Si Abraham—Ilinobong Digdi, Pero Buhay?

Sa laog nin mga siglo an mga Judio, Muslim, asin Kristiano nagbiyahe pasiring sa lugar na ini.

Puwede nindong pasyaran ini sa suanoy na siudad nin Hebron, sa timog kan Jerusalem. An estrukturang ini pareho inaapod na Haram el-Khalil asin Lolobngan kan mga Patriarka. Iyo, inaako ini kan kadaklan bilang lolobngan kan mga patriarkang si Abraham, Isaac, asin Jacob, patin man kan saindang kanya-kanyang agom na si Sara, Rebeca, asin Lea.

Girumdoma sa Biblia na pagkagadan kan saiyang namomotan na agom, si Sara, si Abraham buminakal nin sarong kuweba bilang lolobngan asin nin sarong daga sa Macpela, na harani sa Hebron. (Genesis 23:​2-20) Kan huri, si Abraham ilinobong man digdi, patin man an iba pang miembro kan pamilya. Pakalihis nin mga siglo, sa palibot kan tradisyonal na lolobngan, si Herodes na Dakula nagpatindog nin sarong magayon na edipisyo na pag-abot nin panahon binago asin pinadakula kan mga nandaog, na ipinaheheling an saindang sadiring relihiyosong mga paniniwala.

Sa paglaog, may maheheling kamong anom na cenotafio (mga monumento o mayong laog na mga lolobngan). An sadit na retrato nagpapaheling kan saro na para ki Isaac, na aki ni Abraham. Sa harani kaiyan may mga labot sa salog, na ginamit tanganing makapasiring sa irarom. An mga imbestigador nakanompong nin mga kuwarto na puwedeng linaogan nin kadakol na suanoy na tolang.

Kumusta si Abraham? Kun sia ilinobong sa sarong kuweba na ngonyan nasa irarom kan lugar na ini, haloy na siang gadan, bako daw? An kadaklan na bisita maoyon. Alagad an sarong propeta na mas dakula ki Abraham nagsabi na sa sarong sentido si Abraham buhay pa. Paano? Asin ano an puwedeng magin epekto kaini sa saindong pagtubod?

Tabi basahon an artikulong “An Saindong Gadan Nang mga Namomotan​—Haen daw Sinda?” (Pahina 3) Ipinaliliwanag kaiyan an sinabi kan dakulang propeta manongod sa pagigin buhay pa ni Abraham, impormasyon na puwedeng magin mahalagang marhay sa saindo asin sa saindong pamilya.