An Pinakadakulang Tawo na Nabuhay Kasuarin Pa Man

Kapitulo 4: Nangingidam Alagad Mayo Pang Agom

SI Maria nasa ikatolong bulan na nin pangingidam. Magigirumdoman nindo na ginamit nia an enot na mga bulan kan saiyang pangingidam sa pagsongko ki Elizabet, pero ngonyan nakapuli na sia sa Nazaret. Dai mahaloy an saiyang kamugtakan maaaraman kan publiko sa saiyang sadiring banwaan. Tunay nanggad, sia nasa makahahadit na situwasyon!

An orog pang nagpagrabe sa situwasyon iyo na si Maria nakatalaan nang magin agom kan panday na si Jose. Asin aram nia na, sa irarom kan pagboot nin Dios sa Israel, an sarong babae na katrato na nin sarong lalaki pero boluntad na nakidorog sa ibang lalaki kaipuhan na gapoon sagkod na magadan. Paano nia ikakapaliwanag ki Jose an saiyang pangingidam?

Huling si Maria tolong bulan na nawara, makasisierto kita na si Jose galaga nang maheling sia. Kan magkahelingan sinda, posibleng ibinareta iyan saiya ni Maria. Puwedeng ginibo nia an saiyang pinakamakakaya tanganing ipaliwanag na paagi sa banal na espiritu nin Dios kaya sia nangingidam. Pero siring sa maiimahinar nindo, ini depisilon na paniwalaan ni Jose.

Aram ni Jose an magayon na reputasyon ni Maria. Asin malinaw na namomotan nia siang marhay. Alagad, apisar kan ano man na paliwanag nia, talagang garo baga nabadosan sia nin ibang lalaki. Minsan siring, habo ni Jose na si Maria gapoon sagkod na magadan o mabulgar sa kasosopgan. Kaya nagdesisyon siang idiborsio ini sa hilom. Kan mga aldaw na idto, an mga magkatrato ibinibilang nang mag-agom, asin diborsio an hinahagad tanganing tapuson an pagigin magkatrato.

Kan huri, mantang pinaghohorophorop pa ni Jose an mga bagay na ini, nakatorog sia. An anghel ni Jehova nagpaheling saiya sa sarong pangatorogan asin nagsabi: “Dai ka matakot na ipuli si Maria na saimong agom, huli ta an saiyang ipinangingidam paagi sa banal na espiritu. Sia mangangaki nin sarong lalaki, asin kaipuhan na apodon mo an saiyang ngaran na Jesus, huling ililigtas nia an saiyang banwaan sa saindang mga kasalan.”

Pagmata ni Jose, kanigoan an pasasalamat nia! Daing pag-atraso, ginibo nia an mismong ipinagboot kan anghel. Saiyang ipinuli si Maria sa saiyang harong. An hayag na aksion na ini garo man sana nagseserbing seremonya sa kasal, na nagtatao nin notisya na si Jose asin Maria ngonyan opisyal nang mag-agom. Pero si Jose dai nakidorog ki Maria sagkod na ipinangingidam kaini si Jesus.

Uya! Si Maria bados nang marhay, alagad isinasakay sia ni Jose sa sarong asno. Masaen sinda, asin taano ta mabiyahe sinda mantang si Maria haros mangangaki na? Lucas 1:​39-41, 56; Mateo 1:​18-25; Deuteronomio 22:​23, 24.

▪ Ano an pinag-iisip-isip ni Jose kan maaraman nia an pangingidam ni Maria, asin taano?

▪ Paano ikadidiborsio ni Jose si Maria mantang bako pa man sindang mag-agom?

▪ Anong hayag na aksion an nagserbing seremonya sa kasal ni Jose asin Maria?