Durungan sa Laog nin Sampulong Taon!
KAN hapoton kun ano an namatean nia sampulong taon na an nakaagi kan an edisyon na Kastila kan An Torrengbantayan pinonan na ipublikar kadungan kan Ingles, an sarong namomotan na Kastilang tugang na babae nagsimbag: ‘Namamatean mi na bendisyon iyan huli ta ngonyan kami, paano ngani nindo sasabihon, kadungan na kan Ingles. Kun sinasabi kong Ingles, an talagang nasa isip ko an organisasyon. Inaapod mi an organisasyon na “Mama.” Namamatean niamo na kami dayupot, harani. Magayon iyan. Makangangalas iyan!’
An maimbod na tugang na babaeng ini nagpahayag kan mga saboot nin dakol na dai nakababasa nin Ingles. Sa nakaaging mga taon, naglataw an mga artikulo sa edisyon na Kastila kan An Torrengbantayan mga anom na bulan pakapublikar kan mga iyan sa Ingles. An iba pang lenguahe nakaeksperyensia nin kaparehong mga pagkaatraso. Siyempre, nagkaigwa nin makosog na pagmawot na ipublikar an parehong materyal, sa parehong panahon, sa dakol na lenguahe.
Kaya magpoon sa luwas na Abril 1, 1984, an edisyon na Kastila an kaenot-enote na nagin kadungan kan edisyon na Ingles. Dai nahaloy suminunod an ibang lenguahe. Sa pagpoon kan 1985, an mga edisyon sa 23 na lenguahe durungan na. Mantang an mga paratradusir nanonompongan asin nasasanay, an mga edisyon sa dakol pang lenguahe nakadungan sa Ingles.
An luwas na ini kan An Torrengbantayan nagtatanda sa ikasampulong taon nin durungan na pagpublikar. An Torrengbantayan ipinupublikar na ngonyan sa 116 na lenguahe, na 85 kaini an durungan. Nangangahulogan ini na 99.3 porsiento kan total na promedyong produksion na 16,100,000 na kopya kan An Torrengbantayan an pinoprodusir na may parehong disenyo sa tutob asin mga artikulo. Sa mga nag-aatender sa semanal na Pag-adal sa Torrengbantayan, labing 95 porsiento an nag-aadal kan parehong materyal sa parehong panahon.
An Awake!, an kapadis na magasin kan An Torrengbantayan, ipinupublikar nin durungan sa 37 kan 74 lenguahe kaiyan. An taonan na Yearbook of Jehovah’s Witnesses ipinupublikar sa 18 lenguahe. An siring na durungan na publikasyon nagseserbi na sararoon an banwaan nin Dios “sa saro sanang pag-isip asin sa saro sanang paghonahona.”—1 Corinto 1:10.