Sarong Banggi na Maninigong Girumdomon

SA SARONG dai malilingawan na aldaw labing 3,500 na taon na an nakaagi, si Jehova Dios ipinabono sa bihag na mga Israelita sa Egipto an sarong kordero asin ipinawirik an dugo kaiyan sa mga harigi kan pinto asin mga balagbag sa itaas kan pinto kan saindang mga harong. Kan banggi man sanang iyan, an anghel nin Dios linihisan an mga harong na markado sa paaging ini alagad ginadan an panganay na mga aking lalaki sa mga harong kan gabos na Egipcio. Dangan pinatalingkas an mga Israelita. Poon kaidto, sa anibersaryo kan pangyayaring iyan, siniselebrar kan mga Judio an Paskua.

Tolos-tolos pakaselebrar ni Jesu-Cristo kan saiyang huring Paskua kaiba kan saiyang mga apostol, pinonan nia an sarong pamanggihan na magpapagirumdom kan saiyang kagadanan bilang atang. Tinawan nia nin tinapay an saiyang maimbod na mga apostol asin nagsabi: “Kua, kakan kamo. Ini nangangahulogan kan sakong hawak.” Dangan tinawan nia sinda kan kopa nin arak asin nagsabi: “Inom kamo kaiyan, kamo gabos; huli ta ini nangangahulogan kan sakong ‘dugo kan tipan,’ na papaboloson manongod sa dakol para sa kapatawadan nin mga kasalan.” Nagsabi man si Jesus: “Padagos na gibohon nindo ini sa paggirumdom sa sako.” (Mateo 26:​26-28; Lucas 22:​19, 20) Kaya pinagbotan ni Jesus an saiyang mga parasunod na gibohon an pagselebrar na ini kan saiyang kagadanan.

An mga Saksi ni Jehova mainit na iniimbitaran kamo na makiiba sainda sa pagselebrar kan Memorial na ini kan kagadanan ni Jesus. Puwede kamong umatender sa Kingdom Hall na pinakaharani sa saindong harong. Ihapot sa mga Saksi sa saindong lugar an eksaktong oras asin lugar. An petsa kan pagselebrar ngonyan na 1994 Sabado, Marso 26, na ililibot an tinapay asin arak pagkasolnop kan aldaw.