An Pinakadakulang Tawo na Nabuhay Kasuarin Pa Man

Kapitulo 10: Mga Pagbiyahe Pasiring sa Jerusalem

NAGDATONG na an tigsoli. Asin panahon na para sa pamilya ni Jose, kaiba an saindang mga katood asin paryentes, na gibohon an saindang taonan na pagbiyahe kun tigsoli pasiring sa Jerusalem sa pagselebrar kan Paskua. Mantang pahale na sinda para sa mga 100-kilometros na pagbiyahe, yaon an parate nang kaogmahan. Si Jesus ngonyan 12 anyos na, asin hinihimuyawot na niang marhay an kapiyestahan.

Para ki Jesus asin sa saiyang pamilya, an Paskua bako sanang sarong aldaw na okasyon. Nagdadanay pa man sinda duman para sa kasunod na pitong aldaw na Kapiyestahan kan mga Tinapay na Daing Lebadura, na ibinibilang nindang kabtang pa kan panahon nin Paskua. Bilang resulta, an bilog na pagbiyahe hale sa saindang harong sa Nazaret, kabale an pag-istar sa Jerusalem, mga duwang semana. Pero ngonyan na taon, huli sa sarong bagay na kalabot si Jesus, iyan kinaipuhan na mas haloy-haloy.

An problema nahayag kan nagbibiyahe na pabalik hale sa Jerusalem. Si Jose asin Maria naghona na si Jesus kasabay sa grupo kan mga paryentes asin katood na magkairibang nagbibiyahe. Alagad dai sia naheling kan sinda umontok pagkabanggi, asin hinanap ninda sia sa kairiba nindang nagbibiyahe. Dai sia nanompongan. Kaya si Jose asin Maria nagbuwelta pa-Jerusalem tanganing hanapon sia.

Bilog na aldaw sindang naghanap, pero mayong nangyari. Kan sumunod na aldaw dai pa giraray ninda sia nanompongan. Sa katapustapusi, kan ikatolong aldaw, nagduman sinda sa templo. Duman, sa saro sa mga kuwarto kaiyan, naheling ninda si Jesus na nagtutukaw sa tahaw kan mga Judiong paratokdo, na naghihinanyog sa sainda asin naghahapot.

“Aki, taano ta trinatar mo kami nin siring kaini?” an hapot ni Maria. “Uya ako asin an saimong ama hinahanap ka na may paghadit sa isip.”

Nagngalas si Jesus ta dai ninda aram kun saen sia ninda manonompongan. “Taano ako ta hinanap nindo?” an hapot nia. “Dai kamo nakakaaram na ako maninigong nasa harong kan sakong Ama?”

Dai masabotan ni Jesus kun taano ta dai ini aram kan saiyang mga magurang. Dangan, si Jesus nagpuli sa harong kaiba kan saiyang mga magurang asin sia padagos sa pagpapasakop sa sainda. Sia nagpadagos na umoswag sa kadonongan asin kosog patin sa pakapaoyon sa Dios asin sa mga tawo. Iyo, magpoon sa saiyang pagkaaki, si Jesus nagtao nin marahay na halimbawa bako sanang sa paghanap sa espirituwal na intereses kundi siring man sa pagpaheling nin paggalang sa saiyang mga magurang. Lucas 2:​40-52; 22:7.

▪ Anong pagbiyahe sa panahon nin tigsoli an regular na ginigibo ni Jesus kaiba kan saiyang pamilya, asin gurano iyan kahaloy?

▪ Ano an nangyari durante kan pagbiyahe ninda kan si Jesus 12 anyos na?

▪ Anong halimbawa an itinao ni Jesus para sa mga hobenes ngonyan?

(Ipagpapadagos sa masunod na luwas.)