Siring sa Kahoy

“AN MGA berso gibo nin mga tonto na arog ko, pero an kahoy Dios sana an makakagibo.” Sa pag-omaw sa dakol na karahayan nin mga kahoy, an poeta na si Joyce Kilmer itinao sa Dios sa siring na paagi an kredito para sa pagkalalang sa sainda.

Ginibo ni Jehova Dios an mga kahoy na may kadakol na pagkalaenlaen, kagayonan, asin mapaggagamitan. Saradit saka darakulaon, magayonon nanggad sinda na depisil sindang ikaladawan. Dugang pa, an mga kahoy nagtatao nin kakanon, panggatong, asin istaran. Asin an mga paradisenyo padagos na nakakaisip nin bagong mga mapaggagamitan sa kahoy.

Sa Biblia, an mga kahoy kun beses ginagamit sa piguratibong paagi na magrepresentar sa mga kahadean, hade, asin indibiduwal. (Ezequiel 31:​1-18; Daniel 4:​10-26) Nasasambitan an mga kahoy may koneksion sa magayagaya, matoninong, asin mabungang mga kamugtakan na ibinubunga kan paghade ni Jehova asin kan pagbabalik kan saiyang banwaan. (1 Cronica 16:​33; Isaias 55:​12; Ezequiel 34:​27; 36:30) Ipinanunuga man kan Kasuratan na an mga aldaw kan banwaan nin Dios magigin arog kan sa kahoy. (Isaias 65:22) May dakulang kahulogan ini kun hinohorophorop niato na an ibang kahoy nabubuhay sa laog nin mga siglo.

An sarong salmista sa Biblia nagsabi na an tawo na naoogma sa pagboot ni Jehova “magigin siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapakakarhay.” An marambong na kahoy na itinanom sa matubig na lugar nagpagirumdom sa salmista kan espirituwal na prosperidad na nakakamtan nin saro na an “kaogmahan yaon sa ley ni Jehova.” (Salmo 1:​1-3) Kun kamo tunay na naoogma sa pagboot asin Banal na Tataramon nin Dios, an saindong mga aldaw puwedeng magin siring kan sa kahoy. An totoo, paagi sa paghiro kaoyon sa tamang kaaraman dapit ki Jehova Dios asin ki Jesu-Cristo, puwede kamong magkaigwa kan paglaom sa buhay na daing katapusan.​—Juan 17:3.