An Sakong Kaanggotan o an Sakong Salud?
SIISAY an dai naaanggot? Nangyayari iyan sa sato gabos. Kun beses an kadikit na kaanggotan tibaad makatanosan. Alagad, sadiosan sana, bako daw totoo na sa parate an satong kaanggotan (o an kosog kaiyan) bakong makatanosan?
An Biblia sinasabihan kita: “Pabayaan an kaanggotan asin rumayo sa kabangisan; dai ka magpaheling nin kaanggotan tangani sanang makagibo nin maraot.” (Salmo 37:8) Gurano kadonong an siring na hatol? Makakaapektar daw iyan sa saindong haloy na salud?
Sa kabtang kaining “Health,” an The New York Times nagsabi:
“An mga tawo na parateng minaputok sa kabangisan o nag-aaraso sa pagkaanggot sa kada ipinamumugtak na pakakolog puwedeng bako sanang ginigibo an saindang sadiri na makauuyam. Puwedeng ginagadan ninda an saindang sadiri.
“An mga parasiyasat dai pa sana nahaloy nakatipon nin supisyenteng impormasyon na nagsusuherir na an pabalikbalik na kaanggotan nakararaot na marhay sa hawak na iyan kapareho nin, o mas grabe pa ngani sa, pagsigarilyo, katabaan asin halangkaw-sa-taba na kakanon bilang makosog na causa nin amay na pagkagadan.
“‘An samong pagsiyasat nagpapaheling na an mabangis, suspetsosong kaanggotan kapareho nin ano pa man na ibang peligro sa salud na aram niato,’ an sabi ni Dr. Redford Williams, sarong parasiyasat sa medisina na nag-eespesyalisar sa gawe-gawe sa Duke University Medical Center.”
An mga pagsiyasat nagpapaheling na an mga labi-labi an reaksion sa mga problema na uso sa aroaldaw na buhay nagpoprodusir nin mas dakol na hormona nin tension. An parate nindang pagkaanggot puwedeng magcausa nin pagkabakong balanse kan nagpoprotehir asin kan nakararaot na mga porma nin kolesterol, na isinasapeligro sinda sa helang sa puso.
An iba tibaad magsabi: ‘Pero talagang arog ako kaiyan’ o, ‘Nagdakula akong arog kaiyan.’ Minsan siring, dai boot sabihon kaiyan na dai na kamo puwedeng magbakle, paagi sa sinserong pagmamaigot na ikaaplikar an hatol nin Dios. Sa sadiri nindong Biblia, siyasaton an saiyang hatol manongod sa kaanggotan asin kabangisan na nasusurat sa Talinhaga 14:29, 30; 22:24, 25; Efeso 4:26; Santiago 1:19, 20.
An pag-aplikar kan kadonongan na iyan nin Dios ikararahay kan saindong salud asin ikalalawig kan saindong buhay. An Times nagsabi: “An dakol na parasiyasat nagsabi na an mga tawong aranggoton puwedeng inaan an peligro nin amay na pagkagadan paagi sa pagbakle sa pinagkatodan, anggoton na mga reaksion.”