“Labi Pa sa Makosog na Banwaan”
“SA PRESENTENG rikas, mga 40% kan kaakian sa E.U. an makaheheling kan katapusan kan pag-inagoman kan saindang mga magurang bago sinda mag-18.” (Science, Hunyo 7, 1991) Kanigoan kamakatatakot na estadistika! Taano ta nangyayari ini?
An huwes sa korte nin mga kasong pampamilya asin berepikasyon nin testamento na si Edward M. Ginsburg, nagtao kan saiyang opinyon sa sarong interbio kan The Boston Globe. Nagsabi sia: “Paslong sosyedad kita. Gusto ta an para sa ‘sako.’ Naghahapot kita, ‘Ano dian an para sa sako ngonyan?’ Gusto ta nin tolos na pagpanigo.”
An bakong maygurang na kapasloan na iyan minagiya sa kapaitan asin iriwal sa pag-agoman. Nagsabi si Huwes Ginsburg na kun an mga mag-agom sa katapustapusi makaabot sa korte nin diborsio, boot kan agom na lalaki asin babae na mabindikar. Gusto ninda na may magsabi sainda na tama sinda asin na sala an saindang agom. Gusto ninda na may magsabing: “Nanggana ka sa ralaban.”
An saiyang mga tataramon nagpapagirumdom sa sato kan ipinasabong na talinhaga: “An tugang na pinagkasalaan labi pa sa makosog na banwaan.” (Talinhaga 18:19) Iyo, kun nagkakaiwal an mag-agom, an nag-iiwal na mga lado puwedeng magin bakong makatanosan asin matagas. Sa parate, marigon sindang nagsasayumang magpahunod, siring sa “makosog na banwaan” na nasa irarom nin pagsalikop.
Dapat daw na magin arog kaini an mga bagay? Dai, igwa nin ibang paagi. An pag-aragoman makosog asin nagtatagal kun kapwa an duwang lado, sa pagpopoon pa sana, hinihimate an mga tataramon ni apostol Pablo: “Magin maboot sa lambang saro, na may maboot na pagkaherak, na lubos na nagpapatarawadtawad siring na an Dios man lubos na nagpatawad saindo paagi ki Cristo.” (Efeso 4:32) Pasil daw na kultibaron an siring na mga kuwalidad? Bako permi. Alagad gurano kapasil kan diborsio? Gurano kakolog kan emosyonal asin pinansial na mga pasanon nin laglag na pag-agoman? Asin kumusta man an mga aki, na parateng dinadara sagkod sa pagdakula an mga lugad sa boot gikan sa pagdiborsio kan saindang mga magurang?
Orog pang marahay para sa mag-agom na kapwa magmaigot na preserbaron an pag-agoman asin dai magin bakong mapagpahunod sa kada saro, siring sa “makosog na banwaan.” An sadol ni Pablo sa mga Kristiano minaaplikar nangorogna sa mga mag-aragom: “Isolog nindo an pagkamoot, huli ta iyan sangkap na bogkos nin pagkasararo.”—Colosas 3:14.
[Picture Credit Line sa pahina 32]
The Complete Encyclopedia of Illustration/J. G. Heck