An Pinakadakulang Tawo na Nabuhay Kasuarin Pa Man

Kapitulo 7: Si Jesus Asin an mga Astrologo

MAY nagkapirang lalaki na nagdatong hale sa Sirangan. Sinda mga astrologo​—mga tawo na naghihingakong nakaiinterpretar sa kamugtakan kan mga bitoon. Kan yaon pa sinda sa Sirangan, sinda may naheling na sarong bagong bitoon, asin sinundan ninda iyan nin ginatos na milya pasiring sa Jerusalem.

Pag-abot sa Jerusalem kan mga astrologo, nagharapot sinda: “Haen an saro na namundag na hade kan mga Judio? Huli ta naheling niamo an saiyang bitoon kan kami yaon sa Sirangan, asin kami napadigdi tanganing maghuruhod saiya.”

Kan mabaretaan ini ni Hadeng Herodes sa Jerusalem, naribok siang marhay. Kaya inapod nia an poon na mga saserdote asin hinapot kun saen mamumundag an Cristo. Ibinabasar an saindang simbag sa Kasuratan, sinda nagsimbag: “Sa Betlehem.” Huli kaiyan, pinaduman nia sa saiya an mga astrologo asin sinabihan sinda: “Paduman kamo asin gumibo nin maingat na paghanap sa sadit na aki, asin kun manompongan nindo iyan bumalik kamo sako, tanganing ako man makaduman asin maghuruhod.” Pero, aktuwalmente, gustong maheling ni Herodes an aki tanganing gadanon sia!

Pakahale ninda, may makangangalas na nangyari. An bitoon na saindang naheling kan sinda nasa Sirangan naeenot sainda. Malinaw nanggad, ini bakong ordinaryong bitoon, kundi iyan espesyalmenteng itinao sa pagdirehir sainda. Padagos na sinundan iyan kan mga astrologo sagkod na iyan umontok sa tangod mismo kan harong na iniistaran ni Jose asin Maria.

Pagdagos kan mga astrologo sa harong, naheling ninda si Maria kaiba an saiyang sadit na aki, si Jesus. Dangan sinda gabos naghuruhod saiya. Asin ilinuwas ninda sa saindang mga bag an mga regalong bulawan, kamangyan, asin mira. Pakatapos kaiyan, kan sinda mabalik na asin sasabihan si Herodes kun haen an aki, pinatanidan sinda nin Dios sa sarong pangatorogan na dai paggibohon iyan. Kaya nagpuruli sinda sa saindang sadiring daga sa ibang dalan.

Siisay sa paghona nindo an nagtao kan bitoon na naghihiro sa langit tanganing giyahan an mga astrologo? Girumdomon, an bitoon dai sinda direktang giniyahan pasiring ki Jesus sa Betlehem. Imbes, sinda giniyahan pasiring sa Jerusalem kun saen nakaolay ninda si Hadeng Herodes, na gustong gadanon si Jesus. Asin nagibo kutana nia iyan kun an Dios dai nakiaram asin pinatanidan an mga astrologo na dai pagsabihan si Herodes kun haen si Jesus. An kaiwal nin Dios, si Satanas na Diablo, an gustong ipagadan si Jesus, asin ginamit nia an bitoon na iyan sa paghihingoang maotob an saiyang katuyohan. Mateo 2:​1-12; Miqueas 5:2.

▪ Ano an nagpapaheling na an bitoon na naheling kan mga astrologo bakong ordinaryong bitoon?

▪ Haen si Jesus kan manompongan sia kan mga astrologo?

▪ Taano ta naaaraman niato na si Satanas an nagtao kan bitoon tanganing giyahan an mga astrologo?