an mayaman] maagi sana. Huli ta an aldaw minasirang na dara an nakakatotong na init kaiyan asin pinaluluyos an tinanom, asin an burak kaiyan nararakdag asin nawawara an kagayonan kan panluwas na itsura kaiyan. Siring man, an mayaman mapapara sa saiyang mga dalan nin pamumuhay.”​—Santiago 1:​10, 11.

Sa kinaban na ini na daing kasegurohan, tunay na puwedeng mawara nin bigla an kayamanan. Saro pa, an mayaman​—kapareho nin gabos—​‘halipot an buhay, siring sa sarong burak.’ (Job 14:​1, 2) Isinaysay ni Jesus an parabola nin sarong tawo na nasibot sa pagtipon nin kayamanan tangani na sia makatukaw asin magpasiramsiram sa buhay. Alagad ta kan sa paghona nia yaon na sa saiya an gabos na kaipuhan sa buhay nin kasingawan, sia nagadan. Si Jesus nagpatanid: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.”​—Lucas 12:​16-21.

“Mayaman sa Dios.” Ano an boot sabihon dian ni Jesus? An tawong mayaman sa paaging ini may “mga kayamanan sa langit”​—marahay na ngaran sa Dios. An siring na kayamanan dai kaipuhan na mawara noarin man. (Mateo 6:​20; Hebreo 6:10) Imbes na magin siring sa burak na naluluyos, an siring na tawo ibinabaing kan Biblia sa sarong kahoy, na an mga dahon dai naluluyos. Asin, iginagarantiya sa sato, “an gabos niang ginigibo mapakakarhay.”​—Salmo 1:​1-3, 6.