Nakasolo Na daw Kamo nin Sarong Kadlagan?
SIYEMPRE DAI, sabi nindo. Pero halat! Tibaad nakasolo na kamo. Hinanyoga an mga tataramon kan disipulong si Santiago: “An dila sarong sadit na kabtang alagad nananagsag nin darakulang bagay. Uya! Saditon sanang kalayo an kaipuhan tanganing masolo an mahiwason na kadlagan!”—Santiago 3:5.
An dila sarong mahalagang organo nin pagtaram, alagad inabuso na nanggad iyan! Ginagamit nin mga tawo an dila tanganing magputik asin magbalobagi. Paagi kaiyan maringis nindang tinatatsaran an iba, rinaraot an saindang reputasyon, asin dinadaya sinda. An mga parasutsut ginagamit an dila sa pagpukaw nin rebolusyon. Ginamit ni Adolf Hitler an saiyang dila tanganing tiponon an nasyon para sa guerra—tunay na sarong ‘solo sa kadlagan’!
Dawa an mga igwa nin marahay na mga motibo puwedeng magcausa nin sadit na ‘mga solo sa kadlagan.’ Nakataram na daw kamo nin sarong bagay dangan tolos binoot nindo na dai kutana iyan sinabi? Kun iyo, nasasabotan nindo an boot sabihon ni Santiago kan sia magsabing: “An dila, mayo ni saro sa katawohan na nakamamanso kaiyan.”—Santiago 3:8.
Minsan siring, puwede niatong pagmaigotan na gamiton an satong dila sa marahay. Arog kan salmista, determinado niatong masasabi: “Iingatan ko an sakong mga dalan tanganing dai ako magkasala sa sakong dila.” (Salmo 39:1) Imbes na maringis na tatsaran an iba, puwede niatong pagmaigotan na pakosogon sinda. Imbes na pakaraoton an mga tawo, puwede kitang magtaram nin marahay manongod sa sainda. Imbes na mandaya asin manlansi, puwede kitang magtaram kan katotoohan asin magtokdo. Kun pinahihiro nin marahay na puso, an dila makakataram nin magagayon na tataramon nin pagbolong. Ginamit ni Jesus an saiyang dila sa makangalasngalas na paagi tanganing tokdoan an katawohan dapit sa kaligtasan.
Tunay nanggad, “an kagadanan asin buhay nasa kapangyarihan kan dila.” (Talinhaga 18:21) An saindo daw na dila nakakagadan o nagtatao nin buhay? Iyan daw nagpopoon nin ‘mga solo sa kadlagan’ o pinaparong iyan kaiyan? An salmista namibi sa Dios: “An sakuya logod na dila mag-awit kan saimong mga tataramon, huli ta gabos mong togon matanos.” (Salmo 119:172) Kun kinukultibar niato an kaisipan kan salmista, gagamiton man niato an satong dila sa marahay.
[Picture Credit Line sa pahina 32]
Retrato hale sa U.S. Forest Service